ಚೆಂಡಿನ ರೂಪ ಕೆಡಿಸಿದರೆ ಕಾದಿದೆ ಕಠಿನ ಶಿಕ್ಷೆ : ಐಸಿಸಿ

ದುಬಾೖ: ಇನ್ನು ಮುಂದೆ ಪಂದ್ಯದ ವೇಳೆ ಚೆಂಡಿನ ರೂಪ ಕೆಡಿಸಿದರೆ ಆಟಗಾರರು ಕಠಿನ ಶಿಕ್ಷೆ ಎದುರಿಸಲಿದ್ದಾರೆ. ಈ ಸಂಬಂಧ ಡಬ್ಲಿನ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ನ ವಾರ್ಷಿಕ ಮಹಾಸಭೆಯಲ್ಲಿ ನಿರ್ಧಾರ ತೆಗೆದುಕೊಳ್ಳಲಾಗಿದೆ.

ಚೆಂಡಿನ ರೂಪ ಕೆಡಿಸಿದರೆ ಆರು ಟೆಸ್ಟ್‌ಗಳಿಗೆ ಅಥವಾ 12 ಏಕದಿನ ಪಂದ್ಯಗಳಿಗೆ ನಿಷೇಧ ಹೇರಲಾಗುತ್ತದೆ. ಇದಲ್ಲದೇ ಮೈದಾನದಲ್ಲಿ ಉತ್ತಮ ನಡವಳಿಕೆಯನ್ನು ಖಚಿತಪಡಿಸಿಕೊಳ್ಳುವ ಸಲುವಾಗಿ ಆಶ್ಲೀಲತೆ ಮತ್ತು ವೈಯಕ್ತಿಕ ನಿಂದನೆಯನ್ನು ಲೆವೆಲ್‌ 3 ಅಪರಾಧವೆಂದು ಪರಿಗಣಿಸಲು ಸಭೆ ನಿರ್ಧರಿಸಿದೆ. ಸ್ಮಿತ್‌, ವಾರ್ನರ್‌ ಮತ್ತು  ಬ್ಯಾನ್‌ಕ್ರಾಫ್ಟ್ ಅವರು ಚೆಂಡಿನ ರೂಪ ಕೆಡಿಸಿದ ಪ್ರಕರಣದಲ್ಲಿ ಭಾಗಿಯಾದ ಹಿನ್ನೆಲೆಯಲ್ಲಿ ಈ ಅಪರಾಧವನ್ನು ಲೆವೆಲ್‌ 2ರಿಂದ ಮೂರಕ್ಕೇರಿಸಲು ನಿರ್ಧರಿಸಲಾಗಿದೆ. 

ಆಟಗಾರರ ವರ್ತನೆಯನ್ನು ಉತ್ತಮಪಡಿಸುವ ನಿಟ್ಟಿನಲ್ಲಿ ಕ್ರಿಕೆಟ್‌ ಸಮಿತಿ ಮಾಡಿದ ಶಿಫಾರಸುಗಳನ್ನು ಬೆಂಬಲಿಸಲು ಐಸಿಸಿಯ ನಿರ್ದೇಶಕರು ಒಪ್ಪಿದ್ದಾರೆ ಎಂದು ಐಸಿಸಿ ಚೇರ್ಮನ್‌ ಶಶಾಂಕ್‌ ಮನೋಹರ್‌ ತಿಳಿಸಿದ್ದಾರೆ.