ವರುಣನ ಆರ್ಭಟ: ವಿವಿಧೆಡೆ ಅಪಾರ ಹಾನಿ

ಹೆಬ್ರಿ: ಪೆರ್ಡೂರು ಹಾಗೂ ಹಿರಿಯಡ್ಕ ಸುತ್ತಮುತ್ತಲಿನ ಪ್ರದೇಶದಲ್ಲಿ ಮಂಗಳವಾರ ಭಾರೀ ಗಾಳಿ ಮಳೆಗೆ ಅಪಾರ ಪ್ರಮಾಣದ ನಷ್ಟ ಸಂಭವಿಸಿದೆ.

ಹಿರಿಯಡದ ಪ್ರಮುಖ ಬೀದಿಗಳಲ್ಲಿ ಸರಿಯಾದ ಚರಂಡಿ ವ್ಯವಸ್ಥೆ ಇಲ್ಲದೆ ನೀರು ರಸ್ತೆ ಮೇಲೆ ಹರಿದು ಸಂಚಾರಕ್ಕೆ ಸಮಸ್ಯೆ ಉಂಟಾಗಿದೆ. ಹಿರಿಯಡ್ಕ ಠಾಣಾ ಅಂಜಾರು ಗ್ರಾಮದ ಕರಂಬಾಕ್ಯಾರು ಕೃಷ್ಣಪ್ಪ ಪೂಜಾರಿಯವರ ಮನೆ ಮೇಲೆ ಸಿಮೆಂಟ್ ಶೀಟ್ ಹಾರಿ ಹೋಗಿದ್ದು, ಅಡಿಕೆ ಮರಗಳು ಬಿದ್ದು ಅಪಾರ ಪ್ರಮಾಣದ ನಷ್ಟ ಸಂಭವಿಸಿದೆ. ಅಲ್ಲದೆ ಅಂಜಾರು ಗ್ರಾಮದ ಸುಜಾತಾ ನಾಯಕ್‌ ಅವರ ಮನೆ, ಕೊಟ್ಟಿಗೆಯ ಹಂಚು , ಸಿಮೆಂಟ್ ಶೀಟ್ ಗಾಳಿಗೆ ಹಾರಿ ಸಂಪೂರ್ಣ ಹಾನಿಗೊಂಡಿದೆ. ಈ ಪ್ರದೇಶಕ್ಕೆ ಬೊಮ್ಮರಬೆಟ್ಟು ಗ್ರಾಮ ಕರಣಿಕರು, ಹಿರಿಯಡ್ಕ ಠಾಣಾಧಿಕಾರಿ ಸತೀಶ್‌ ಬಲ್ಲಾಳ್‌ ಮೊದಲಾದವರು ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಪೆರ್ಡೂರು ಸುತ್ತಮುತ್ತಲ ಪ್ರದೇಶದಲ್ಲಿ ಮಳೆಯಿಂದ ನದಿ ನೀರು ತೋಟಗಳಿಗೆ ನುಗ್ಗಿ ಕೃಷಿ ಭೂಮಿಗೆ ಹಾನಿ ಉಂಟಾಗಿದೆ. ಕೃಷಿಗದ್ದೆ ಅಡಿಕೆ ತೋಟ ಜಲಾವೃತಗೊಂಡಿದ್ದು ನಾಯರ್‌ಕೋಡು ಬಳಿ ಬೀಸಿದ ಗಾಳಿಗೆ ರತಿ ಎಂಬವರ ಮನೆಯ ಹಂಚು ಹಾರಿ ಹೋಗಿದೆ. ಇಲ್ಲಿಯ ಲಲಿತಾ ಪೂಜಾರ್ತಿ, ಬೇಬಿ ಅವರ ಮನೆಯ ಹಂಚು ಕೂಡ ಹಾರಿಹೋಗಿ ಸುಮಾರು 70 ಸಾವಿರ ರೂ. ನಷ್ಟ ಸಂಭವಿಸಿದೆ.

ಸ್ಥಳಕ್ಕೆ ಸ್ಥಳೀಯಾಡಳಿತ ಭೇಟಿ ನೀಡಿ ಪರಿಶೀಲನೆ ನಡೆಸಿತು.