ಕಾಮನ್ವೆಲ್ತ್‌ ಗೇಮ್ಸ್‌  ವನಿತಾ ಟಿ20 ಭಾರತ-ಆಸ್ಟ್ರೇಲಿಯ ಮೊದಲ ಪಂದ್ಯ

ಬರ್ಮಿಂಗ್‌ಹ್ಯಾಮ್‌: ಮುಂದಿನ ವರ್ಷ ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆಯಲಿರುವ ಕಾಮನ್ವೆಲ್ತ್‌ ಗೇಮ್ಸ್‌ ವನಿತಾ ಟಿ20 ಕ್ರಿಕೆಟ್‌ ಪಂದ್ಯಾವಳಿಯ ವೇಳಾಪಟ್ಟಿಯನ್ನು ಇಸಿಬಿ ಬಿಡುಗಡೆ ಮಾಡಿದೆ.

ಜು. 29ರ ಆರಂಭಿಕ ಪಂದ್ಯದಲ್ಲಿ ಭಾರತ-ಆಸ್ಟ್ರೇಲಿಯ ಮುಖಾಮುಖಿ ಆಗಲಿವೆ. ಪಂದ್ಯಗಳೆಲ್ಲ ಎಜ್‌ಬಾಸ್ಟನ್‌ನಲ್ಲಿ ನಡೆಯಲಿವೆ. ಪದಕ ಸ್ಪರ್ಧೆಗಳು ಆ. 7ರಂದು ಇಲ್ಲಿಯೇ ಸಾಗಲಿವೆ.

ಭಾರತ-ಪಾಕಿಸ್ಥಾನ ಜು. 31ರಂದು ಮುಖಾಮುಖೀ ಆಗಲಿವೆ. ಆಸ್ಟ್ರೇಲಿಯ-ಪಾಕಿಸ್ಥಾನ ನಡುವಿನ ಪಂದ್ಯ  ಆ. 3ರಂದು ನಡೆಯಲಿದೆ. ಇಂಗ್ಲೆಂಡ್‌,  ನ್ಯೂಜಿಲ್ಯಾಂಡ್‌,  ದಕ್ಷಿಣ ಆಫ್ರಿಕಾ, ಬಾರ್ಬಡಾಸ್‌ ಹಾಗೂ ಒಂದು ಅರ್ಹತಾ ತಂಡ ಸೇರಿದಂತೆ ಒಟ್ಟು 8 ತಂಡಗಳು ಇಲ್ಲಿ ಸ್ಪರ್ಧಿಸಲಿವೆ.

1998ರ ಕೌಲಾಲಂಪುರ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಮೊದಲ ಸಲ ಕ್ರಿಕೆಟಿಗೆ ಅವಕಾಶ ಲಭಿಸಿತ್ತು. ಆದರೆ ಅದು ಪುರುಷರಿಗಷ್ಟೇ ಸೀಮಿತವಾಗಿತ್ತು. ಅವು ಲಿಸ್ಟ್‌ “ಎ’ ಮಾದರಿಯ ಪಂದ್ಯಗಳಾಗಿದ್ದವು.