ಹೊಂಬಣ್ಣ ನಿರ್ದೇಶಕನ ಹೊಸ ಚಿತ್ರ ಸಿಂಗಲ್‌

ಈ ವರ್ಷ ಒಂದಷ್ಟು ಹೊಸಬರ ಚಿತ್ರಗಳು ಮೆಚ್ಚುಗೆ ಪಡೆದಿದ್ದು ನಿಮಗೆ ಗೊತ್ತಿರಬಹುದು. ಹೊಸ ವಿಷಯಗಳನ್ನಿಟ್ಟುಕೊಂಡು ಮಾಡಿದ ಸಿನಿಮಾಗಳು ಬಾಕ್ಸ್‌ಆಫೀಸ್‌ನಲ್ಲಿ ಸದ್ದು ಮಾಡದೇ ಹೋದರೂ ಮೆಚ್ಚುಗೆ ವ್ಯಕ್ತವಾಯಿತು. ಹಾಗೆ ಪ್ರಶಂಸೆ ಪಡೆದ ಸಿನಿಮಾಗಳಲ್ಲಿ “ಹೊಂಬಣ್ಣ’ ಕೂಡಾ ಒಂದು. ಆ ಚಿತ್ರದ ಕಥಾವಸ್ತುವಿನ ಬಗ್ಗೆ ಒಳ್ಳೆಯ ಮಾತುಗಳು ಕೇಳಿಬಂದುವು.

ಆ ಚಿತ್ರವನ್ನು ರಕ್ಷಿತ್‌ ತೀರ್ಥಹಳ್ಳಿ ನಿರ್ದೇಶಿಸಿದ್ದರು. ಇಂತಿಪ್ಪ ರಕ್ಷಿತ್‌ ಈಗ ಹೊಸ ಸಿನಿಮಾ ಮಾಡಲು ಹೊರಟಿದ್ದಾರೆ. ಅದು “ಸಿಂಗಲ್‌’. ಹೌದು, ರಕ್ಷಿತ್‌ ತೀರ್ಥಹಳ್ಳಿ ಈಗ “ಸಿಂಗಲ್‌’ ಎಂಬ ಸಿನಿಮಾ ಮಾಡಲು ಹೊರಟಿದ್ದಾರೆ. ಸದ್ಯ ಚಿತ್ರದ ಸ್ಕ್ರಿಪ್ಟ್ ಕೆಲಸದಲ್ಲಿ ಬಿಝಿಯಾಗಿರು ರಕ್ಷಿತ್‌ ಮುಂದಿನ ತಿಂಗಳು ಚಿತ್ರದ ಮುಹೂರ್ತ ಮಾಡಲಿದ್ದಾರೆ.

ಈ ಬಾರಿ ಔಟ್‌ ಅಂಡ್‌ ಔಟ್‌ ಕಮರ್ಷಿಯಲ್‌ ಸಿನಿಮಾ ಮಾಡಲು ಹೊರಟಿದ್ದಾರೆ. ಚಿತ್ರದಲ್ಲಿ ಇಬ್ಬರು ನಾಯಕರಿದ್ದು, “ಹೊಂಬಣ್ಣ’ ಚಿತ್ರದಲ್ಲಿ ನಟಿಸಿದದ ಮಧು ಎನ್ನುವವರು ಇಲ್ಲೂ ನಟಿಸುತ್ತಿದ್ದಾರೆ. ಇನ್ನೊಬ್ಬ ನಾಯಕನ ಹಾಗೂ ನಾಯಕಿಯ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ. ಆಡಿಷನ್‌ ಮೂಲಕ ನಟರನ್ನು ಆಯ್ಕೆ ಮಾಡುವ ಉದ್ದೇಶ ರಕ್ಷಿತ್‌ಗಿದೆ. 

ಸೈಬರ್‌ ಕ್ರೈಮ್‌ ಸುತ್ತ ಕಥೆ ಹೆಣೆಯಲಾಗಿದ್ದು, ಪ್ರಸ್ತುತ ನಡೆಯುತ್ತಿರುವ ಘಟನೆಗಳಿಗೆ ಈ ಕಥೆ ಹೆಚ್ಚು ಹೊಂದಿಕೆಯಾಗಲಿದೆಯಂತೆ. ಈ ಚಿತ್ರವನ್ನು “ಹೊಂಬಣ್ಣ’ ಚಿತ್ರದ ನಿರ್ಮಾಪಕರೇ ಮಾಡುತ್ತಿದ್ದಾರೆ. ಚಿತ್ರಕ್ಕೆ ಹೇಮಂತ್‌ ಸಂಗೀತ, ನಾಗೇಂದ್ರ ಛಾಯಾಗ್ರಹಣವಿದೆ.