ಮೋದಿ ಸರಕಾರದಲ್ಲಿ ಸಾಲದ ಮೊತ್ತ ಶೇ. 49ರಷ್ಟು ಹೆಚ್ಚಳ

ಹೊಸದಿಲ್ಲಿ: ಕಳೆದ ನಾಲ್ಕೂವರೆ ವರ್ಷಗಳಲ್ಲಿ ದೇಶದ ಒಟ್ಟು ಸಾಲದ ಪ್ರಮಾಣ ಶೇ. 49ರಷ್ಟು ಏರಿಕೆಯಾಗಿದ್ದು, 82 ಲಕ್ಷ ಕೋಟಿ ರೂ.ಗೆ ಹೆಚ್ಚಳವಾಗಿದೆ. ಸರಕಾರಿ ಸಾಲದ ಬಗೆಗಿನ ಸ್ಥಿತಿಗತಿ ವರದಿಯಲ್ಲಿ ಈ ದತ್ತಾಂಶ ನೀಡಲಾಗಿದೆ. 

2018ರ ಸೆಪ್ಟಂಬರ್‌ವರೆಗಿನ ಒಟ್ಟು ಸಾಲದ ಪ್ರಮಾಣ 82,03,253 ಕೋಟಿ ರೂ. ಆಗಿದೆ. ಜೂನ್‌ 2014ರ ವರೆಗೆ ಕೇಂದ್ರ ಸರಕಾರದ ಒಟ್ಟು ಸಾಲದ ಪ್ರಮಾಣವು 54,90,763 ಕೋಟಿ ರೂ. ಆಗಿತ್ತು. 

ಸಾರ್ವಜನಿಕ ಸಾಲದ ವಿಭಾಗದಲ್ಲಿ ಸಾಲದ ಪ್ರಮಾಣ ಶೇ. 51.7 ಆಗಿದ್ದು, ಈ ನಾಲ್ಕೂವರೆ ವರ್ಷಗಳಲ್ಲಿ 48 ಲಕ್ಷ ಕೋಟಿ ರೂ.ಗಳಿಂದ 73 ಲಕ್ಷ ಕೋಟಿ ರೂ. ಆಗಿದೆ. ಇದೇ ರೀತಿ ಮಾರುಕಟ್ಟೆ ಸಾಲಗಳ ಮೇಲಿನ ಅವಲಂಬನೆಯೂ ಇದೇ ಪ್ರಮಾಣದಲ್ಲಿ ಏರಿಕೆ ಕಂಡಿದ್ದು, ಶೇ. 47.5 ಏರಿದೆ. ಈ ಅವಧಿಯಲ್ಲಿ ಇದು 52 ಲಕ್ಷ ಕೋಟಿ ರೂ. ಆಗಿದೆ. ಆದರೆ ಚಿನ್ನದ ಬಾಂಡ್‌ಗಳ ಮೂಲಕ ಸಂಗ್ರಹಿಸಿದ ಸಾಲದ ಪ್ರಮಾಣವು 2014ರ ಜೂನ್‌ ವೇಳೆಗೆ ಶೂನ್ಯವಾಗಿದ್ದು, ಈಗ ಇದು 9,089 ಕೋಟಿ ರೂ. ಆಗಿದೆ. 2010-11ರಿಂದಲೂ ಕೇಂದ್ರ ವಿತ್ತ ಸಚಿವಾಲಯವು ಸರಕಾರದ ಸಾಲದ ಪ್ರಮಾಣದ ಕುರಿತು ಸ್ಥಿತಿಗತಿ ವರದಿಯನ್ನು ಸಲ್ಲಿಸುತ್ತಿದೆ.