ಲೆಜೆಂಡ್ಸ್‌ ಚೆಸ್‌: ವಿಶ್ವನಾಥನ್‌ ಆನಂದ್‌ಗೆ ಸೋಲಿನ ಹ್ಯಾಟ್ರಿಕ್‌

ಚೆನ್ನೈ: ಲೆಜೆಂಡ್ಸ್‌ ಆಫ್ ಚೆಸ್‌ ಆನ್‌ಲೈನ್‌ ಪಂದ್ಯಾವಳಿಯಲ್ಲಿ ಭಾರತದ ವಿಶ್ವನಾಥನ್‌ ಆನಂದ್‌ ಅವರ ಸೋಲಿನ ಆಟ ಮುಂದುವರಿದಿದೆ.

ಅವರು ಸೋಲಿನ ಹ್ಯಾಟ್ರಿಕ್‌ಗೆ ತುತ್ತಾಗಿದ್ದು, ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕೆ ಜಾರಿದ್ದಾರೆ.

150,000 ಡಾಲರ್‌ ಬಹುಮಾನದ ಈ ಪಂದ್ಯಾವಳಿಯ 3ನೇ ಮುಖಾಮುಖಿಯಲ್ಲಿ ರಶ್ಯದ ವ್ಲಾದಿಮಿರ್‌ ಕ್ರಾಮ್ನಿಕ್‌ ವಿರುದ್ಧ ಆನಂದ್‌ 0.5-2.5 ಅಂಕಗಳಿಂದ ಎಡವಿದರು.

ಇದು ಮಾಜಿ ವಿಶ್ವ ಚಾಂಪಿಯನ್ನರಿಬ್ಬರ ನಡುವಿನ ಹೋರಾಟವಾಗಿತ್ತು.

ಆನಂದ್‌ ಮೊದಲ ಸುತ್ತಿನ ಎರಡೂ ಪಂದ್ಯಗಳನ್ನು ಸೋತರು. ಅನಂತರದ ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವುದರೊಂದಿಗೆ ಗೆಲುವಿನ ಆಸೆ ಕಮರಿತು.

ಮೊದಲೆರಡು ಪಂದ್ಯಗಳಲ್ಲಿ ಪೀಟರ್‌ ಸ್ವಿಡ್ಲರ್‌ ಮತ್ತು ಮ್ಯಾಗ್ನಸ್‌ ಕಾರ್ಲ್ಸೆನ್‌ ವಿರುದ್ಧ ಆನಂದ್‌ ಎಡವಿದ್ದರು.

ಈ ಜಯದೊಂದಿಗೆ ವ್ಲಾದಿಮಿರ್‌ ಕ್ರಾಮ್ನಿಕ್‌ ಸತತ 3 ಗೆಲುವುಗಳೊಂದಿಗೆ ಸ್ವಿಡ್ಲರ್‌ ಜತೆ ಅಗ್ರ ಸ್ಥಾನವನ್ನು ಹಂಚಿಕೊಂಡಿದ್ದಾರೆ. ಇಬ್ಬರೂ ತಲಾ 9 ಅಂಕ ಹೊಂದಿದ್ದಾರೆ.

ಆನಂದ್‌ ಅವರಂತೆ ವಿಶ್ವದ ನಂ.3 ಆಟಗಾರ ಡಿಂಗ್‌ ಲಿರೆನ್‌ ಕೂಡ ಸತತ 3 ಪಂದ್ಯಗಳಲ್ಲಿ ಸೋಲನುಭವಿಸಿದ್ದಾರೆ. ತೃತೀಯ ಮುಖಾಮುಖಿಯಲ್ಲಿ ಲಿರೆನ್‌ ಅವರನ್ನು ವ್ಯಾಸಿಲ್‌ ಇವಾಂಚುಕ್‌ 1.5-0.5 ಅಂಕಗಳಿಂದ ಹಿಮ್ಮೆಟ್ಟಿಸಿದರು. 4ನೇ ಸುತ್ತಿನ ಪಂದ್ಯದಲ್ಲಿ ಆನಂದ್‌ ಹಾಲೆಂಡ್‌ನ‌ ಅನೀಶ್‌ ಗಿರಿ ವಿರುದ್ಧ ಆಡಲಿದ್ದಾರೆ.