“ಉಫ್’ಎಂದರೆ ನಾಣ್ಯ ಮಾಯ!

ಅಮ್ಮ ಕೊಟ್ಟ ನಾಣ್ಯದಿಂದ ಅಂಗಡಿಯಲ್ಲಿ ಚಾಕೊಲೇಟ್‌ ತಗೊಂಡರೆ, ದುಡ್ಡು ಖಾಲಿಯಾಗುತ್ತದೆ. ಅದೇ ನಾಣ್ಯವನ್ನು “ಉಫ್’ ಎಂದು ಊದಿ ಮಾಯ ಮಾಡೋದು ಹೇಗೆ ಅಂತ ಗೊತ್ತಿದೆಯಾ? ಇಲ್ಲವಾದ್ರೆ, ಆ ಜಾದೂ ಇಲ್ಲಿದೆ ನೋಡಿ. ಅಂಗಡಿಗೆ ಹೋಗಿ ದುಡ್ಡು ಖಾಲಿ ಮಾಡಿಕೊಳ್ಳುವ ಮುನ್ನ ಇದನ್ನು ಪ್ರಯತ್ನಿಸಿ.

ಬೇಕಾಗುವ ವಸ್ತುಗಳು: ಬಟ್ಟೆ ಹಾಸಿದ ಟೇಬಲ್‌, ನಾಣ್ಯ

ಪ್ರದರ್ಶನ:
ಜಾದೂಗಾರ ತನ್ನ ಎದುರಿನ ಟೇಬಲ್‌ನ ಮಧ್ಯಭಾಗದಲ್ಲಿ ಒಂದು ನಾಣ್ಯವನ್ನು ಇರಿಸುತ್ತಾನೆ. ನಂತರ ಆ ನಾಣ್ಯವನ್ನು ಟೇಬಲ್‌ ಮೇಲಿನಿಂದ ನಿಧಾನಕ್ಕೆ ತನ್ನತ್ತ ಎಳೆದು, ಕೈಯಲ್ಲಿ ತೆಗೆದುಕೊಂಡು ಗಾಳಿಯಲ್ಲಿ “ಉಫ್’ ಎನ್ನುತ್ತಾ ಮಾಯ ಮಾಡಿಬಿಡುತ್ತಾನೆ. 

ತಯಾರಿ:
ಈ ಜಾದೂವಿನ ರಹಸ್ಯ ಅಡಗಿರುವುದು ಕೈ ಚಳಕದಲ್ಲಿ. ಟೇಬಲ್‌ನ ಮಧ್ಯಭಾಗದಲ್ಲಿರುವ ನಾಣ್ಯವನ್ನು ನಿಮ್ಮತ್ತ ಎಳೆದುಕೊಳ್ಳುತ್ತಾ, ಗೊತ್ತಾಗದ ಹಾಗೆ ಕೆಳಗೆ ಬೀಳಿಸಬೇಕು. ಆಗ ನಾಣ್ಯ ನೆಲಕ್ಕೆ ಬೀಳದಂತೆ ಎಚ್ಚರ ವಹಿಸಿ. ನಂತರ ಕೇವಲ ಕೈಯನ್ನಷ್ಟೇ ಬಾಯಿಯ ಬಳಿ ತೆಗೆದುಕೊಂಡು ಹೋಗಿ, ಉಫ್ ಎಂದು ಊದಿದ ಹಾಗೆ ಮಾಡಬೇಕು. ನಾಣ್ಯ ಮಾಯವಾಗಿರುತ್ತದೆ. 

ನೀವು ನಿಜಕ್ಕೂ ನಾಣ್ಯವನ್ನು ಗಾಳಿಯಲ್ಲಿ ಮಾಯ ಮಾಡಿದ್ದೀರಿ ಎಂದೇ ನೋಡುಗರು ಭಾವಿಸುತ್ತಾರೆ. ಹಾಗೆ ನಾಣ್ಯವನ್ನು ತಳ್ಳುವಾಗ ಸದ್ದಾಗದ ಹಾಗೆ ಹಾಗೂ ಪ್ರೇಕ್ಷಕರಿಗೆ ಗೊತ್ತಾಗದ ಹಾಗೆ ಜಾಗ್ರತೆ ವಹಿಸಿ. ಪ್ರದರ್ಶನಕ್ಕೂ ಮುನ್ನ ಈ ಜಾದೂ ಕೈಚಳಕ ಕರಗತವಾಗುವವರೆಗೆ ಪ್ರಯೋಗ ಮಾಡಿ.