ಇನ್ನೆಷ್ಟು ಮಕ್ಕಳು ಸಾಯಬೇಕು? ಅಧ್ಯಕ್ಷರ ಪತ್ನಿಯ ಪ್ರಶ್ನೆ

“ದಯವಿಟ್ಟು, ಉಕ್ರೇನ್‌ನಲ್ಲಿ ಹಾರಾಟ ನಿಷೇಧ ವಲಯವನ್ನು ಘೋಷಿಸಿ. ನಮ್ಮ ಮಕ್ಕಳನ್ನು ಉಳಿಸಿ. ಇಂದು ನೀವು ನಮ್ಮ ಮಕ್ಕಳ ಜೀವ ಕಾಪಾಡಿದರೆ, ನಾಳೆ ನಿಮ್ಮ ಮಕ್ಕಳೂ ಉಳಿಯುತ್ತಾರೆ.’

ಇದು ನ್ಯಾಟೋ ಪಡೆಗಳಿಗೆ ಉಕ್ರೇನ್‌ ಅಧ್ಯಕ್ಷ ವೊಲೋಡಿಮಿರ್‌ ಝೆಲೆನ್‌ಸ್ಕಿ ಅವರ ಪತ್ನಿ ಒಲೆನಾ ಝೆಲೆನ್‌ಸ್ಕಿ ಮಾಡಿರುವ ಮನವಿ. ಸೋಮವಾರ ವಿಡಿಯೋ ಮೂಲಕ ಮಾತನಾಡಿರುವ ಒಲೆನಾ, “ಪುತಿನ್‌ ಪಡೆಗಳು ಉಕ್ರೇನ್‌ ಮೇಲೆ ಆಕ್ರಮಣಗೈದಾಗಿನಿಂದ ನಮ್ಮ ಮಕ್ಕಳನ್ನು ನಿರಂತರವಾಗಿ ಹತ್ಯೆಗೈಯ್ಯುತ್ತಿದೆ. ಫೈರಿಂಗ್‌ ನಿಲ್ಲಿಸಲು ಇನ್ನೆಷ್ಟು ಮಕ್ಕಳು ಬಲಿಯಾಗಬೇಕು’ ಎಂದು ಪ್ರಶ್ನಿಸಿದ್ದಾರೆ.

ಈಗಾಗಲೇ ನಮ್ಮ ದೇಶದಲ್ಲಿ 38 ಮಕ್ಕಳನ್ನು ಕೊಲ್ಲಲಾಗಿದೆ ಎಂದಿರುವ ಒಲೆನಾ, “ಪುತಿನ್‌ನ ಸೇನೆಯು ಕಂದಮ್ಮಗಳನ್ನು ಮಾರಣಹೋಮ ಮಾಡುತ್ತಿರುವ ಘೋರ ಸತ್ಯವನ್ನು ಜಗತ್ತಿಗೆ ತೋರಿಸಿ’ ಎಂದು ಮಾಧ್ಯಮಗಳಿಗೆ ಮನವಿ ಮಾಡಿದ್ದಾರೆ.