ಇಂಡಿಯನ್‌ ವೆಲ್ಸ್‌  ಟೆನಿಸ್‌: ಜೊಕೋವಿಕ್‌, ಒಸಾಕಾ ಜಯ

ಇಂಡಿಯನ್‌ ವೆಲ್ಸ್‌: ನಂ. 1 ಟೆನಿಸಿಗ ನೊವಾಕ್‌ ಜೊಕೋವಿಕ್‌, ಜಪಾನಿನ ನವೋಮಿ ಒಸಾಕಾ “ಇಂಡಿಯನ್‌ ವೆಲ್ಸ್‌’ ಕೂಟದ ಮೊದಲ ಸುತ್ತಿನ ಪಂದ್ಯದಲ್ಲಿ ಗೆಲುವು ದಾಖಲಿಸಿದ್ದಾರೆ. 

ಜೊಕೋವಿಕ್‌ ಅಮೆರಿಕದ ಬೋರ್ನ್ ಫ್ರಾಟೆಂಜೆಲೊ ಅವರನ್ನು 90 ನಿಮಿಷಗಳಲ್ಲಿ 7-6 (7-5), 6-2 ಸೆಟ್‌ಗಳಿಂದ ಸೋಲಿಸಿದರು. ಇದು ಇಂಡಿಯನ್‌ ವೆಲ್ಸ್‌ನಲ್ಲಿ ಜೊಕೋವಿಕ್‌ ಸಾಧಿಸಿದ 50ನೇ ಜಯ. ಮುಂದಿನ ಪಂದ್ಯದಲ್ಲಿ ಜರ್ಮನಿಯ ಫಿಲಿಪ್‌ ಕೋಹ್ಲಶ್ರೀಬರ್‌ ಅವರನ್ನು ಎದುರಿಸಲಿದ್ದಾರೆ. 

ಉಳಿದಂತೆ ಪುರುಷರ ವಿಭಾಗದಲ್ಲಿ ಕೀ ನಿಶಿಕೊರಿ, ಡೊಮಿನಿಕ್‌ ಥೀಮ್‌, ಅಲೆಕ್ಸಾಂಡರ್‌ ಜ್ವೆರೇವ್‌ ಗೆಲುವು ದಾಖಲಿಸಿದರು. ಆದರೆ ದಕ್ಷಿಣ ಆಫ್ರಿಕಾದ ಟೆನಿಸಿಗ ಕೆವಿನ್‌ ಆ್ಯಂಡರ್ಸನ್‌ ಮೊಣಕೈ ನೋವಿನಿಂದಾಗಿ “ಇಂಡಿಯನ್‌ ವೆಲ್ಸ್‌’ ಕೂಟದಿಂದ ನಿರ್ಗಮಿಸಿದ್ದಾರೆ. 

ಒಸಾಕಾಗೆ ಸುಲಭ ಜಯ
ವನಿತಾ ವಿಭಾಗದಲ್ಲಿ ವಿಶ್ವದ ಅಗ್ರ ಆಟಗಾರ್ತಿ, ಹಾಲಿ ಚಾಂಪಿಯನ್‌ ನವೋಮಿ ಒಸಾಕಾ ಫ್ರಾನ್ಸ್‌ನ ಕ್ರಿಸ್ಟಿನಾ ಲಡೆನೋವಿಕ್‌ ಅವರನ್ನು 6-4, 6-4 ನೇರ ಸೆಟ್‌ಗಳಿಂದ ಸೋಲಿಸುವ ಮೂಲಕ ಕಳೆದ “ದುಬಾೖ ಓಪನ್‌’ನಲ್ಲಿ ಅನುಭವಿಸಿದ ಸೋಲಿನ ಸೇಡು ತೀರಿಸಿಕೊಂಡರು. ಮುಂದಿನ ಪಂದ್ಯದಲ್ಲಿ ಒಸಾಕಾ ಎದುರಾಳಿ ಅಮೆರಿಕದ ಡೇನಿಯೆಲ್‌ ಕೊಲಿನ್ಸ್‌. ಅವರು ಬೆಲ್ಜಿಯಂನ ಕ್ರಿಸ್ಟಿನ್‌ ಫಿಪ್‌ಕೇನ್ಸ್‌ ವಿರುದ್ಧ 6-4, 6-1 ನೇರ ಸೆಟ್‌ಗಳ ಜಯ ಸಾಧಿಸಿದರು.

ವೀನಸ್‌ ವಿಲಿಯಮ್ಸ್‌ 3ನೇ ಶ್ರೇಯಾಂಕದ ಪೆಟ್ರಾ ಕ್ವಿಟೋವಾ ಅವರನ್ನು 4-6, 7-5, 6-4ರಿಂದ ಪರಾಭವಗೊಳಿಸಿದರು. 3 ಬಾರಿಯ ಸೆಮಿಫೈನಲಿಸ್ಟ್‌ ಆಗಿರುವ ವೀನಸ್‌ ತಮ್ಮ ವೃತ್ತಿಜೀವನದ 50ನೇ ಪ್ರಶಸ್ತಿಯನ್ನು ಎದುರು ನೋಡುತ್ತಿದ್ದಾರೆ.