ಹಿಮಾ ಚಿನ್ನದ ಓಟ: ‘ಧಿಂಗ್ ಎಕ್ಸ್ ಪ್ರೆಸ್’ಗೆ 18 ದಿನದಲ್ಲಿ 5ನೇ ಬಂಗಾರ

ಜೆಕ್‌: ಭಾರತದ ಚಿನ್ನದ ಹುಡುಗಿ ಹಿಮಾ ದಾಸ್‌ ಓಡಿದಲ್ಲೆಲ್ಲಾ ಚಿನ್ನದ ಪದಕಕ್ಕೆ ಮುತ್ತಿಕ್ಕುತ್ತಿದ್ದಾರೆ. ಈ ಒಂದು ತಿಂಗಳಲ್ಲಿ ಈಗಾಗಲೇ ನಾಲ್ಕು ಚಿನ್ನದ ಪದಕ ಗೆದ್ದಿರುವ ಹಿಮಾ ಈಗ ಮತ್ತೊಂದು ಬಂಗಾರಕ್ಕೆ ಕೊರಳೊಡ್ಡಿದ್ದಾರೆ.

ಜೆಕ್‌ ಗಣರಾಜ್ಯದಲ್ಲಿ ನಡೆಯುತ್ತಿರುವ ಅಥ್ಲೆಟಿಕ್ಸ್‌ ಕೂಟದಲ್ಲಿ ಹಿಮಾ ಬಂಗಾರ ಗೆದ್ದಿದ್ದಾರೆ. ಕೂಟದ ಮಹಿಳಾ ವಿಭಾಗದ 400 ಮೀ. ಓಟದಲ್ಲಿ ಭಾರತದ ಬಂಗಾರದ ಚಿಗರೆ ಹಿಮಾ ಕೇವಲ 52.09 ಸೆಕಂಡ್‌ ನಲ್ಲಿ ಗುರಿ ತಲುಪಿ ದಾಖಲೆ ಬರೆದಿದ್ದಾರೆ. ಈ ಟೈಮಿಂಗ್‌ ಕೂಟದ ಅತ್ಯುತ್ತಮ ದಾಖಲೆಯಾಗಿದೆ.

ಆದರೆ ಹಿಮಾ ತನ್ನ ವೈಯಕ್ತಿಕ ದಾಖಲೆಯನ್ನು ಮುರಿಯಲು ವಿಫಲರಾದರು. ಈ ಹಿಂದೆ ಜಕಾರ್ತ ಏಶ್ಯನ್‌ ಗೇಮ್ಸ್‌ ನಲ್ಲಿ 50.79 ಸೆಕಂಡ್‌ ನಲ್ಲಿ 400 ಮೀ. ಗುರಿ ಮುಟ್ಟಿದ್ದರು.