Indian Navy ;ಫ್ರಾನ್ಸ್‌ನಿಂದ 26 ರಫೇಲ್‌, 3 ಜಲಾಂತರ್ಗಾಮಿ ಖರೀದಿ?

ಹೊಸದಿಲ್ಲಿ: ಎಲ್ಲವೂ ಅಂದುಕೊಂಡಂತೆ ನಡೆದರೆ ಭಾರತವು ಶೀಘ್ರದಲ್ಲೇ ಫ್ರಾನ್ಸ್‌ನಿಂದ 26 ರಫೇಲ್‌ ಯುದ್ಧ ವಿಮಾನಗಳು ಹಾಗೂ ಮೂರು ಹೆಚ್ಚುವರಿ ಸ್ಕಾಪೀನ್‌ ದರ್ಜೆಯ ಜಲಾಂತರ್ಗಾಮಿಗಳನ್ನು ಖರೀದಿಸಲಿದೆ. ಜು. 14ರಿಂದ 16ರ ವರೆಗೆ ಪ್ರಧಾನಿ ನರೇಂದ್ರ ಮೋದಿಯವರು ಫ್ರಾನ್ಸ್‌ ಪ್ರವಾಸ ನಡೆಸಲಿದ್ದು, ಆಗ ಈ ಕುರಿತ ಒಪ್ಪಂದಕ್ಕೆ ಸಹಿ ಬೀಳುವ ಸಾಧ್ಯತೆಯಿದೆ.

ದೇಶದ ರಕ್ಷಣ ಪಡೆಗಳು ಈಗಾಗಲೇ ರಫೇಲ್‌ ಮತ್ತು ಜಲಾಂತರ್ಗಾಮಿಗಳಿಗೆ ಸಂಬಂಧಿಸಿದ ಪ್ರಸ್ತಾವನೆಗಳನ್ನು ರಕ್ಷಣ ಸಚಿವಾಲಯಕ್ಕೆ ಸಲ್ಲಿಸಿವೆ. ಅದಕ್ಕೆ ರಕ್ಷಣ ಖರೀದಿ ಮಂಡಳಿ ಸೋಮವಾರ ಒಪ್ಪಿಗೆಯನ್ನೂ ನೀಡಿದೆ. ಭಾರತ-ಫ್ರಾನ್ಸ್‌ ನಡುವಿನ ಈ ಒಪ್ಪಂದಕ್ಕೆ ಸಹಿ ಬಿದ್ದರೆ ನೌಕಾಪಡೆಗೆ 22 ಏಕ ಆಸನದ ರಫೇಲ್‌ ನೌಕಾ ವಿಮಾನಗಳ ಜತೆಗೆ ನಾಲ್ಕು ತರಬೇತಿ ವಿಮಾನಗಳು ದೊರೆಯಲಿವೆ.

ಅಲ್ಲದೆ ಪ್ರಾಜೆಕ್ಟ್ 75ನಡಿ ಮೂರು ಸ್ಕಾಪೀìನ್‌ ದರ್ಜೆಯ ಸಬ್‌ಮರೀನ್‌ಗಳನ್ನೂ ನೌಕಾಪಡೆ ಪಡೆಯಲಿದೆ. ಈ ಖರೀದಿ ವ್ಯವಹಾರದ ಒಟ್ಟು ಮೌಲ್ಯ 90 ಸಾವಿರ ಕೋಟಿ ರೂ.ಗಳಾಗಿದ್ದು, ಒಪ್ಪಂದ ಮಾತುಕತೆ ಪೂರ್ಣಗೊಂಡ ಬಳಿಕ ಸ್ಪಷ್ಟ ಚಿತ್ರಣ ಲಭ್ಯವಾಗಲಿದೆ ಎಂದು ಮೂಲಗಳು ತಿಳಿಸಿವೆ.