ICC ವಿಶ್ವಕಪ್‌ ಅರ್ಹತಾ ಕೂಟ: ವೆಸ್ಟ್‌ ಇಂಡೀಸ್‌ಗೆ ಭರ್ಜರಿ ಗೆಲುವು

ಹರಾರೆ: ಐಸಿಸಿ ವಿಶ್ವಕಪ್‌ ಅರ್ಹತಾ ಕೂಟದ ಗುರುವಾರದ ಪಂದ್ಯದಲ್ಲಿ ವೆಸ್ಟ್‌ಇಂಡೀಸ್‌ ತಂಡವು ನೇಪಾಲ ತಂಡವನ್ನು 101 ರನ್ನು ಗಳಿಂದ ಭರ್ಜರಿಯಾಗಿ ಸೋಲಿಸಿದೆ. “ಎ’ ಬಣದಲ್ಲಿರುವ ವೆಸ್ಟ್‌ಇಂಡೀಸ್‌ಗೆ ಇದು ಎರಡನೇ ಗೆಲುವು ಆಗಿದೆ.

ಶೈ ಹೋಪ್‌ ಮತ್ತು ನಿಕೋಲಾಸ್‌ ಪೂರಣ್‌ ಅವರ ಆಕರ್ಷಕ ಶತಕದ ನೆರವಿನಿಂದ ವೆಸ್ಟ್‌ಇಂಡೀಸ್‌ ತಂಡವು 7 ವಿಕೆಟಿಗೆ 339 ರನ್ನುಗಳ ಬೃಹತ್‌ ಮೊತ್ತ ಪೇರಿಸಿತು. ಇದಕ್ಕುತ್ತರವಾಗಿ ನೇಪಾಲ ತಂಡವು 49.4 ಓವರ್‌ಗಳಲ್ಲಿ 238 ರನ್ನಿಗೆ ಆಲೌಟಾಗಿ ಸೋಲನ್ನು ಒಪ್ಪಿಕೊಂಡಿತು.

55 ರನ್ನಿಗೆ ಮೂರು ವಿಕೆಟ್‌ ಕಳೆದುಕೊಂಡ ವೇಳೆ ಕ್ರೀಸ್‌ಗೆ ಆಗಮಿಸಿದ ಪೂರಣ್‌ ಅವರು ಹೋಪ್‌ ಜತೆಗೂಡಿ ನಾಲ್ಕನೇ ವಿಕೆಟಿಗೆ 216 ರನ್ನುಗಳ ಜತೆಯಾಟ ನಡೆಸಿದರು. ಈ ವೇಳೆ ಇಬ್ಬರಿಂದಲೂ ಶತಕ ದಾಖಲಾದವು. ಹೋಪ್‌ 132 ರನ್‌ ಗಳಿಸಿದ್ದರೆ ಪೂರಣ್‌ 115 ರನ್‌ ಹೊಡೆದರು.

ನೆದರ್ಲೆಂಡ್ಸ್‌ಗೆ ಜಯ
ದಿನದ ಇನ್ನೊಂದು ಪಂದ್ಯದಲ್ಲಿ ನೆದರ್ಲೆಂಡ್ಸ್‌ ತಂಡವು ಅಮೆರಿಕ ತಂಡವನ್ನು 5 ವಿಕೆಟ್‌ಗಳಿಂದ ಸೋಲಿಸಿದೆ. ಮೊದಲು ಬ್ಯಾಟಿಂಗ್‌ ನಡೆಸಿದ ಅಮೆರಿಕ ತಂಡವು 8 ವಿಕೆಟಿಗೆ 211 ರನ್‌ ಗಳಿಸಿದ್ದರೆ ನೇಪಾಲ ತಂಡವು 43.2 ಓವರ್‌ಗಳಲ್ಲಿ 5 ವಿಕೆಟಿಗೆ 214 ರನ್‌ ಬಾರಿಸಿ ಜಯ ಸಾಧಿಸಿತು.