ಫಿಕ್ಸಿಂಗ್‌ ಬಗ್ಗೆ ಐಸಿಸಿಗೆ ನಿರಾಸಕ್ತಿ: ಅಲ್‌ಜಜೀರಾ ಆಕ್ರೋಶ

ಕತಾರ್‌: ಇತ್ತೀಚೆಗೆ ಸ್ಪಾಟ್‌ಫಿಕ್ಸಿಂಗ್‌ ಕುರಿತು ಸತತವಾಗಿ ವರದಿ ಮಾಡಿ ಸುದ್ದಿಯಲ್ಲಿರುವ ಕತಾರ್‌ ಮೂಲದ ಸುದ್ದಿವಾಹಿನಿ “ಅಲ್‌ಜಜೀರಾ’ ಈಗ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಂಸ್ಥೆ ವಿರುದ್ಧ ಹರಿಹಾಯ್ದಿದೆ. ಐಸಿಸಿ ಮತ್ತು ಕೆಲವು ರಾಷ್ಟ್ರೀಯ ಕ್ರಿಕೆಟ್‌ ಸಂಸ್ಥೆಗಳಿಗೆ ಮ್ಯಾಚ್‌ ಫಿಕ್ಸಿಂಗ್‌ ಸಮಸ್ಯೆಯನ್ನು ನಿರ್ನಾಮ ಮಾಡಲು ಮನಸ್ಸಿಲ್ಲ. ಆದ್ದರಿಂದ ತಪ್ಪಿತಸ್ಥನೆಂದು ಕಂಡುಬರುವ ಯಾವುದೇ ವ್ಯಕ್ತಿಗೆ ಅವು ಕೂಡಲೇ ಕ್ಲೀನ್‌ಚಿಟ್‌ ನೀಡುತ್ತವೆ ಎಂದು ಹೇಳಿದೆ. 

ಮ್ಯಾಚ್‌ಫಿಕ್ಸಿಂಗ್‌ ಸಮಸ್ಯೆಯ ಕುರಿತು ಅಂತಾರಾಷ್ಟ್ರೀಯ ಗೂಢಚರೆ ಸಂಸ್ಥೆ ಇಂಟರ್‌ಪೋಲ್‌ನೊಂದಿಗೆ ಮಾತುಕತೆ ನಡೆಸಿದ್ದೇವೆ. ಈ ಸಂಬಂಧ ಐಸಿಸಿಗೆ ನಾವು ಮಾಹಿತಿ ನೀಡಲು ಹೊರಟಾಗ ಅದರ ಸಾಮರ್ಥ್ಯ ಮತ್ತು ಕ್ರೀಡೆಯನ್ನು ಹದ್ದಿನಗಣ್ಣಿನಿಂದ ಕಾಯುವ ಯೋಗ್ಯತೆಯ ಕುರಿತೇ ಚಿಂತೆಯಾಯಿತು ಎಂದು ಅಲ್‌ಜಜೀರಾ ಹೇಳಿಕೊಂಡಿದೆ.