Border-Gavaskar Trophy: ತುರ್ತು ವೈಯಕ್ತಿಕ ಕಾರಣ: ಕೋಚ್‌ ಗಂಭೀರ್‌ ಭಾರತಕ್ಕೆ

ಪರ್ತ್‌: ಬೋರ್ಡರ್‌-ಗಾವಸ್ಕರ್‌ ಸರಣಿಯ ಮೊದಲ ಟೆಸ್ಟ್‌ ಪಂದ್ಯವನ್ನು ಅಮೋಘವಾಗಿ ಗೆದ್ದ ಬೆನ್ನಲ್ಲೇ ಟೀಮ್‌ ಇಂಡಿಯಾ ಕೋಚ್‌ ಗೌತಮ್‌ ಗಂಭೀರ್‌ ತುರ್ತು ವೈಯಕ್ತಿಕ ಕಾರಣದಿಂದ ಕುಟುಂಬ ಸಮೇತ ಭಾರತಕ್ಕೆ ವಾಪಸಾಗಿದ್ದಾರೆ. ಡಿ. 6ರಂದು ಅಡಿಲೇಡ್‌ನ‌ಲ್ಲಿ ಆರಂಭವಾಗಲಿರುವ ಪಿಂಕ್‌ ಬಾಲ್‌ ಟೆಸ್ಟ್‌ ವೇಳೆ ಅವರು ಮರಳಿ ತಂಡವನ್ನು ಕೂಡಿಕೊಳ್ಳಲಿದ್ದಾರೆ ಎಂದು ಬಿಸಿಸಿಐ ಪ್ರಕಟಿಸಿದೆ.

ಗೌತಮ್‌ ಗಂಭೀರ್‌ ಮಂಗಳವಾರ ಬೆಳಗ್ಗೆ ಭಾರತದ ವಿಮಾನ ಏರಿದರು. ಹೀಗಾಗಿ ಡಿ. 30ರಂದು ಕ್ಯಾನ್‌ಬೆರಾ ದಲ್ಲಿ ಮೊದಲ್ಗೊಳ್ಳುವ ಭಾರತದ 2 ದಿನಗಳ ಡೇ-ನೈಟ್‌ ಅಭ್ಯಾಸ ಪಂದ್ಯದ ವೇಳೆ ಅವರು ಇರುವುದಿಲ್ಲ. ಭಾರತ ತಂಡ ಬುಧವಾರ ಆಸ್ಟ್ರೇಲಿಯದ ರಾಜಧಾನಿ ಕ್ಯಾನ್‌ಬೆರಾಕ್ಕೆ ಪಯಣಿಸಲಿದೆ. ಅಲ್ಲಿ ಪ್ರಧಾನಿ ಆ್ಯಂಟನಿ ಅಲ್ಬನೀಸ್‌ ಅವರ ಅಧಿಕೃತ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಳ್ಳಲಿದೆ.

ಅಭ್ಯಾಸ ಪಂದ್ಯದಲ್ಲಿ ಭಾರತ ತಂಡ “ಆಸ್ಟ್ರೇಲಿಯನ್‌ ಪ್ರೈಮ್‌ ಮಿನಿಸ್ಟರ್ ಇಲೆವೆನ್‌’ ವಿರುದ್ಧ ಆಡಲಿದೆ. ಆಲ್‌ರೌಂಡರ್‌ ಜಾಕ್‌ ಎಡ್ವರ್ಡ್ಸ್‌ ಈ ತಂಡವನ್ನು ಮುನ್ನಡೆಸಲಿದ್ದಾರೆ.