ಭಾರತದಲ್ಲಿ ಪ್ರಕಟವಾದ ಮೊದಲ ಕೋವಿಡ್ 19 ವೈರಸ್ ಚಿತ್ರ

ಭಾರತದಲ್ಲಿ ಪತ್ತೆಯಾದ ಮೊಟ್ಟಮೊದಲ ಕೋವಿಡ್ 19 ವೈರಸ್ ಚಿತ್ರವನ್ನು ಇಂಡಿಯನ್‌ ಜರ್ನಲ್‌ ಆಫ್ ಮೆಡಿಕಲ್‌ ರಿಸರ್ಚ್‌ ಪತ್ರಿಕೆ ಪ್ರಕಟಿಸಿದೆ. ಪುಣೆಯಲ್ಲಿನ ವಿಜ್ಞಾನಿಗಳು ಟ್ರಾನ್ಸ್‌ಮಿಷನ್‌ ಎಲೆಕ್ಟ್ರಾನ್‌ ಮೈಕ್ರೋಸ್ಕೋಪ್‌ ಇಮೇಜಿಂಗ್‌ ಬಳಸಿ ಇದನ್ನು ಸೆರೆಹಿಡಿದಿದ್ದಾರೆ.

ಸಾರ್ಸ್‌- ಕೋವ್‌- 2 ಕುಟುಂಬಕ್ಕೆ ಸೇರಿದ ಈ ವೈರಸ್‌ ಅನ್ನು, 2020ರ ಜನವರಿ 30ರಂದು, ರೋಗಿಯ ಗಂಟಲು ದ್ರವದ ಪರೀಕ್ಷೆ ಮೂಲಕ ಪತ್ತೆಹಚ್ಚಲಾಗಿತ್ತು. ಚೀನಾದ ವುಹಾನ್‌ನಲ್ಲಿ ಮೆಡಿಸಿನ್‌ ಅಭ್ಯಾಸ ಮಾಡುತ್ತಿದ್ದ ಒಬ್ಬಳು ಮಹಿಳೆ, ಮೂವರು ವಿದ್ಯಾರ್ಥಿಗಳು, ಭಾರತಕ್ಕೆ ಮರಳಿ, ಕೋವಿಡ್ 19 ವೈರಸ್ ಕುರಿತ ಸಂಶೋಧನೆಗಿಳಿದಿದ್ದರು. ಆ ಹೊತ್ತಿನಲ್ಲಿ ಅದಾಗಲೇ ವುಹಾನ್‌ನಲ್ಲಿ ಕೋವಿಡ್ 19 ವೈರಸ್ ಅಟ್ಟಹಾಸ ಮೆರೆದು, ತಿಂಗಳುಗಳೇ ಕಳೆದಿದ್ದವು.

ಕೇರಳದ ಸೋಂಕಿತನಿಂದ ಸಂಗ್ರಹಿಸಲಾದ ಕೋವಿಡ್ 19 ವೈರಸ್ ಚಿತ್ರವು, ಮಿಡಲ್‌ ಈಸ್ಟ್‌ ರೆಸ್ಪಿರೇಟರಿ ಸಿಂಡ್ರೋಮ್‌ಗೆ ಕಾರಣವಾದ ಮೆರ್ಸ್‌- ಕೋವ್‌ ವೈರಸ್‌ ಅನ್ನು ಹೋಲುವಂತಿದೆ. 70-80 ಎನ್‌ಎಂ ಗಾತ್ರವನ್ನು ಹೊಂದಿದೆ. ಕೊರೊನಾವು ಪ್ರಾಣಿಗಳಿಂದ ಮನುಷ್ಯರಿಗೆ ಹಬ್ಬಿದಾಗ, ಹೇಗೆಲ್ಲ ಮಾರ್ಪಾಡು ಹೊಂದುತ್ತದೆ ಎಂಬುದನ್ನು ತಿಳಿಯಲು ಈ ಚಿತ್ರ ವಿಜ್ಞಾನಿಗಳಿಗೆ ಸಹಕಾರಿಯಾಗಿದೆ.