ಹೊಸದಿಲ್ಲಿ: ಇನ್ನು ಮುಂದೆ ವಿಮಾನದಲ್ಲಿ ಕುಳಿತು ಎಗರಾಡಿದರೆ, ಅತಿರೇಕಿಗಳಾದರೆ, ಹುಚ್ಚಾಟ ನಡೆಸಿದರೆ ಆಜೀವ ಪರ್ಯಂತ ವಿಮಾನ ಹತ್ತುವ ಭಾಗ್ಯವನ್ನೇ ಕಳೆದುಕೊಳ್ಳುವ ಪರಿಸ್ಥಿತಿ ಬರಬಹುದು! ಹೌದು, ಕೇಂದ್ರ ಸರಕಾರ ಇದೇ ಮೊದಲ ಬಾರಿಗೆ ‘ನೋ-ಫ್ಲೈ’ ಪಟ್ಟಿ ಬಿಡುಗಡೆ ಮಾಡಿದ್ದು ವಿಮಾನದೊಳಗೆ ಕೋತಿಯಾಟ ಆಡುವವರನ್ನು ನಿರ್ಬಂಧಿಸುವ ನಿಯಮ ಮಾಡಿದೆ. ಮಹಾರಾಷ್ಟ್ರದ ಶಿವಸೇನಾ ಸಂಸದ ರವೀಂದ್ರ ಗಾಯಕ್ವಾಡ್‌, ಏರ್‌ಲೈನ್‌ ಸಿಬಂದಿಗೆ 25 ಬಾರಿ ಚಪ್ಪಲಿ ಯಿಂದ ಹೊಡೆದ ಪ್ರಕರಣದ ಅನಂತರ ವಿದೇಶಗಳಲ್ಲೂ ಇರುವ ಹಾಗೆ ನೋ-ಫ್ಲೈ ಪಟ್ಟಿ ರೂಪಿಸಲು ಒತ್ತಾಯ ಕೇಳಿಬಂದಿತ್ತು. ಈಗ ಡಿಜಿಸಿಎ ನಿಯಮ ರೂಪಿಸಿದ್ದು, ಕಡೇ ಪಕ್ಷ 3 ತಿಂಗಳಿಂದ ಆಜೀವ ಪರ್ಯಂತ ವಿಮಾನ ಹತ್ತದ ಶಿಕ್ಷೆ ಕೊಡಬಹುದಾಗಿದೆ.
ಹೇಗಿದೆ ನಿಯಮಾವಳಿ?
ಕೇಂದ್ರ ಸರಕಾರ ಶಿಕ್ಷೆ ಪ್ರಮಾಣವನ್ನು 3 ಭಾಗಗಳಲ್ಲಿ ವಿಂಗಡಿಸಿದೆ. ಅಂದರೆ, ಬೈಗುಳ, ದೈಹಿಕ ಹಲ್ಲೆ, ಜೀವ ಬೆದರಿಕೆ ಎಂದು ವಿಭಾಗ ಮಾಡಿದೆ.
ಬೈಗುಳಕ್ಕೆ 3 ತಿಂಗಳ ನಿರ್ಬಂಧ: ಅತಿರೇಕಿಗಳಾಗಿ ವರ್ತನೆ, ಸಿಬಂದಿಗೆ ಬಾಯಿಗೆ ಬಂದಂತೆ ಬಯ್ಯುವುದು, ಕುಡಿದು ಗಲಾಟೆ ಮಾಡಿದರೆ ಕನಿಷ್ಠ 3 ತಿಂಗಳ ವರೆಗೆ ವಿಮಾನ ಹತ್ತದಂತೆ ನಿರ್ಬಂಧ ಹೇರಬಹುದಾಗಿದೆ.
ದೈಹಿಕ ಹಲ್ಲೆಗೆ 6 ತಿಂಗಳ ನಿರ್ಬಂಧ: ವಿಮಾನದಲ್ಲಿನ ಸಿಬಂದಿಯನ್ನು ತಳ್ಳಾಡುವುದು, ಹೊಡೆಯುವುದು, ಹಲ್ಲೆ ಮಾಡುವುದು, ಮೈ ಮುಟ್ಟಿ ಅಸಭ್ಯವಾಗಿ ವರ್ತಿಸಿದರೆ ಆರು ತಿಂಗಳವರೆಗೆ ವಿಮಾನ ಯಾನ ಮಾಡದಂತೆ ನಿರ್ಬಂಧಿಸಬಹುದಾಗಿದೆ.
ಜೀವ ಬೆದರಿಕೆಗೆ ಆಜೀವ ನಿಷೇಧ: ವಿಮಾನದೊಳಗಿನ ವ್ಯವಸ್ಥೆ ಹಾಳು ಮಾಡುವುದು, ಸಿಬಂದಿಗೆ ಜೀವ ಬೆದರಿಕೆ ಹಾಕುವುದು ಮಾಡಿದರೆ ಕನಿಷ್ಠ 2 ವರ್ಷ ಅಥವಾ ಆಜೀವ ಪರ್ಯಂತ ನಿಷೇಧ ಹೇರಬಹುದಾಗಿದೆ.
ನಿರ್ಬಂಧ ಶಿಕ್ಷೆ ಹೇಗೆ ತೀರ್ಮಾನ?: ನಿವೃತ್ತ ಜಿಲ್ಲಾ ನ್ಯಾಯಾಧೀಶರೊಬ್ಬರ ನೇತೃತ್ವದ ಸಮಿತಿ ರಚಿಸಿ ಪ್ರಕರಣದ ವಿಚಾರಣೆ. ಸಮಿತಿ ಘಟನೆ ನಡೆದ ಒಂದು ತಿಂಗಳಲ್ಲಿ ವಿಚಾರಣೆ ಪೂರ್ಣಗೊಳಿಸಿ ಎಷ್ಟು ಸಮಯದವರೆಗೆ ನಿರ್ಬಂಧ ಹೇರಬಹುದು ಎಂದು ತೀರ್ಮಾನಿಸುತ್ತದೆ.
ವಿಮಾನದಲ್ಲಿ ಅನುಚಿತವಾಗಿ ವರ್ತಿಸುವವರಿಗೆ ನೋ-ಫ್ಲೈ ಪಟ್ಟಿಯಲ್ಲಿರುವ ನಿಯಮಗಳೇ ಅಲ್ಲ, ಇದರ ಜತೆ ಸದ್ಯ ಕಾನೂನಿನಲ್ಲಿ ಇರುವ ಇತರೆ ನಿಯಮಗಳ ಅಡಿಯಲ್ಲೂ ಕ್ರಮ ಕೈಗೊಳ್ಳಬಹುದು. ಇತರೆ ಪ್ರಯಾಣಿಕರ ಸುರಕ್ಷತೆಗಾಗಿ ಈ ಕ್ರಮ ಅನಿವಾರ್ಯ.
– ಅಶೋಕ್‌ ಗಜಪತಿ ರಾಜು, ವಿಮಾನಯಾನ ಸಚಿವ
