ನಿಡ್ಪಳ್ಳಿ: ಭಾರೀ ಮಳೆಗೆ ಚೆಲ್ಯಡ್ಕ ಸೇತುವೆ ಮುಳುಗಡೆ

ನಿಡ್ಪಳ್ಳಿ: ಪುತ್ತೂರು – ಪರ್ಲಡ್ಕ – ಪಾಣಾಜೆ ರಸ್ತೆಯ ಚೆಲ್ಯಡ್ಕ ಸೇತುವೆ ಬುಧವಾರ ಮಧ್ಯಾಹ್ನ ಸುರಿದ ಭಾರೀ ಮಳೆಗೆ ಮುಳುಗಡೆಯಾಗಿದೆ. ಈ ಮಳೆಗಾಲದಲ್ಲಿ  ಎರಡನೇ ಬಾರಿ ಮುಳುಗಡೆಯಾದಂತಾಗಿದೆ. ಮುಳುಗು ಸೇತುವೆ ಎಂದೆ ಕರೆಯಲ್ಪಡುವ ಈ ಸೇತುವೆ ಮುಳುಗಡೆಯಾದರೆ ಗುಮ್ಮಟೆ ಗದ್ದೆ ದೇವಸ್ಯ, ಅಜ್ಜಿಕಲ್ಲು ಭಾಗದ ಜನರು ಬೆಟ್ಟಂಪಾಡಿ, ಪಾಣಾಜೆ, ಬಡಗನ್ನೂರು ಸಂಪರ್ಕ ಕಡಿತವಾಗುತ್ತದೆ. ಅಲ್ಲದೆ  ಪಾಣಾಜೆ- ಪುತ್ತೂರು ಸಂಚರಿಸುವ ಖಾಸಗಿ ಬಸ್‌ ಗಳ ಸಂಚಾರಕ್ಕೆ ಅಡಚಣೆಯಾಗುತ್ತದೆ. ಇದಕ್ಕೆ ಪರ್ಯಾಯ ಸೇತುವೆ ನಿರ್ಮಾಣವೊಂದೇ ಸೂಕ್ತ ಪರಿಹಾರ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ.