ದಾನಿಶ್‌ ಸೇಠ್ ಅಭಿನಯದ “ಹಂಬಲ್‌ ಪೊಲಿಟೀಶಿಯನ್‌ ನೋಗರಾಜ್‌’ ಚಿತ್ರದಲ್ಲಿ ಪುನೀತ್‌ ರಾಜಕುಮಾರ್‌ ನಟಿಸುತ್ತಿದ್ದಾರೆ ಎಂಬ ಸುದ್ದಿ ಹಲವು ದಿನಗಳಿಂದ ಕೇಳುತ್ತಲೇ ಬಂದಿತ್ತು. ಈ ಕುರಿತು ಚಿತ್ರತಂಡದವರಾಗಲೀ, ಪುನೀತ್‌ ರಾಜಕುಮಾರ್‌ ಆಗಲೀ ಈ ವಿಷಯವನ್ನು ಖಚಿತಪಡಿಸಿರಲಿಲ್ಲ. ಹಾಗಾಗಿ, “ಹಂಬಲ್‌ ಪೊಲಿಟೀಶಿಯನ್‌ ನೋಗರಾಜ್‌’ ಚಿತ್ರದಲ್ಲಿ ಪುನೀತ್‌ ಅಭಿನಯಿಸುತ್ತಿದ್ದಾರಾ, ಇಲ್ಲವಾ ಎಂಬ ಗೊಂದಲ ಎಲ್ಲರಲ್ಲೂ ಇದ್ದೇ ಇತ್ತು.
“ಹಂಬಲ್‌ ಪೊಲಿಟೀಶಿಯನ್‌ ನೋಗರಾಜ್‌’ ಚಿತ್ರದಲ್ಲಿ ಪುನೀತ್‌ ನಟಿಸಿದ್ದಾರಂತೆ. ಹಾಗಂತ ಈ ವಿಷಯವನ್ನು ಖುದ್ದು ನಿರ್ಮಾಪಕ ಪುಷ್ಕರ್‌ ಸ್ಪಷ್ಟಪಡಿಸಿದ್ದಾರೆ. ಆದರೆ, ಈ ಕುರಿತು ಪ್ರಚಾರ ಮಾಡುವುದಾಗಲೀ, ಫೋಟೋ ಬಿಡುಗಡೆ ಮಾಡುವಂತಿಲ್ಲವಂತೆ. ಅದೇ ಕಾರಣಕ್ಕೆ ಚಿತ್ರತಂಡದವರು ಎಲ್ಲೂ ಪುನೀತ್‌ ಅವರು ಚಿತ್ರದಲ್ಲಿ ನಟಿಸುತ್ತಿರುವ ವಿಷಯವನ್ನು ಎಲ್ಲೂ ಹೇಳಿಲ್ಲ. ಈ ಕುರಿತು ಸುದ್ದಿಯಾದ್ದರಿಂದ, ಪುನೀತ್‌ಗೆ ಸ್ವಲ್ಪ ಬೇಸರವೂ ಆಗಿತ್ತಂತೆ.
“ಚಿತ್ರದಲ್ಲಿ ಅಭಿನಯಿಸುವ ಮುಂಚೆಯೇ ಪುನೀತ್‌, ತಾವು ನಟಿಸುತ್ತಿರುವ ವಿಷಯವನ್ನು ಪ್ರಚಾರ ಮಾಡಬಾರದು ಎಂದು ಹೇಳಿದ್ದರು. ಅವರು ಇದೇ ಮೊದಲ ಬಾರಿಗೆ ಅತಿಥಿ ಪಾತ್ರ ಮಾಡಿದ್ದು, ಸುಮಾರು ನಾಲ್ಕು ನಿಮಿಷಗಳ ಕಾಲ ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತಾರೆ. ನೋಗರಾಜ್‌ ಮತ್ತು ಪುನೀತ್‌ ಪರಸ್ಪರ ಎದುರಾಗುತ್ತಾರೆ. ಆಗ ಏನಾಗುತ್ತದೆ ಅನ್ನೋದೇ ಕುತೂಹಲ. ಈ ವಿಷಯ ರಹಸ್ಯವಾಗಿರಲಿ, ಜನಕ್ಕೆ ಸರ್‌ಪ್ರೈಸ್‌ ಇರಲಿ ಎಂದು ಪುನೀತ್‌ ಹೇಳಿದ್ದರು. ಹಾಗಾಗಿ ನಾವು ಸುದ್ದಿ ಮಾಡಿರಲಿಲ್ಲ. ಫೋಟೋಗಳನ್ನು ಸಹ ಬಿಟ್ಟಿರಲಿಲ್ಲ. ಅದು ಹೇಗೋ, ಅವರು ನಮ್ಮ ಚಿತ್ರದಲ್ಲಿ ನಟಿಸುತ್ತಿರುವ ಸುದ್ದಿ ಲೀಕ್‌ ಆಯ್ತು. ಇದರಿಂದ ಪುನೀತ್‌ ಅವರಿಗೆ ಸ್ವಲ್ಪ ಬೇಸರವೂ ಆಯಿತು’ ಎನ್ನುತ್ತಾರೆ ಪುಷ್ಕರ್‌.
ಅಂದಹಾಗೆ, ದಾನಿಶ್‌ ಸೇಠ್ ನಟಿಸುತ್ತಿರುವ ಈ ಚಿತ್ರ ಮುಂದಿನ ತಿಂಗಳು ಕೊನೆಯ ಎರಡು ವಾರಗಳಲ್ಲಿ ಬಿಡುಗಡೆಯಾಗಲಿದೆ.
