ಹೊಸನಗರ: 3 ಮಂಗಗಳ ಶವ ಪತ್ತೆ

ಹೊಸನಗರ: ತಾಲೂಕಿನ ಜೇನಿ ಗ್ರಾಪಂ ವ್ಯಾಪ್ತಿಯ ಮುಳುಗಡ್ಡೆ ಗ್ರಾಮದಲ್ಲಿ 3 ಮಂಗಗಳ ಮೃತ ದೇಹ ಪತ್ತೆಯಾಗಿದೆ ಎಂದು ಜಿಪಂ ಸದಸ್ಯ ಕಲಗೋಡು ರತ್ನಾಕರ ಹೇಳಿದರು. ಈ ಭಾಗದ ಗ್ರಾಮಸ್ಥರು ನೀಡಿದ ಮಾಹಿತಿಯ ಮೇರೆಗೆ ಭಾನುವಾರ ಸ್ಥಳಕ್ಕೆ ಭೇಟಿ ನೀಡಿದ ನಂತರ ಸುದ್ದಿಗಾರರ ಜತೆ ಅವರು ಮಾತನಾಡಿದರು.

ಮಂಗಗಳ ಅಸಹಜ ಸಾವಿನಿಂದಾಗಿ ಗ್ರಾಮದಲ್ಲಿ ಆತಂಕ ಮೂಡಿದೆ. ಈ ಬಗ್ಗೆ ತುರ್ತು ಕ್ರಮ ಕೈಗೊಳ್ಳಲು ಆರೋಗ್ಯ ಇಲಾಖೆಗೆ ಸೂಕ್ತ ಮಾಹಿತಿ ನೀಡಲಾಗಿದೆ ಎಂದರು. ಅಸಹಜವಾಗಿ ಸಾವನ್ನಪ್ಪಿದ ಮಂಗಗಳ ಅಂಗಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಿ, ದಹನ ಮಾಡಲಾಗಿದೆ ಎಂದರು. ತಾಪಂ ಸದಸ್ಯ ಬಿ.ಜಿ. ಚಂದ್ರಮೌಳಿ, ಗ್ರಾಪಂ ಸದಸ್ಯ ಹರೀಶ ಕಲ್ಯಾಣಪ್ಪ ಗೌಡ ಮತ್ತಿತರರು ಇದ್ದರು.