ಬೆಸ್ಕಾಂ ಮಿತ್ರ ಬಳಸಿದರೆ ಸೇವಾಶುಲ್ಕ ವಿನಾಯ್ತಿಗೆ ಚಿಂತನೆ

ಬೆಂಗಳೂರು: ವಿದ್ಯುತ್‌ ಸಂಬಂಧಿ ಸೇವೆಗಳನ್ನು ಆನ್‌ಲೈನ್‌ನಲ್ಲಿ ನೀಡುವ “ಬೆಸ್ಕಾಂ ಮಿತ್ರ’ ಮೊಬೈಲ್‌ ಆ್ಯಪ್‌ನ್ನು ಗ್ರಾಹಕರು ಇನ್ನಷ್ಟು ಹೆಚ್ಚಿನ ಪ್ರಮಾ ಣ ದಲ್ಲಿ ಉತ್ತೇಜಿಸುವ ನಿಟ್ಟಿನಿಂದ ಇದೀಗ ಆನ್‌ಲೈನ್‌ ಸೇವಾ ಶುಲ್ಕ ವಿನಾಯ್ತಿ ನೀಡಲು ಬೆಸ್ಕಾಂ ಚಿಂತಿಸಿದೆ.

ಈ ಆ್ಯಪ್‌ನ್ನು 17 ದಿನಗಳಲ್ಲಿ 37,000ಕ್ಕೂ ಹೆಚ್ಚು ಮಂದಿ ಡೌನ್‌ಲೋಡ್‌ ಮಾಡಿಕೊಂಡಿದ್ದಾರೆ. ಮೊಬೈಲ್‌ ಆ್ಯಪ್‌ ಮೂಲಕ ತನ್ನ ಗ್ರಾಹಕರಿಗೆ ಇನ್ನಷ್ಟು ಹೆಚ್ಚುವರಿ ಸೇವೆಗಳನ್ನು ನೀಡುವ ಉದ್ದೇಶ ಹೊಂದಿರುವ ಬೆಸ್ಕಾಂ, ಫೇಸ್‌ಬುಕ್‌, ಟ್ವಿಟರ್‌ನಲ್ಲಿ ಸಲ್ಲಿಕೆಯಾಗುವ ದೂರುಗಳಿಗೂ “ಸೆಂಟಿಮೆಂಟ್‌ ಅನಾಲಿಸಿಸ್‌’ ಮೂಲಕ ಸ್ಪಂದಿಸುವ ವ್ಯವಸ್ಥೆ ಕಲ್ಪಿಸಲು ಪ್ರಯತ್ನ ನಡೆಸಿದೆ.

ರಾಜ್ಯದಲ್ಲಿ ಬಳಕೆಯಾಗುವ ವಿದ್ಯುತ್‌ನಲ್ಲಿ 45%ರಷ್ಟು ವಿದ್ಯುತ್‌ ಬೆಸ್ಕಾಂ ವ್ಯಾಪ್ತಿಯಲ್ಲೇ ಬಳಕೆಯಾಗುತ್ತದೆ. ಅಲ್ಲದೇ 1.04 ಕೋಟಿ ಗ್ರಾಹಕರು ಬೆಸ್ಕಾಂ ವ್ಯಾಪ್ತಿಯಲ್ಲಿದ್ದಾರೆ.ಬೆಂಗಳೂರು ನಗರದಲ್ಲೇ ಹೆಚ್ಚಿನ ಸಂಖ್ಯೆ ಗ್ರಾಹಕರಿದ್ದು, ಬಳಕೆಯೂ ಹೆಚ್ಚಾಗಿದೆ. ಆ ಹಿನ್ನೆಲೆಯಲ್ಲಿ ಗ್ರಾಹಕರ ಅನುಕೂಲಕ್ಕಾಗಿ ಡಿ.20ರಂದು “ಬೆಸ್ಕಾಂ ಮಿತ್ರ’ ಮೊಬೈಲ್‌ ಆ್ಯಪ್‌ಗೆ ಚಾಲನೆ ನೀಡಲಾಗಿದೆ.

ಆನ್‌ಲೈನ್‌ನಲ್ಲೇ ದೂರು ಸಲ್ಲಿಕೆ ಸೇರಿದಂತೆ ಬಿಲ್‌ಪಾವತಿವರೆಗೆ ಅಂಗೈಯಲ್ಲೇ ಕಾರ್ಯ ನಿರ್ವಹಿಸಬಹುದಾಗಿದ್ದು, ಬಿಲ್‌ ಪಾವತಿಗೆ ಏಳು ದಿನ ಬಾಕಿ ಇರುವಾಗ ಆ್ಯಪ್‌ ಬಳಕೆದಾರರಿಗೆ ಎಸ್‌ಎಂಎಸ್‌ ಸಂದೇಶ ರವಾನೆ ಸೇವೆಯೂ ಆರಂಭವಾಗಿದೆ. ವಿದ್ಯುತ್‌ ಬಳಕೆ ಕುರಿತ ಸಂರ್ಪೂ ಮಾಹಿತಿ ಇದರಲ್ಲೇ ದೊರೆಯಲಿದೆ.

37,000 ಡೌನ್‌ಲೋಡ್‌: ಈವರೆಗೆ 37,000ಕ್ಕೂ ಹೆಚ್ಚು ಮಂದಿ ಆ್ಯಪ್‌ ಡೌನ್‌ಲೋಡ್‌ ಮಾಡಿದ್ದು, ಆ ಪೈಕಿ ನಾಲ್ಕು ಸಾವಿರಕ್ಕೂ ಹೆಚ್ಚು ಗ್ರಾಹಕರು ಮೊಬೈಲ್‌ ಆ್ಯಪ್‌ನಲ್ಲಿ ಬಿಲ್‌ ಪಾವತಿಸಿದ್ದಾರೆ. ಇದರಿಂದ 64 ಲಕ್ಷ ರೂ. ಸಂಗ್ರಹವಾಗಿದೆ. ಬೆಂಗಳೂರು ನಗರದಲ್ಲೇ ಅತಿ ಹೆಚ್ಚು ಮಂದಿ ಡೌನ್‌ಲೋಡ್‌ ಮಾಡಿದ್ದು, ಇತ್ತೀಚಿನ ಮಾಹಿತಿ ಪ್ರಕಾರ 21,755ಕ್ಕೂ ಹೆಚ್ಚು ಮಂದಿ ಬಳಸುತ್ತಿದ್ದಾರೆ. ಗ್ರಾಹಕರು ಹೆಚ್ಚಾಗಿ ಬಳಸುವಂತೆ ಪ್ರೇರಣೆ ನೀಡಲು ಆ್ಯಪ್‌ನಲ್ಲೇ ಇನ್ನಷ್ಟು ಸೇವೆಗಳನ್ನು ಕಲ್ಪಿಸಲು ಬೆಸ್ಕಾಂ ಸಿದ್ಧತೆ ನಡೆಸಿದೆ.

ಸೆಂಟಿಮೆಂಟ್‌ ಅನಾಲಿಸಿಸ್‌: ಬೆಸ್ಕಾಂ ಸೇವೆಗೆ ಸಂಬಂಧಪಟ್ಟಂತೆ ದೂರು ಸಲ್ಲಿಸಲು ಸಹಾಯವಾಣಿ, ಮೊಬೈಲ್‌ ಆ್ಯಪ್‌ ಇದ್ದರೂ ಸಾಮಾಜಿಕ ಜಾಲತಾಣಗಳಲ್ಲೂ ಸಾಕಷ್ಟು ದೂರುಗಳು ಸಲ್ಲಿಕೆಯಾಗುತ್ತವೆ. ಫೇಸ್‌ಬುಕ್‌, ಟ್ವಿಟರ್‌ಗಳಲ್ಲಿ ಸಾಕಷ್ಟು ಮಂದಿ ಸಮಸ್ಯೆ ಉಲ್ಲೇಖೀಸುವುದರಿಂದ ಸಂಸ್ಥೆಯ ಕಾರ್ಯ ನಿರ್ವಹಣೆ ಬಗ್ಗೆಯೂ ಕೆಟ್ಟ ಸಂದೇಶ ರವಾನೆಯಾಗಲಿದೆ. ಇದನ್ನು ತಡೆಗಟ್ಟಲು ಫೇಸ್‌ಬುಕ್‌, ಟ್ವಿಟರ್‌ನಲ್ಲಿ ಸಲ್ಲಿಕೆಯಾಗುವ ದೂರುಗಳನ್ನು “ಸೆಂಟಿಮೆಂಟ್‌ ಅನಾಲಿಸಿಸ್‌’ನಡಿ ಪರಿಶೀಲಿಸಿ ಸಂಬಂಧಪಟ್ಟವರಿಗೆ ಮಾಹಿತಿ ರವಾನಿಸಿ ಸಮಸ್ಯೆ ನಿವಾರಣೆಗೆ ಕ್ರಮ ಕೈಗೊಳ್ಳುವ ವ್ಯವಸ್ಥೆಯನ್ನೂ ಸಂಸ್ಥೆ ರೂಪಿಸುತ್ತಿದೆ.

ಆನ್‌ಲೈನ್‌ ಸೇವಾ ಶುಲ್ಕ ವಿನಾಯ್ತಿ?: ಗ್ರಾಹಕರು ಮೊಬೈಲ್‌ ಆ್ಯಪ್‌ ಮೂಲಕವೇ ಆನ್‌ಲೈನ್‌ನಲ್ಲಿ ಬೆಸ್ಕಾಂ ಬಿಲ್‌ ಪಾವತಿಸಿದಾಗ ಬ್ಯಾಂಕ್‌ಗಳು ಇಂತಿಷ್ಟು ಆನ್‌ಲೈನ್‌ ಸೇವಾ ಶುಲ್ಕ ವಿಧಿಸುತ್ತವೆ. ಹಾಗಾಗಿ ಆನ್‌ಲೈನ್‌ ಸೇವಾ ಶುಲ್ಕ ವಿನಾಯ್ತಿ ನೀಡುವ ಸಂಬಂಧ ಪ್ರತಿಷ್ಠಿತ ಬ್ಯಾಂಕ್‌ಗಳೊಂದಿಗೆ ಮಾತುಕತೆ ನಡೆಸಲು ಬೆಸ್ಕಾಂ ಚಿಂತನೆ ನಡೆಸಿದೆ. ಮಾತುಕತೆಗೂ ಸಿದ್ಧತೆ ನಡೆದಿದೆ ಎಂದು ಮೂಲಗಳು ತಿಳಿಸಿವೆ.

* ಎಂ. ಕೀರ್ತಿಪ್ರಸಾದ್‌