ಬಜೆಟ್‌ನಲ್ಲಿ ಭಾರತದ ವಿತ್ತೀಯ ಕೊರತೆ ನಿಗದಿ: ಐಎಂಎಂಫ್ ಸ್ವಾಗತ

ವಾಷಿಂಗ್ಟನ್‌: ಭಾರತ ಈ ಬಾರಿ ತನ್ನ ವಾರ್ಷಿಕ ಬಜೆಟ್‌ನಲ್ಲಿ ವಿತ್ತೀಯ ಕೊರತೆ ಗುರಿ ನಿಗದಿಸಿರುವುದನ್ನು ಐಎಂಎಫ್ (ಅಂತಾರಾಷ್ಟ್ರೀಯ ಹಣಕಾಸು ನಿಧಿ) ಸ್ವಾಗತಿಸಿದೆ. ಭಾರತವು ನಿಧಾನವಾಗಿ ಆದರೆ ನಿಶ್ಚಿತವಾಗಿ ವಿತ್ತೀಯ ದೃಢತೆಯನ್ನು ಕಾಣುವ ಪಥದಲ್ಲಿ ಸಾಗುತ್ತಿದೆ ಎಂದು ಐಎಂಎಫ್ ಹೇಳಿದೆ.

2019ರ ಹಣಕಾಸುವರ್ಷದಲ್ಲಿ ಭಾರತ ತನ್ನ ವಿತ್ತೀಯ ಗುರಿಯನ್ನು ಜಿಡಿಪಿಯ ಶೇ.3.3ಕ್ಕೆ ನಿಗದಿಸಿರುವುದು ಸ್ವಾಗತಾರ್ಹವಾಗಿದೆ. ಆ ಮೂಲಕ ಅದು ವಿತ್ತೀಯ ದೃಢತೆಯನ್ನು ಕಾಣುವ ಪಥದಲ್ಲಿ ಸಾಗುತ್ತಿರುವುದು ಸ್ಪಷ್ಟವಿದೆ. ಅದೇ ವೇಳೆ ಭಾರತ ಸರಕಾರ ಶೈಶವದಲ್ಲಿರುವ ತನ್ನ ಆರ್ಥಿಕ ಪ್ರಗತಿಗೆ ಅಗತ್ಯವಿರುವ ಬೆಂಬಲವನ್ನು ನೀಡುವ ಸಂಕಲ್ಪವನ್ನೂ ಹೊಂದಿರುವುದು ಗಮನಾರ್ಹವಾಗಿದೆ ಎಂದು ಐಎಂಎಫ್ನ ಸಂಪರ್ಕ ವಿಭಾಗದ ನಿರ್ದೇಶಕರಾಗಿರುವ ಗೆರಿ ರೈಸ್‌ ಅವರು ಮಾಧ್ಯಮವನ್ನುದ್ದೇಶಿಸಿ ಮಾಡಿದ ಪಾಕ್ಷಿಕ ಸುದ್ದಿಗೋಷ್ಠಿಯಲ್ಲಿ ಹೇಳಿದರು. 

ಭಾರತದ ಬಜೆಟ್‌ ವಿತ್ತೀಯ ಕೊರತೆಯನ್ನು 2017ರಿಂದ 2018ರ ವರೆಗಿನ ಅವಧಿಗೆ ನಮ್ಮ ನಿರೀಕ್ಷೆಗಿಂತಲೂ ಸಣ್ಣ ಮಟ್ಟದಲ್ಲಿ ನಿಗದಿ ಮಾಡಿರುವುದು ಶ್ಲಾಘನೀಯವಾಗಿದೆ ಎಂದು ಐಎಂಎಫ್ ಹೇಳಿದೆ.