ಮನೆಯಂಗಳದಲ್ಲೇ ಬೆಳೆಯಿರಿ ಸೋರೆಕಾಯಿ

ಸೋರೆಕಾಯಿ ಹಳ್ಳಿಯಲ್ಲಿ ಮಾತ್ರ ಬೆಳೆಯಲು ಸಾಧ್ಯ ಎಂದು ನೀವಂದುಕೊಂಡಿದ್ದರೆ ಅದು ನಿಮ್ಮ ತಪ್ಪು ಕಲ್ಪನೆ. ನಗರದ ಸ್ವಲ್ಪವೇ ಜಾಗವಿದ್ದರೂ ಸೋರೆಕಾಯಿಯನ್ನು ಬೆಳೆಯಲು ಸಾಧ್ಯವಿದೆ. ಸೋರೆಕಾಯಿಯ ಬಳ್ಳಿ ಹಬ್ಬಲು ಸ್ಥಳ ಸಿಕ್ಕರೆ ಸಾಕು. ಅತ್ಯುತ್ತಮ ಗುಣಮಟ್ಟ ಮತ್ತು ಪೌಷ್ಟಿಕಾಂಶ ವುಳ್ಳ ತರಕಾರಿ ನಿಮ್ಮ ಮನೆಯಲ್ಲೇ ಮಾಡಬಹುದು.

ಬಳ್ಳಿಯ ರೂಪದ ಗಿಡದಲ್ಲಿ ಬೆಳೆಯುವ ಸೋರೆಕಾಯಿ ಹೇರಳ ಪೌಷ್ಟಿಕಾಂಶ ಹೊಂದಿರುವ ತರಕಾರಿ. ಇತರ ಬೆಳೆಗಳಿಗೆ ಹೋಲಿಸಿದರೆ ಸೋರೆ ಸುಲಭ ಮತ್ತು ಕಡಿಮೆ ಖರ್ಚಿನ ತರಕಾರಿ ಬೆಳೆ ಮತ್ತು ನಿರ್ದಿಷ್ಟ ಸ್ಥಳಾವಕಾಶವನ್ನೂ ಸೋರೆ ಕೃಷಿ ಬಯಸುವುದಿಲ್ಲ. ಔಷಧದ ತಯಾರಿಯಲ್ಲಿ ಸೋರೆಕಾಯಿ ಪ್ರಯೋಜನಕಾರಿ.

ವೈದ್ಯರು ಕೆಲವು ಕಾಯಿಲೆಗಳಿಗೂ ಸೋರೆಕಾಯಿಯಿಂದ ತಯಾರಿಸಿದ ಪದಾರ್ಥಗಳನ್ನು ಸೇವಿಸಲು ಸೂಚಿಸುವುದರಿಂದ ತಂಪಿನ ತರಕಾರಿ ಸೋರೆಕಾಯಿಗೆ ಹೆಚ್ಚಿನ ಬೇಡಿಕೆ ಇದೆ. ಕೊಬ್ಬು, ಪೊಟ್ಯಾಶಿಯಂ, ಕಬ್ಬಿಣ, ಶರ್ಕರಪಿಷ್ಟ, ಪ್ರೊಟೀನ್‌, ಖನಿಜಾಂಶ, ಕ್ಯಾಲ್ಸಿಯಂ, ರೈಬೋಫ್ಲೆವಿನ್‌, ರಂಜಕ, “ಸಿ’ ಜೀವಸತ್ವ ಇತ್ಯಾದಿ
ಪೌಷ್ಟಿಕಾಂಶಗಳು ಹೇರಳವಾಗಿ ಹೊಂದಿರುವ ಸೋರೆಕಾಯಿಯಿಂದ ಪಲ್ಯ, ಮೇಲೋಗರ, ಹುಳಿ ಸಾರು, ಸಾಂಬಾರು, ದೋಸೆ, ಪಾಯಸ, ಕೊಟ್ಟಿಗೆ ಇತ್ಯಾದಿಗಳನ್ನು ತಯಾರಿಸುತ್ತಾರೆ.

ಗೊಬ್ಬರ
ಸೋರೆ ಕೃಷಿಗೆ ಗೊಬ್ಬರವಾಗಿ ಸೊಪ್ಪು, ನೆಲಗಡಲೆ ಹಿಂಡಿಯನ್ನು ಬಳಸಬಹುದು. ಹಿತ್ತಿಲಲ್ಲಿ ಸಿಗುವ ಬಾಡಿದ ಹೂಗಳು, ಪದಾರ್ಥಕ್ಕೆ ತರಕಾರಿ ತುಂಡರಿಸಿದಾಗ ಎಸೆಯುವ ತರಕಾರಿ ಸಿಪ್ಪೆ, ತಿರುಳು, ಚಹಾದ ಕರಿ, ಈರುಳ್ಳಿ ಕಸ ಇತ್ಯಾದಿಗಳನ್ನೂ ಬಳಸಬಹುದು.

ಈ ಮಣ್ಣಿನಲ್ಲಿ ಬೆಳೆಯಿರಿ ಸೋರೆ ಕೃಷಿಗೆ ಮರಳು ಮಿಶ್ರಿತ ಕೆಂಪು ಅಥವಾ ಕಪ್ಪು ಗೊಡ್ಡು ಮಣ್ಣು ಉತ್ತಮ. ಸಾಮಾನ್ಯವಾಗಿ ಉಷ್ಣ, ಸಮಶೀತೋಷ್ಣ ಪ್ರದೇಶಗಳಲ್ಲಿ
ಬೆಳೆಯುವ ಸೋರೆಗೆ ಶೈತ್ಯ ಹವಾಗುಣ ಅಷ್ಟು ಸಹಕಾರಿಯಲ್ಲ. ಬೆಳಕು, ಹೆಚ್ಚಿನ ಉಷ್ಣತೆ ಇದ್ದಾಗ ಸೋರೆಯಲ್ಲಿ ಹೂಗಳು ಅಧಿಕ ಸಂಖ್ಯೆಯಲ್ಲಿ ಮೂಡುತ್ತವೆ. ಜೂನ್‌- ಜುಲೈ, ಅಕ್ಟೋಬರ್‌- ನವೆಂಬರ್ ಅಥವಾ ಫೆಬ್ರವರಿ- ಮಾರ್ಚ್ ತಿಂಗಳುಗಳು ಸೋರೆ ಬೆಳೆಯಲು ಸೂಕ್ತ ಸಮಯ ಹೀಗೆ ಬೆಳೆಯಿರಿ.

*ಬೀಜ ಬಿತ್ತನೆಯ ವಾರದಲ್ಲಿ ಗಿಡ ಮೊಳಕೆ ಬರುತ್ತವೆ

*ಗಿಡ ಮೊಳಕೆ ಬಂದು ಒಂದು ವಾರದಲ್ಲಿ ಸೊಪ್ಪು ಹಾಗೂ ಸ್ವಲ್ಪ ಗೊಬ್ಬರ ಹಾಕಬೇಕು.
*ಮತ್ತೂಂದು ವಾರದಲ್ಲಿ ಬಳ್ಳಿ ಹಬ್ಬಲು ಸಹಕಾರಿಯಾಗುವಂತೆ ಗಿಡದ ಬುಡದಲ್ಲಿ ಕೋಲುಗಳನ್ನು ಆಸರೆಯಾಗಿ ನೆಡಬಹುದು.
*ಬಳ್ಳಿ ಹಬ್ಬಿ ಬೆಳೆಯಲು ಚಪ್ಪರ ಹಾಕಿದರೆ ಉತ್ತಮ ಅಥವಾ ಸ್ಥಳಾವಕಾಶ ಬೇಕಾದಷ್ಟಿದ್ದರೆ ನೆಲದಲ್ಲಿಯೇ ಬಳ್ಳಿ ಹಬ್ಬಲು ಬಿಡಬಹುದು.
*ತಾರಸಿ ಮೇಲೆಯೂ ಬಳ್ಳಿಯನ್ನು ಬಿಟ್ಟರೆ ಸೋರೆಕಾಯಿ ಬೆಳೆಯುತ್ತದೆ.