ನೆರೆಯಿಂದ ವಿವಿಧೆಡೆ ಮುಳುಗಡೆ; ಭಾರೀ ಗಾಳಿಗೆ ಬೆಚ್ಚಿದ ಜನತೆ

ಮಹಾನಗರ: ಎರಡು ದಿನಗಳಿಂದ ದಕ್ಷಿಣ ಕನ್ನಡ ಸಹಿತ ಸೇರಿದಂತೆ ಮಂಗಳೂರು ನಗರದಲ್ಲಿ ಸುರಿಯುತ್ತಿದ್ದ ಭಾರೀ ಮಳೆ ಬುಧವಾರದಂದು ಕೊಂಚ ವಿರಾಮ ನೀಡಿದೆ. ಬುಧವಾರ ಬೆಳಗ್ಗೆಯಿಂದ ನಗರದಲ್ಲಿ ಉತ್ತಮ ಮಳೆಯಾಗಿದ್ದು, ಮಂಗಳವಾರಕ್ಕೆ ಹೋಲಿಸಿದರೆ ತುಸು ಕಡಿಮೆಯಾಗಿತ್ತು.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಆ.7, 8ರಂದು ಭಾರೀ ಮಳೆಯಾಗುತ್ತದೆ ಎಂದು ಹವಾಮಾನ ಇಲಾಖೆ ಈಗಾಗಲೇ ರೆಡ್‌ ಅಲರ್ಟ್‌ ಘೋಷಣೆ ಮಾಡಿತ್ತು. ಇದೇ ಕಾರಣಕ್ಕೆ ಜಿಲ್ಲಾಡಳಿತವು ಜಿಲ್ಲೆಯ ಶಾಲಾ-ಕಾಲೇಜುಗಳಿಗೆ ರಜೆ ಘೋಷಣೆ ಮಾಡಲಾಗಿತ್ತು.

ವಿದ್ಯುತ್‌ ತಂತಿಗೆ ಬಿದ್ದ ಮರ

ನಗರದಲ್ಲಿ ಉಂಟಾಗಿದ್ದ ಗಾಳಿಗೆ ಬಿಜೈನ ಭಾರತಿ ನಗರದಲ್ಲಿ ವಿದ್ಯುತ್‌ ತಂತಿಗೆ ಮರವೊಂದು ಬಿದ್ದು ಕೆಲವು ಕಾಲ ವಿದ್ಯುತ್‌ ಸ್ಥಗಿತಗೊಂಡಿತ್ತು. ಸುರಿದ ಮಳೆಯಿಂದಾಗಿ ನಗರದ ಕೆಲವು ಕಡೆಗಳಲ್ಲಿ ಕೃತಕ ನೆರೆ ತುಂಬಿಕೊಂಡಿತ್ತು. ನಗರ ಕೆಲವು ಕಡೆಗಳಲ್ಲಿ ಒಳಚರಂಡಿ ವ್ಯವಸ್ಥೆ ಸರಿಯಿಲ್ಲದ ಕಾರಣ, ರಸ್ತೆಯಲ್ಲೇ ಕೊಳಚೆ ನೀರು ಹರಿಯುತ್ತಿತ್ತು.

ಹವಾಮಾನ ಇಲಾಖೆಯ ಮುನ್ಸೂ ಚನೆಯ ಪ್ರಕಾರ ಮುಂದಿನ ಎರಡು ದಿನಗಳ ಕಾಲ ಜಿಲ್ಲೆಯಲ್ಲಿ ಉತ್ತಮ ಮಳೆಯಾಗುವ ಸಂಭವವಿದೆ.

ಸುರತ್ಕಲ್ ಭಾರೀ ಮಳೆ
ಸುರತ್ಕಲ್: ಬುಧವಾರ ಸಂಜೆಯ ವೇಳೆ ಭಾರೀ ಗಾಳಿ ಬೀಸಿದ ಕಾರಣ ಸಾರ್ವಜನಿಕರು ಬೆಚ್ಚಿದ ಘಟನೆ ನಡೆಯಿತು. ಮರಗಳನ್ನು ಅರ್ಧಕ್ಕೆ ಭಾಗಿಸುವಷ್ಟು ಗಾಳಿ ಬೀಸಿದರೆ, ಪಾದಚಾರಿಗಳು ಗಾಳಿಗೆ ನಡೆಯಲಾರದೆ ಕಟ್ಟಡಗಳಲ್ಲಿ ಆಶ್ರಯ ಪಡೆದರು. ಎರಡು ದಿನಗಳಿಂದ ಸುರಿಯುತ್ತಿರುವ ಮಳೆಗೆ ಸುರತ್ಕಲ್ ಬೈಕಂಪಾಡಿ ಸಹಿತ ವಿವಿಧೆಡೆ ತಗ್ಗು ಪ್ರದೇಶಗಳು ಮುಳು ಗಡೆಯಾದರೆ, ಮರ, ಮೆಸ್ಕಾಂ ವಿದ್ಯುತ್‌ ಕಂಬಗಳಿಗೆ ಹಾನಿಯಾಗಿದೆ. ಸುರತ್ಕಲ್ ಬಳಿ ಮುಧವಾರ ಸಂಜೆ ಬೀಸಿದ ಗಾಳಿಗೆ ಮರವೊಂದು ಮನೆ ಮೇಲೆ ಬಿದ್ದು ಅಪಾರ ಹಾನಿಯಾಗಿದೆ.

ಕಳಪೆ ಕಾಮಗಾರಿಯಿಂದ ರಸ್ತೆ ಹಾನಿಗೀಡಾಗಿದ್ದು, ಟೋಲ್ ನೀಡುವುದಿಲ್ಲ ಎಂದು ಸಾರ್ವಜನಿಕರೊಬ್ಬರು ನಿರಾಕರಿಸಿ ಟೋಲ್ ಕೇಂದ್ರದ ಸಿಬಂದಿಯನ್ನು ತರಾಟೆಗೆ ತೆಗೆದುಕೊಂಡರು.

ಬೈಕಂಪಾಡಿ:  ಕೈಗಾರಿಕಾ ಪ್ರಾಂಗಣಕ್ಕೆ ಹಾನಿ
ಬೈಕಂಪಾಡಿ ಕೈಗಾರಿಕಾ ಪ್ರದೇಶ ಮಂಗಳವಾರ ರಾತ್ರಿ ಮುಳುಗಡೆಯಾಯಿತು. ಹದಿನೈದಕ್ಕೂ ಅಧಿಕ ಕೈಗಾರಿಕಾ ಪ್ರಾಂಗಣಗಳಿಗೆ ಹಾನಿಯಾಗಿವೆ. ಬೈಕಂಪಾಡಿ ಚಿತ್ರಾಪುರದಲ್ಲಿ ಕಡಲಬ್ಬರ ಮುಂದುವರಿದಿದ್ದು, ರಸ್ತೆಗೆ ಹಾನಿಯಾಗಿದೆ. ಪಂಜಿಮೊಗರು ಬಳಿ ಮರ ಬಿದ್ದು ವಿದ್ಯುತ್‌ ತಂತಿಗಳು ತುಂಡಾಗಿವೆ. ಬೈಕಂಪಾಡಿ ಬರಡ್‌ ರಸ್ಸೆಲ್ ಶಾಲೆಗೆ ಮಳೆ ನೀರು ನುಗ್ಗಿದೆ. ಭಾರೀ ಮಳೆಗೆ ಹೆದ್ದಾರಿ 66 ಹಾನಿಗೊಂಡಿದ್ದು, ಬೃಹತ್‌ ಹೊಂಡಗಳಾಗಿ ವಾಹನಗಳು ತೆವಳುತ್ತಾ ಸಾಗುತ್ತಿವೆ.