ಹಲೋ ಆಸ್ಟ್ರೇಲಿಯ, ಆಗಮಿಸಿದೆ ಟೀಮ್‌ ಇಂಡಿಯಾ!

ಸಿಡ್ನಿ: ಐಪಿಎಲ್‌ ಪಂದ್ಯಾವಳಿ ಮುಗಿಸಿದ ಟೀಮ್‌ ಇಂಡಿಯಾ ಈಗ ಆಸ್ಟ್ರೇಲಿಯ ಸರಣಿಗೆ ಸಜ್ಜಾಗಿದೆ. ಬುಧವಾರ ರಾತ್ರಿ ದುಬಾೖಯಿಂದ ವಿಮಾನವೇರಿದ ಭಾರತದ ಕ್ರಿಕೆಟಿಗರು 20 ಗಂಟೆಗಳ ಸುದೀರ್ಘ‌ ಪ್ರಯಾಣದ ಬಳಿಕ ಗುರುವಾರ ಸಿಡ್ನಿಗೆ ಬಂದಿಳಿದಿದ್ದಾರೆ.

ದುಬಾೖಯಿಂದ ಹೊರಡುವಾಗ ಭಾರತ ತಂಡದ ಆಟಗಾರರು, ಸಹಾಯಕ ಸಿಬಂದಿಯೆಲ್ಲ ವಿಶೇಷ ಪಿಪಿಇ ಕಿಟ್‌ ಧರಿಸಿ ನಿಂತ ಚಿತ್ರಗಳನ್ನು ಬಿಸಿಸಿಐ ತನ್ನ ವೆಬ್‌ಸೈಟ್‌ನಲ್ಲಿ ಪೋಸ್ಟ್‌ ಮಾಡಿತ್ತು. ಇದೀಗ “ಹಲೋ ಆಸ್ಟ್ರೇಲಿಯ! ಟೀಮ್‌ ಇಂಡಿಯಾ ಈಸ್‌ ಹಿಯರ್‌!’ ಎಂದು ಪೋಸ್ಟ್‌ ಮಾಡಿ ಕಾಂಗರೂ ನಾಡಿಗೆ ತನ್ನ ಆಗಮನವನ್ನು ಸಾರಿದೆ.

ಭಾರತ ತಂಡದ ಆಟಗಾರರೆಲ್ಲ ಜೈವಿಕ ಸುರಕ್ಷಾ ವಲಯ ವನ್ನು ಪ್ರವೇಶಿಸಿ, ಸಿಡ್ನಿಯಲ್ಲಿ ಕ್ವಾರಂಟೈನ್‌ಗೆ ಒಳಗಾಗಲಿದ್ದಾರೆ. ಬಳಿಕ ಅಭ್ಯಾಸಕ್ಕೆ ಇಳಿಯಲಿದ್ದಾರೆ. ಇದು ಪೂರ್ಣ ಪ್ರಮಾಣದ ಸರಣಿಯಾಗಿದ್ದು, ನ. 27ರಿಂದ ಆರಂಭವಾಗಲಿದೆ. ಒಟ್ಟು 3 ಏಕದಿನ, 3 ಟಿ20 ಮತ್ತು 4 ಟೆಸ್ಟ್‌ ಪಂದ್ಯಗಳನ್ನು ಆಡಲಾಗುವುದು. ಇದು ಲಾಕ್‌ಡೌನ್‌ ಬಳಿಕ ಭಾರತ ಆಡಲಿರುವ ಮೊದಲ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸರಣಿ.