ಐಎಎಫ್ ಹೆಲಿಕಾಪ್ಟರ್‌ ಪತನಗೊಂಡ ದುರಂತ: ಐವರ ಸಾವು

ಶ್ರೀನಗರ : ಜಮ್ಮು ಕಾಶ್ಮೀರದ ಬಡಗಾಂವ್‌ ಜಿಲ್ಲೆಯಲ್ಲಿಂದು ಬೆಳಗ್ಗೆ  ಐಎಎಫ್ ಹೆಲಿಕಾಪ್ಟರ್‌ ಪತನಗೊಂಡ ದುರಂತದಲ್ಲಿ ಐವರು ಮಡಿದಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಐಎಎಫ್ ಹೆಲಿಕಾಪ್ಟರ್‌ ಬಡಗಾಂವ್‌ನ ಗರೇಂದ್‌ ಕಲಾನ್‌ ಗ್ರಾಮದಲ್ಲಿನ ಹೊಲವೊಂದರಲ್ಲಿ ಇಂದು ಬುಧವಾರ ಬೆಳಗ್ಗೆ 10.05 ಗಂಟೆಗೆ ಪತನಗೊಂಡಿತ್ತು. ಪತನದ ತಾಣದಲ್ಲಿ ಐದು ಮೃತದೇಹಗಳು ಕಂಡು ಬಂದಿವೆ. 

ಮೃತರಲ್ಲಿ ಒಬ್ಬರನ್ನು ಸ್ಥಳೀಯ ನಿವಾಸಿ ಕಿಫಾಯತ್‌ ಹುಸೇನ್‌ ಗನಾಯೀ ಎಂದು ಗುರುತಿಸಲಾಗಿದೆ. ಉಳಿದ ನಾಲ್ವರು ಐಎಎಫ್ ಸಿಬಂದಿಗಳೆಂದು ತಿಳಿಯಲಾಗಿದ್ದು ಅದನ್ನು ಖಚಿತಪಡಿಸಿಕೊಳ್ಳಲಾಗುತ್ತಿದೆ. 

ದಿಲ್ಲಿಯಲ್ಲಿನ ಅಧಿಕಾರಿಗಳು ಬಡಗಾಂವ್‌ನಲ್ಲಿ  ಪತನಗೊಂಡದ್ದು  ಎಂಐ-17 ಹೆಲಿಕಾಪ್ಟರ್‌ ಎಂಬುದನ್ನು ದೃಢಪಡಿಸಿದ್ದಾರೆ. ಈ ಮೊದಲು ಶ್ರೀನಗರದಲ್ಲಿನ ಅಧಿಕಾರಗಳು ಪತನಗೊಂಡದ್ದು ಜೆಟ್‌ ವಿಮಾನವೆಂದು ಹೇಳಿದ್ದರಲ್ಲದೆ ಇದು ಎರಡು ತುಂಡಾಗಿ ಬಿದ್ದು ಬೆಂಕಿ ಹೊತ್ತಿಕೊಂಡಿತೆಂದು ತಿಳಿಸಿದ್ದರು.