ಲಕ್ಷ ಮಂದಿ ಸೋಂಕು ಮುಕ್ತ; ರಾಜ್ಯದಲ್ಲಿ ಚೇತರಿಕೆ ಪ್ರಮಾಣ ಹೆಚ್ಚಳ

ಬೆಂಗಳೂರು: ರಾಜ್ಯದಲ್ಲಿ ಕೋವಿಡ್ ಸೋಂಕಿನಿಂದ ಚೇತರಿಸಿಕೊಂಡವರ ಸಂಖ್ಯೆ ಒಂದು ಲಕ್ಷದ ಗಡಿ ದಾಟಿದೆ. ಮಂಗಳವಾರ 6,257 ಮಂದಿಯಲ್ಲಿ ಸೋಂಕು ಪತ್ತೆಯಾಗಿದ್ದರೆ, 6,473 ಮಂದಿ ಗುಣ ಹೊಂದಿದ್ದಾರೆ. 86 ಮಂದಿ ಚಿಕಿತ್ಸೆ ಫ‌ಲಕಾರಿಯಾಗದೆ ಮೃತಪಟ್ಟಿದ್ದಾರೆ.

ರಾಜ್ಯದ ಒಟ್ಟು ಸೋಂಕು ಪ್ರಕರಣಗಳು 1,88,611ಕ್ಕೆ, ಮೃತ ಪಟ್ಟವರ ಸಂಖ್ಯೆ 3,398ಕ್ಕೆ, ಚೇತರಿಸಿಕೊಂಡವರ ಸಂಖ್ಯೆ 1,05,599ಕ್ಕೆ ಏರಿದೆ. ಸದ್ಯ 79,606 ಸೋಂಕು ಪೀಡಿತರು ಆಸ್ಪತ್ರೆ, ಕೊರೊನಾ ಕೇರ್‌ ಸೆಂಟರ್‌ ಮತ್ತು ಮನೆಗಳಲ್ಲಿ ಚಿಕಿತ್ಸೆ, ಆರೈಕೆಯಲ್ಲಿದ್ದಾರೆ. ಆಸ್ಪತ್ರೆ ಯಲ್ಲಿರುವವರ ಪೈಕಿ 699 ಮಂದಿಯ ಆರೋಗ್ಯ ಗಂಭೀರವಾಗಿದ್ದು, ತುರ್ತುನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಆಗಸ್ಟ್‌ ಬಳಿಕ ಅಧಿಕ ಚೇತರಿಕೆ
ಗುಣಮುಖರಾದ ಒಂದು ಲಕ್ಷ ಮಂದಿಯಲ್ಲಿ ಅರ್ಧದಷ್ಟು ಆಗಸ್ಟ್‌ನಿಂದೀಚೆಗೆ ಸೋಂಕಿನಿಂದ ಮುಕ್ತರಾಗಿದ್ದಾರೆ. ಜುಲೈ 31ಕ್ಕೆ ಗುಣಮುಖರ ಸಂಖ್ಯೆ 49 ಸಾವಿರ ಇತ್ತು. ಆ ಬಳಿಕ ಹೊಸ ಸೋಂಕಿನಷ್ಟೇ ಗುಣ ಹೊಂದುವವರ ಪ್ರಮಾಣವು ಹೆಚ್ಚಿದೆ.

ಪರೀಕ್ಷೆ ಹೆಚ್ಚಳ
ಸೋಮವಾರ 4,267ಕ್ಕೆ ಕುಸಿ ದಿದ್ದ ಸೋಂಕು ಪ್ರಕರಣಗಳ ಸಂಖ್ಯೆ ಮಂಗಳವಾರ ಮತ್ತೆ 6 ಸಾವಿರಕ್ಕೆ ಏರಿದೆ. ಇದಕ್ಕೆ ಪರೀಕ್ಷೆಯ ಹೆಚ್ಚಳ ಕಾರಣ. ಸೋಮವಾರ 22,620 ಪರೀಕ್ಷೆಗಳು ನಡೆದಿದ್ದರೆ ಮಂಗಳವಾರ ಒಟ್ಟು 43,924 ಪರೀಕ್ಷೆಗಳು ನಡೆದಿವೆ.

ಸ್ಥಿತಿಗತಿಯ ಪಕ್ಷಿನೋಟ
ಗುಣಮುಖ ಶೇ.56
ಸಕ್ರಿಯ ಶೇ.42.2
ಮೃತ ಶೇ.1.8