ಮಾರ್ಚ್‌ ತಾಪಮಾನ 122 ವರ್ಷಗಳಲ್ಲಿಯೇ ಗರಿಷ್ಠ : ಹವಾಮಾನ ಇಲಾಖೆ 

ಹೊಸದಿಲ್ಲಿ: ದೇಶದಲ್ಲಿ ಈ ವರ್ಷದ ಮಾರ್ಚ್‌ ತಿಂಗಳಿನಲ್ಲಿ ದಾಖಲಾದ ತಾಪಮಾನವು ಕಳೆದ 122 ವರ್ಷಗಳಲ್ಲಿಯೇ ಮಾರ್ಚ್‌ನಲ್ಲಿ ದಾಖಲಾದ ಅತ್ಯಧಿಕ ತಾಪಮಾನ ಎಂಬುದಾಗಿ ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಹೇಳಿದೆ.

ಉತ್ತರ ಭಾರತದಲ್ಲಿ ಬೀಸುತ್ತಿರುವ ಉಷ್ಣ ಅಲೆಗಳು ಹಾಗೂ ದೇಶದಲ್ಲಿ ಮಳೆಯ ಕೊರತೆ ಇದಕ್ಕೆ ಕಾರಣ ಎಂದು ಐಎಂಡಿ ಹೇಳಿದೆ. ಮಾರ್ಚ್‌ನಲ್ಲಿ ದೇಶದಲ್ಲಿ ಸರಾಸರಿ 8.9 ಮಿ.ಮೀ. ಮಳೆ ಸುರಿದಿದ್ದು, ಇದು ಈ ಅವಧಿಯ ದೀರ್ಘ‌ಕಾಲಿಕ ಸರಾಸರಿ ವಾಡಿಕೆ ಮಳೆಯಾಗಿರುವ 30.4 ಮಿ.ಮೀ.ಗಿಂತ ಶೇ. 71ರಷ್ಟು ಕಡಿಮೆ. ದೇಶವನ್ನು ಒಟ್ಟಾರೆಯಾಗಿ ತೆಗೆದುಕೊಂಡರೆ, ಮಾರ್ಚ್‌ನಲ್ಲಿ ಸರಾಸರಿ ಗರಿಷ್ಠ ತಾಪಮಾನ 33.10 ಡಿಗ್ರಿ ಸೆ. ದಾಖಲಾಗಿದ್ದು, ಇದು 122 ವರ್ಷಗಳಲ್ಲಿ ಅತ್ಯಧಿಕ ಎಂದು ಐಎಂಡಿ ಹೇಳಿಕೆಯಲ್ಲಿ ತಿಳಿಸಿದೆ.

2010 ಮಾರ್ಚ್‌ ನಲ್ಲಿ ಇದಕ್ಕಿಂತ ಸ್ವಲ್ಪ ಕಡಿಮೆ, 33.09 ಡಿಗ್ರಿ ಸೆ. ಸರಾಸರಿ ಉಷ್ಣಾಂಶ ದಾಖಲಾಗಿತ್ತು.