Advertisement
ಮೊದಲು ಬ್ಯಾಟಿಂಗ್‌ ನಡೆಸಿದ ಭಾರತ ಮೂರೇ ವಿಕೆಟಿಗೆ 302 ರನ್‌ ಪೇರಿಸಿದರೆ, ದಕ್ಷಿಣ ಆಫ್ರಿಕಾ 30.5 ಓವರ್‌ಗಳಲ್ಲಿ 124ಕ್ಕೆ ಆಲೌಟ್‌ ಆಯಿತು. ಪೂನಂ ಯಾದವ್‌ 4 ವಿಕೆಟ್‌, ರಾಜೇಶ್ವರಿ ಗಾಯಕ್ವಾಡ್‌ ಮತ್ತು ದೀಪ್ತಿ ಶರ್ಮ ತಲಾ 2 ವಿಕೆಟ್‌ ಕಿತ್ತರು.
ಆರಂಭಿಕ ಆಟಗಾರ್ತಿ ಸ್ಮತಿ ಮಂಧನಾ ಅವರ 3ನೇ ಶತಕ ಹಾಗೂ ಜೀವನಶ್ರೇಷ್ಠ ಬ್ಯಾಟಿಂಗ್‌, ಹರ್ಮನ್‌ಪ್ರೀತ್‌ ಕೌರ್‌ ಮತ್ತು ವೇದಾ ಕೃಷ್ಣಮೂರ್ತಿ ಅವರ ಅರ್ಧ ಶತಕದಾಟ ಭಾರತದ ಸರದಿಯ ಆಕರ್ಷಣೆಯಾಗಿತ್ತು. ಬೌಲಿಂಗ್‌ ವೇಳೆ ಒಂದೇ ವಿಕೆಟ್‌ ಕಿತ್ತರೂ ಅನುಭವಿ ಜೂಲನ್‌ ಗೋಸ್ವಾಮಿ ಇತಿಹಾಸವನ್ನೇ ಬರೆದರು. ಏಕದಿನ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ 200 ವಿಕೆಟ್‌ ಉರುಳಿಸಿದ ವಿಶ್ವದ ಮೊದಲ ಬೌಲರ್‌ ಎಂಬ ಹಿರಿಮೆಗೆ ಪಾತ್ರರಾದರು. ಮೊದಲ ಪಂದ್ಯದಲ್ಲಿ 84 ರನ್‌ ಬಾರಿಸಿ ಮಿಂಚಿದ್ದ ಮಂಧನಾ, ಬುಧವಾರದ ಮುಖಾಮುಖೀಯಲ್ಲಿ 135 ರನ್‌ ಬಾರಿಸಿ ಕಿಂಬರ್ಲಿಯ “ಡೈಮಂಡ್‌ ಓವಲ್‌’ನಲ್ಲಿ ಮೆರೆದಾಡಿದರು. ಇದು 34ನೇ ಏಕದಿನ ಪಂದ್ಯದಲ್ಲಿ ಮಂಧನಾ ಹೊಡೆದ 3ನೇ ಶತಕ. 129 ಎಸಡೆತಗಳಿಗೆ ಜವಾಬಿತ್ತ 21ರ ಹರೆಯದ ಈ ಎಡಗೈ ಆಟಗಾರ್ತಿ, 14 ಬೌಂಡರಿ ಹಾಗೂ ಒಂದು ಸಿಕ್ಸರ್‌ ಎತ್ತಿದರು. ಹರ್ಮನ್‌ಪ್ರೀತ್‌ ಅಜೇಯ 55 ರನ್‌, ವೇದಾ ಅಜೇಯ 51 ರನ್‌ ಮಾಡಿ ಭಾರತದ ಮೊತ್ತವನ್ನು ಮುನ್ನೂರರ ಗಡಿ ದಾಟಿಸಿದರು.
Related Articles
ಮಂಧನಾ ಮತ್ತು ಪೂನಂ ರಾವತ್‌ ಮೊದಲ ವಿಕೆಟಿಗೆ 12.3 ಓವರ್‌ಗಳಿಂದ 56 ರನ್‌ ಒಟ್ಟುಗೂಡಿಸಿದರು. ಬಳಿಕ ಮಂಧನಾ-ಮಿಥಾಲಿ (20) 2ನೇ ವಿಕೆಟಿಗೆ 51 ರನ್‌ ಪೇರಿಸಿದರು.
Advertisement
3ನೇ ವಿಕೆಟಿಗೆ ಜತೆಗೂಡಿದ ಮಂಧನಾ-ಹರ್ಮನ್‌ಪ್ರೀತ್‌ 134 ಪೇರಿಸಿ ಹರಿಣಗಳ ದಾಳಿಯನ್ನು ಲೆಕ್ಕಕ್ಕಿಲ್ಲದಂತೆ ಮಾಡಿದರು. ಬಳಿಕ ಹರ್ಮನ್‌ಪ್ರೀತ್‌-ವೇದಾ ಜೋಡಿಯಿಂದ ಮುರಿಯದ 4ನೇ ವಿಕೆಟಿಗೆ 61 ರನ್‌ ಒಟ್ಟುಗೂಡಿತು.ಹರ್ಮನ್‌ಪ್ರೀತ್‌ ಅವರ 55 ರನ್‌ 69 ಎಸೆತಗಳಿಂದ ಬಂತು (2 ಬೌಂಡರಿ, 1 ಸಿಕ್ಸರ್‌). ಇದು ಅವರ 11ನೇ ಅರ್ಧ ಶತಕ. ಕರ್ನಾಟಕದ ವೇದಾ ಕೃಷ್ಣಮೂರ್ತಿ 33 ಎಸೆತಗಳಿಂದ 51 ರನ್‌ ಹೊಡೆದು 7ನೇ ಅರ್ಧ ಶತಕ ಪೂರೈಸಿದರು. ಇದರಲ್ಲಿ 6 ಬೌಂಡರಿ ಹಾಗೂ ಒಂದು ಸಿಕ್ಸರ್‌ ಸೇರಿತ್ತು.
ಸರಣಿಯ 3ನೇ ಹಾಗೂ ಅಂತಿಮ ಪಂದ್ಯ ಫೆ. 10ರಂದು ಪೊಚೆಫ್ಸೂóಮ್‌ನಲ್ಲಿ ನಡೆಯಲಿದೆ.
ಸಂಕ್ಷಿಪ್ತ ಸ್ಕೋರ್‌: ಭಾರತ-3 ವಿಕೆಟಿಗೆ 302 (ಮಂಧನಾ 135, ಹರ್ಮನ್‌ಪ್ರೀತ್‌ ಅಜೇಯ 55, ವೇದಾ ಅಜೇಯ 51, ಲುಯಿಸ್‌ 31ಕ್ಕೆ 1, ಎಂಟೊಜೇಕ್‌ 63ಕ್ಕೆ 1, ಕ್ಲಾಸ್‌ 65ಕ್ಕೆ 1). ದಕ್ಷಿಣ ಆಫ್ರಿಕಾ-30.5 ಓವರ್‌ಗಳಲ್ಲಿ 124 (ಲೀ 73, ಕಾಪ್‌ 17, ಪೂನಂ 24ಕ್ಕೆ 4, ರಾಜೇಶ್ವರಿ 14ಕ್ಕೆ 2, ದೀಪ್ತಿ 34ಕ್ಕೆ 2, ಜೂಲನ್‌ 29ಕ್ಕೆ 1).