ಲಂಡನ್‌: ಭಾರತೀಯ ಮೂಲದ ಶ್ರೀಚಂದ್‌ ಹಿಂದೂಜಾ ಮತ್ತು ಗೋಪಿಚಂದ್‌ ಹಿಂದೂಜಾ ಯುನೈಟೆಡ್‌ ಕಿಂಗ್‌ಡಮ್‌ನ ಹಾಲಿ ವರ್ಷದ ಸಿರಿವಂತರ ಪಟ್ಟಿಯಲ್ಲಿ ಮೊದಲ ಪಟ್ಟಿಯಲ್ಲಿದ್ದಾರೆ. ‘ದ ಸಂಡೇ ಟೈಮ್ಸ್‌ ರಿಚ್‌ ಲಿಸ್ಟ್‌’ ಈ ಪಟ್ಟಿ ಸಿದ್ಧಪಡಿಸಿದೆ. ಒಂದು ಸಾವಿರ ಮಂದಿಯ ಈ ಪಟ್ಟಿಯಲಿ ಭಾರತೀಯ ಮೂಲದ 40 ಮಂದಿ ಶ್ರೀಮಂತರು ಸ್ಥಾನ ಪಡೆದಿದ್ದಾರೆ. ಹಿಂದೂಜಾ ಸಹೋದರರ ಒಟ್ಟು ಸಂಪತ್ತು 1, 35,271 ಕೋಟಿ ರೂ. ಆಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಅವರ ಸಂಪತ್ತು 26,720 ಕೋಟಿ ರೂ.ಗಳಷ್ಟು ಹೆಚ್ಚಾಗಿದೆ. ಭಾರತೀಯ ಮೂಲದ ಉದ್ಯಮಿ ಲಕ್ಷ್ಮೀನಿವಾಸ್‌ ಮಿತ್ತಲ್‌ 4ನೇ ಸ್ಥಾನ(1,10,463 ಕೋಟಿ ರೂ)ಪಡೆದಿದ್ದಾರೆ.
ಮಜುಂದಾರ್‌ ಯಶಸ್ವಿ ಉದ್ಯಮಿ: ‘ದ ಸಂಡೇ ಟೈಮ್ಸ್‌’ ಬಿಡುಗಡೆ ಮಾಡಿದ ವಿಶ್ವದ ಅಗ್ರ 20 ಶ್ರೀಮಂತ ಮಹಿಳಾ ಉದ್ಯಮಿಗಳ ಪಟ್ಟಿಯಲ್ಲಿ ಬೆಂಗಳೂರಿನ ಬಯೋಕಾನ್‌ ಸಂಸ್ಥೆಯ ಒಡತಿ ಕಿರಣ್‌ ಮುಜುಂದಾರ್ ಶಾ ಅವರು 6ನೇ ಶ್ರೀಮಂತ ಮಹಿಳಾ ಉದ್ಯಮಿಯಾಗಿ ಹೊರಹೊಮ್ಮಿದ್ದಾರೆ. ಒಟ್ಟಾರೆ 9.6 ಸಾವಿರ ಕೋಟಿ ಆಸ್ತಿ ಹೊಂದುವ ಮೂಲಕ ಅವರು ಈ ಸಾಧನೆ ಮಾಡಿದ್ದಾರೆ.
