ಇದು ಹೊಳೆಯಲ್ಲ.. ಗಂಗೊಳ್ಳಿ ಪೇಟೆ ರಸ್ತೆ..

ಗಂಗೊಳ್ಳಿ: ಗಂಗೊಳ್ಳಿ ಪೇಟೆಯಲ್ಲಿ ಮಳೆ ನೀರು ಹರಿದು ಹೋಗಲು ಸರಿಯಾದ ಚರಂಡಿ ವ್ಯವಸ್ಥೆಯಿಲ್ಲದ ಕಾರಣ ನೀರೆಲ್ಲ ರಸ್ತೆಯಲ್ಲೇ ಹರಿದು ಹೋಗುತ್ತಿದೆ. ಇದರಿಂದ ಶಾಲಾ ಮಕ್ಕಳು ಸೇರಿದಂತೆ ದ್ವಿಚಕ್ರ ವಾಹನ ಸವಾರರು ಸೇರಿದಂತೆ ಅನೇಕ ಮಂದಿ ಸಂಚರಿಸಲು ಪರದಾಟ ನಡೆಸಿದರು. 

ಬಂದರು ನಗರಿ ಗಂಗೊಳ್ಳಿಯಲ್ಲಿ ಧಾರಾಕಾರ ಮಳೆಯಾಗುತ್ತಿದ್ದು, ಬುಧ ವಾರವೂ ನಿರಂತರ ಮಳೆಯಾಗಿದೆ. ಗಂಗೊಳ್ಳಿಯ ಪೇಟೆ ಸೇರಿದಂತೆ ಅನೇಕ ಕಡೆ ಗಳಲ್ಲಿ ಮಳೆ ನೀರು ಹರಿದು ಹೋಗಲು ಸರಿಯಾದ ಚರಂಡಿ ವ್ಯವಸ್ಥೆ ಮಾಡದ ಕಾರಣ ಈಗ ಮಳೆ ನೀರೆಲ್ಲ ರಸ್ತೆಯಲ್ಲೇ ಹರಿದು ಹೋಗುತ್ತಿದೆ. ಅದು ಕೂಡ ಅಲ್ಲಲ್ಲಿ ನಿಂತು, ರಸ್ತೆಯೇ ಹೊಳೆಯಂತೆ ಭಾಸವಾಗುತ್ತಿದೆ. 

ಗಂಗೊಳ್ಳಿ ಪೇಟೆಯ ಮುಖ್ಯ ರಸ್ತೆ, ಮ್ಯಾಂಗನೀಸ್‌ ರಸ್ತೆಗಳಲ್ಲಿ ಭಾರೀ ಪ್ರಮಾಣದ ನೀರು ನಿಂತು ವಾಹನ ಸವಾರರಿಗೆ ಸಂಚರಿಸಲು, ಪಾದಚಾರಿಗಳಿಗೆ ನಡೆದಾಡಲು ಕಷ್ಟವಾಗುತ್ತಿದೆ.

ಗಂಗೊಳ್ಳಿಯಲ್ಲಿ ಮಳೆಗಾಲ ಆರಂಭ ವಾದರೂ ಚರಂಡಿ ಹೂಳೆತ್ತದಿರುವ, ಚರಂಡಿ ವ್ಯವಸ್ಥೆಯಿಲ್ಲದಿರುವ ಕುರಿತು ಜೂ. 5ರಂದು “ಉದಯವಾಣಿ’ ಪತ್ರಿಕೆ ವರದಿ ಮಾಡಿತ್ತು.