ಜ.15ಕ್ಕೆ ಸೇನೆಯ ಹೊಸ ಸಮವಸ್ತ್ರ ಅನಾವರಣ

ನವದೆಹಲಿ: ಭಾರತೀಯ ಸೇನೆಯ ಯೋಧರಿಗೆಂದು ತಯಾರಿಸಲಾಗಿರುವ ನೂತನ ಸಮವಸ್ತ್ರವನ್ನು ಸೇನಾ ದಿನವಾದ ಜ.15ರಂದು ಅನಾವರಣಗೊಳಿಸಲಾಗುವುದು. ನಂತರ ಹಂತ ಹಂತವಾಗಿ ಎಲ್ಲ ಯೋಧರಿಗೆ ವಿತರಿಸಲಾಗುವುದು.

ನೂತನ ಸಮವಸ್ತ್ರ ತಯಾರಿಕೆಗೆಂದು ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಆಫ್ ಫ್ಯಾಷನ್‌ ಟೆಕ್ನಾಲಜಿಯು 15 ಮರೆಮಾಚುವಂತಹ ವಿನ್ಯಾಸಗಳು, ನಾಲ್ಕು ಬಗೆಯ ಡಿಸೈನ್‌ಗಳು ಮತ್ತು ಎಂಟು ಬಗೆಯ ಬಟ್ಟೆಯ ಆಯ್ಕೆಯನ್ನು ಸೇನೆಗೆ ಕೊಟ್ಟಿತ್ತು. ಅದರಲ್ಲಿ ಸೇನೆ 4 ಮರೆಮಾಚುವಂತಹ ವಿನ್ಯಾಸಗಳು, 3 ಡಿಸೈನ್‌ ಮತ್ತು 5 ಬಟ್ಟೆ ಮಾದರಿಯನ್ನು ಆಯ್ಕೆ ಮಾಡಿತ್ತು. ಈ ಬಗೆಯ ಸಮವಸ್ತ್ರಗಳನ್ನು 150 ಯೋಧರಿಗೆ ತೊಡಿಸಿ, ಅವರಿಂದ ಪ್ರತಿಕ್ರಿಯೆ ಪಡೆದ ನಂತರ ಸಮವಸ್ತ್ರ ಮಾದರಿಯನ್ನು ಅಂತಿಮಗೊಳಿಸಲಾಗಿದೆ.

ಇದನ್ನೂ ಓದಿ:ಗೂಗಲ್‌ ಸಂಸ್ಥೆಯ ಜಿ-ಮೇಲ್‌ ಆ್ಯಪ್‌ ಸಾವಿರ ಕೋಟಿ ಡೌನ್‌ಲೋಡ್‌!

ಸಮವಸ್ತ್ರವನ್ನು ಹತ್ತಿ ಮತ್ತು ಪಾಲಿಸ್ಟರ್‌ನ್ನು 70:30 ಪ್ರಮಾಣದಲ್ಲಿ ಹಾಕಿ ತಯಾರಿಸಲಾಗಿದೆ. ಜಾಕೆಟ್‌ ಅನ್ನೂ ಒಳಗೊಂಡಿರುವ ಸಮವಸ್ತ್ರ ಕಡಿಮೆ ತೂಕದ್ದಾಗಿರಲಿದೆ. ಈಗಿನ ಸಮವಸ್ತ್ರ ಎಲ್ಲೆಡೆ ಸಿಗುವಂತೆ, ಈ ಸಮವಸ್ತ್ರ ಎಲ್ಲೆಡೆ ಸಿಗುವುದಿಲ್ಲ. ಎಲ್ಲ ಯೋಧರಿಗೆ ಸಮವಸ್ತ್ರ ವಿತರಿಸಲು 2 ವರ್ಷಗಳ ಕಾಲಾವಕಾಶ ಬೇಕಾಗಲಿದೆ ಎಂದೂ ಮಾಹಿತಿ ಕೊಡಲಾಗಿದೆ.