ಸಬ್ಸಿಡಿ ಸಹಿತ, ರಹಿತ ಸಿಲಿಂಡರ್‌ ದರ ಹೆಚ್ಚಳ

ನವದೆಹಲಿ: ಸಬ್ಸಿಡಿ ರಹಿತ ಅಡುಗೆ ಅನಿಲ ಸಿಲಿಂಡರ್‌ನ ದರ 93 ರೂ. ಮತ್ತು ಸಬ್ಸಿಡಿ ಸಹಿತ ಅಡುಗೆ ಅನಿಲ ಸಿಲಿಂಡರ್‌ (14.2 ಕೆಜಿ) 4.50 ರೂ.ನಷ್ಟು ಏರಿಕೆ ಮಾಡಲಾಗಿದೆ. ಮುಂದಿನ ವರ್ಷದ ಮಾರ್ಚ್‌ ಒಳಗಾಗಿ ಅಡುಗೆ ಅನಿಲ ಸಿಲಿಂಡರ್‌ ಸಬ್ಸಿಡಿ ತೆಗೆದು ಹಾಕಬೇಕೆಂದು ನಿರ್ಧರಿಸಿರುವ ಕೇಂದ್ರ ಸರ್ಕಾರ ತೈಲ ಕಂಪನಿಗಳಿಗೆ ಪ್ರತಿ ತಿಂಗಳು ದರ ಪರಿಷ್ಕರಣೆಯ ಆದೇಶ ನೀಡಿತ್ತು. 2016ರ ಜುಲೈನಿಂದ ಆರಂಭವಾಗಿರುವ ದರ ಏರಿಕೆ ಇದು 19ನೇಯದ್ದಾಗಿದೆ. 
 

ಸಬ್ಸಿಡಿ ರಹಿತ ಸಿಲಿಂಡರ್‌ನ ಬೆಲೆಯಲ್ಲಿ 93 ರೂ. ಏರಿಕೆಯಾಗಿರುವುದರಿಂದ ಬೆಲೆ 742 ರೂ.ಆಗಿದೆ. ಕಳೆದ ತಿಂಗಳ 1ರ ನಂತರ ಸಬ್ಸಿಡಿ ರಹಿತ ಸಿಲಿಂಡರ್‌ ಬೆಲೆಯಲ್ಲಿ 50 ರು. ಏರಿಕೆಯಾಗಿ ಅದರ ಬೆಲೆ ಪ್ರತಿ ಸಿಲಿಂಡರ್‌ಗೆ 649 ರೂ. ಆಗಿತ್ತು. ಸಬ್ಸಿಡಿ ಸಹಿತ ಇರುವ ಸಿಲಿಂಡರ್‌ ಬೆಲೆ 4.50 ರೂ.ಏರಿಕೆಯಾಗಿರುವುದರಿಂದ 495.69 ರೂ. ಆಗಲಿದೆ. ಆರಂಭದಲ್ಲಿ ಎಲ್‌ಪಿಜಿಗೆ 2 ರೂ. ಹೆಚ್ಚಳಕ್ಕೆ ನಿರ್ಧರಿಸಲಾಗಿತ್ತು. ಸರ್ಕಾರಿ ಸ್ವಾಮ್ಯದ ಮೂರು ತೈಲ ಕಂಪನಿಗಳಿಗೆ ದೇಶಾದ್ಯಂತ 18.11 ಕೋಟಿ ಮಂದಿ ಸಬ್ಸಿಡಿ ಸಹಿತ ಎಲ್‌ಪಿಜಿ ಸಿಲಿಂಡರ್‌ ಸೌಲಭ್ಯ ಪಡೆದುಕೊಳ್ಳುತ್ತಿದ್ದಾರೆ.