ವಿಮಾನಕ್ಕೆ ಹೈಜಾಕ್‌ ಶಾಕ್‌

ಹೊಸದಿಲ್ಲಿ:  ಹುಸಿ ಬಾಂಬ್‌ ಹಾಗೂ ಹೈಜಾಕ್‌ ಬೆದರಿಕೆಯ ಹಿನ್ನೆಲೆಯಲ್ಲಿ, ರವಿವಾರ ಮಧ್ಯರಾತ್ರಿ ಮುಂಬಯಿಯಿಂದ‌ ದಿಲ್ಲಿಗೆ ಪ್ರಯಾಣ ಬೆಳೆಸಿದ್ದ ಜೆಟ್‌ ಏರ್‌ವೇಸ್‌ನ ವಿಮಾನವೊಂದು ಅಹ್ಮದಾಬಾದ್‌ನಲ್ಲಿ ತುರ್ತು ಭೂಸ್ಪರ್ಶ ಮಾಡಿದ ಪ್ರಸಂಗ ನಡೆದಿದೆ. 

115 ಪ್ರಯಾಣಿಕರನ್ನು ಹೊತ್ತು ರವಿವಾರ ಮಧ್ಯರಾತ್ರಿ 2.55ರ ಹೊತ್ತಿಗೆ ಮುಂಬಯಿಯಿಂದ‌  ಪ್ರಯಾಣ ಬೆಳೆಸಿದ್ದ ವಿಮಾನದ ಸಿಬ್ಬಂದಿಗೆ ಅದರಲ್ಲಿನ ಶೌಚಾಲಯದಲ್ಲಿ ಚೀಟಿಯೊಂದು ಸಿಕ್ಕಿತ್ತು. ವಿಮಾನದಲ್ಲಿ ಬಾಂಬ್‌ ಇದ್ದು, 12 ಮಂದಿ ಅಪಹರಣಕಾರರೂ ಇದರಲ್ಲೇ ಪ್ರಯಾಣಿ ಸುತಿ ¤ದ್ದಾರೆಂದು ಉರ್ದು, ಇಂಗ್ಲಿಷ್‌ನಲ್ಲಿ ಮುದ್ರಿಸಲಾಗಿತ್ತು. ಜತೆಗೆ, ವಿಮಾನವು ನೇರವಾಗಿ ಪಾಕ್‌ ಆಕ್ರಮಿತ ಕಾಶ್ಮೀರಕ್ಕೆ ತೆರಳಲಿದೆ ಎಂದೂ ಬರೆಯಲಾಗಿತ್ತು. ವಿಚಾರ ತಿಳಿದೊಡನೆ “ಹೈಜಾಕ್‌ ಬಟನ್‌’ ಒತ್ತಿದ ಪೈಲಟ್‌, ದಿಲ್ಲಿ ಕಡೆಗೆ ಹೋಗಬೇಕಿದ್ದ ವಿಮಾನವನ್ನು ಅಹ್ಮದಾಬಾದ್‌ನಲ್ಲಿ ತುರ್ತು ಭೂಸ್ಪರ್ಶ ಮಾಡಿದರು. ಪ್ರಯಾಣಿಕರನ್ನು ಕೆಳಗಿಸಿ ತಪಾಸಣೆ ನಡೆಸಲಾಗಿ, ಆ ಬೆದರಿಕೆ ಹುಸಿಯೆಂದು ತಿಳಿದುಬಂತು.

ಆರೋಪಿ ಬಂಧನ: ಈ ಕುಕೃತ್ಯ ಮಾಡಿದವನನ್ನು ಪತ್ತೆ ಹಚ್ಚಲಾಗಿದ್ದು, ಅದೇ ವಿಮಾನದಲ್ಲಿ ಪಯಣಿಸುತ್ತಿದ್ದ ಗುಜರಾತ್‌ನ ಆಭರಣ ವ್ಯಾಪಾರಿ ಬಿರ್ಜು ಸಲ್ಲಾ ಎಂದು ಗುರುತಿಸಲಾಗಿದೆ. ಈತ ಈ ಹಿಂದೆಯೂ ಜಿರಳೆಯೊಂದನ್ನು ವಿಮಾನದೊಳಕ್ಕೆ ತಂದು, ದಾಂಧಲೆ ಎಬ್ಬಿಸಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದೇ ವೇಳೆ, ಆರೋಪಿಯನ್ನು “ನೋ-ಫ್ಲೈ’ ಪಟ್ಟಿಗೆ ಸೇರಿಸುವಂತೆ ಕೇಂದ್ರ ನಾಗರಿಕ ವಿಮಾನಯಾನ ಸಚಿವ ಅಶೋಕ್‌ ಗಜಪತಿರಾಜು ಸೂಚಿಸಿದ್ದಾರೆ.