ನಿಷೇಧಿತ ರಾಸಾಯನಿಕವಿರುವ ಚೀನ ಪಟಾಕಿ ನಿಷೇಧಕ್ಕೆ ಆಗ್ರಹ

ಪಣಜಿ:  ಭಾರತದಲ್ಲಿ ನಿಷೇಧಿಸಲ್ಪಟ್ಟಿರುವ ರಾಸಾಯನಿಕವನ್ನು ಒಳಗೊಂಡಿರುವ ಚೀನದ ಪಟಾಕಿಗಳನ್ನು ನಿಷೇಧಿಸುವಂತೆ ಹಿಂದೂ ಜನಜಾಗೃತಿ ಸಮಿತಿ (ಎಚ್‌ಜೆಎಸ್‌) ಗೋವಾ ಸರಕಾರವನ್ನು ಆಗ್ರಹಿಸಿದೆ.

ಉತ್ತರ ಗೋವಾ ಜಿಲ್ಲಾಧಿಕಾರಿಗೆ ಈ ಬಗ್ಗೆ ಮನವಿ ಅರ್ಪಿಸಿರುವ ಹಿಂದೂ ಜನಜಾಗೃತಿ ಸಮಿತಿ, ಮುಂದಿನ ವಾರ ದೀಪಾವಳಿಯ ವೇಳೆಗೆ ಭಾರತಿಯ ಮಾರುಕಟ್ಟೆಗೆ ದೊಡ್ಡ ಪ್ರಮಾಣದಲ್ಲಿ ಲಗ್ಗೆ ಹಾಕಲಿರುವ ಚೀನ ಪಟಾಕಿ, ಸುಡು ಮದ್ದುಗಳು ಅತ್ಯಂತ ಅಪಾಯಕಾರಿಯಾಗಿವೆ ಎಂದು ಮನವಿಯಲ್ಲಿ ಹೇಳಿದೆ.

ದೇಶೀಯ ಪಟಾಕಿಗಳಿಗೆ ಹೋಲಿಸಿದರೆ ಚೀನದ ಪಟಾಕಿಗಳು ಅತ್ಯಂತ ಅಗ್ಗವಾಗಿವೆ; ಆದರೆ ಅಷ್ಟೇ  ಅನಾಹುತಕಾರಿಯಾಗಿವೆ. ಅವು ವಾತಾವರಣದ ತೀವ್ರ ಮಾಲಿನ್ಯಕ್ಕೆ ಕಾರಣವಾಗುತ್ತವೆ; ಆದುದರಿಂದ ಅವುಗಳನ್ನು ನಿಷೇಧಿಸುವುದು ಅಗತ್ಯವಾಗಿದೆ ಎಂದು ಸಮಿತಿಯ ರಾಜ್ಯ ಸಂಚಾಲಕರಾಗಿರುವ ಮನೋಜ್‌ ಸೋಳಂಕಿ ಹೇಳಿದ್ದಾರೆ.