Bullet Train; ಬೆಂಗಳೂರಿನಲ್ಲೇ ತಯಾರಾಗಲಿದೆ ದೇಶದ ಮೊದಲ ಬುಲೆಟ್‌ ರೈಲು?

ನವದೆಹಲಿ: ದೇಶದ ಮೊದಲ ಬುಲೆಟ್‌ ರೈಲು ಬೆಂಗಳೂರಿನಲ್ಲಿ ತಯಾರಾಗುವ ಸಾಧ್ಯತೆಗಳಿವೆ. ಇಂಟೆಗ್ರಲ್‌ ಕೋಚ್‌ ಫ್ಯಾಕ್ಟರಿ ಕರೆದಿದ್ದ ಟೆಂಡರ್‌ನಲ್ಲಿ ಬೆಮೆಲ್‌ ಮಾತ್ರ ಭಾಗಿಯಾಗಿದ್ದು, ಇದು ಅಂತಿಮಗೊಳ್ಳುವ ಸಾಧ್ಯತೆ ಇದೆ. ಮುಂಬೈ-ಅಹಮದಾಬಾದ್‌ ನಡುವಿನ ಮಾರ್ಗದಲ್ಲಿ ಈ ರೈಲು ಸಂಚಾರ ನಡೆಸಲಿದ್ದು, ಬೆಮೆಲ್‌ನ ಬೆಂಗಳೂರಿನ ಘಟಕದಲ್ಲೇ ರೈಲು ತಯಾರಾಗಲಿದೆ ಎನ್ನಲಾಗಿದೆ.

“8 ಬೋಗಿಗಳನ್ನು ಒಳಗೊಂಡಿರುವ 2 ಬುಲೆಟ್‌ ರೈಲುಗಳ ನಿರ್ಮಾಣಕ್ಕೆ ಬೆಮೆಲ್‌ ಮಾತ್ರ ಅರ್ಜಿ ಸಲ್ಲಿಸಿದೆ, 1 ವಾರದಲ್ಲಿ ಟೆಂಡರ್‌ ಅಂತಿಮಗೊಳ್ಳಲಿದೆ’ ಎಂದು ಇಂಟೆಗ್ರಲ್‌ ಕೋಚ್‌ ಫ್ಯಾಕ್ಟರಿಯ ಮುಖ್ಯಸ್ಥ ಸುಬ್ಟಾ ರಾವ್‌ ಹೇಳಿದ್ದಾರೆ. ಸದ್ಯಕ್ಕೆ 2 ರೈಲು ನಿರ್ಮಾಣಕ್ಕೆ ಮಾತ್ರ ಟೆಂಡರ್‌ ಕರೆಯಲಾಗಿದ್ದು, ಮುಂದಿನ 2.5 ವರ್ಷಗಳಲ್ಲಿ ಪೂರ್ಣ ಗೊಳ್ಳುವ ವಿಶ್ವಾಸವಿದೆ ಎಂದಿದ್ದಾರೆ.

ರೈಲಿನ ವಿಶೇಷತೆ‌: ಒಟ್ಟು 8 ಬೋಗಿಗಳನ್ನು ಹೊಂದಿರುವ ಬುಲೆಟ್‌ ರೈಲು ಗಂಟೆಗೆ 280ಕಿ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿದ್ದು, 250 ಕಿ.ಮೀ. ವೇಗದಲ್ಲಿ ಕಾರ್ಯನಿರ್ವಹಿಸಲಿದೆ. 8ರ ಪೈಕಿ 7 ಬೋಗಿಗಳಲ್ಲಿ 3+2 ಚೇರ್‌ ಇರಲಿದ್ದು, 1 ಬೋಗಿಯಲ್ಲಿ 2+2 ಚೇರ್‌ ಇರಲಿದೆ. ಒಂದು ರೈಲಿನ ನಿರ್ಮಾಣಕ್ಕೆ 200ರಿಂದ 250 ಕೋಟಿ ರೂ. ವೆಚ್ಚವಾಗಲಿದೆ ಎಂದು ಮೂಲಗಳು ತಿಳಿಸಿದೆ.