ಹರಪನಹಳ್ಳಿ: ಪ್ರಸಕ್ತ ದಿನಮಾನಗಳಲ್ಲಿ ಶಿಕ್ಷಣದಿಂದ ಮಾತ್ರ ಸಾಮಾಜಿಕವಾಗಿ ಮುಂದುವರೆಯಲು ಸಾಧ್ಯ. ಹೀಗಾಗಿ ಪ್ರತಿಯೊಬ್ಬರೂ ತಮ್ಮ ಮಕ್ಕಳಿಗೆ ಶಿಕ್ಷಣ ಕೊಡಿಸುವ ಮೂಲಕ ಗಂಗಾಮತ ಸಮಾಜವನ್ನು ಮುಖ್ಯವಾಹಿನಿಗೆ ತರುವಂತಹ ಕೆಲಸವನ್ನು ಮಾಡಬೇಕಿದೆ. ಶೋಷಿತ ಸಮಾಜಗಳಿಗೆ ಶಿಕ್ಷಣವೇ ಪ್ರಬಲ ಅಸ್ತ್ರವಾಗಿದೆ ಎಂದು ನರಸೀಪುರ ಅಂಬಿಗರ ಚೌಡಯ್ಯ ಪೀಠದ ಶಾಂತಭೀಷ್ಮ ಚೌಡಯ್ಯ ಸ್ವಾಮೀಜಿ ಪ್ರತಿಪಾದಿಸಿದರು.
ತಾಲೂಕಿನ ಯು.ಕಲ್ಲಹಳ್ಳಿ ಗ್ರಾಮದಲ್ಲಿ ನೂತನ ಗಂಗಾಪರಮೇಶ್ವರಿದೇವಿ ದೇವಸ್ಥಾನ ಉದ್ಘಾಟನೆ ಹಾಗೂ ಮೂರ್ತಿ ಪ್ರಾಣ ಪ್ರತಿಷ್ಠಾಪನಾ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಅವರು ಆಶೀರ್ವಚನ ನೀಡಿದರು.
ಬಸವಣ್ಣ, ಅಂಬಿಗರ ಚೌಡಯ್ಯ, ಶಿಶುನಾಳ ಶರೀಫ, ಅಕ್ಕಮಹಾದೇವಿ ಅವರಂತಹ ಆದರ್ಶ ವ್ಯಕ್ತಿಗಳ ಮೂರ್ತಿಗಳನ್ನು ನಗರ, ಗ್ರಾಮಗಳ ಪ್ರಮುಖ ವೃತ್ತಗಳಲ್ಲಿ ಪ್ರತಿಷ್ಠಾಪನೆ ಮಾಡಬೇಕು. ಇದರಿಂದ ಅವರ ಆದರ್ಶ ತತ್ವಗಳು, ಸಾಮಾಜಿಕ ಹಾಗೂ ಸಮಾನತೆಯ ಹೋರಾಟ, ತ್ಯಾಗ ಬಲಿದಾನಗಳು ಸ್ಮರಣೆಗೊಂಡು ನಮಗೆ ದಾರಿದೀಪ ಆಗಲಿದೆ ಎಂದರು.
ದೇವಸ್ಥಾನಗಳು ಸೋಮಾರಿಗಳ ಅಡ್ಡೆಯಾಗಬಾರದು. ಬದಲಾಗಿ ಶಿವಾನುಭವ, ತಾತ್ವಿಕ ಚಿಂತನೆ, ದಾಸೋಹಗಳನ್ನು ಬಿತ್ತುವ ಕೇಂದ್ರಗಳಾಗಬೇಕು. ದೊಡ್ಡ ಸಮುದಾಯಗಳೊಂದಿಗೆ ಅನ್ಯೋನ್ಯ ಸಂಬಂಧ ಹೊಂದಿರುವ ಬೆಸ್ತ ಸಮುದಾಯ ಸಾಮಾಜದಲ್ಲಿ ಘನತೆಯನ್ನು ಕಾಪಾಡಿಕೊಂಡು ಬಂದಿದೆ. ಎಲ್ಲಾ ಜಾತಿ, ಧರ್ಮದವರೊಂದಿಗೆ ಬೇರೆತು ಬದುಕುವುದೇ ನಿಜವಾದ ತಾತ್ವಿಕ ಆದರ್ಶ ಜೀವನ ಎಂದರು.
ಗಂಗಾಮತ ಸಮಾಜದ ಜಿಲ್ಲಾಧ್ಯಕ್ಷ ಬಿ.ಕೆ ಮಂಜುನಾಥ್‌ ಮಾತನಾಡಿ, ದೇವಸ್ಥಾನ ಕಟ್ಟುವ ನೆಪದಲ್ಲಿ ಮುಂದಾಳುಗಳು ರಾಜಕೀಯವಾಗಿ ಬಳಸಿಕೊಳ್ಳುವ ಆರೋಪಗಳು ನಡುವೆ ಸಮುದಾಯದಲ್ಲಿ ಒಡಕು ಮೂಡುತ್ತಿದೆ. ಈ ನಡುವೆ ಅನ್ಯ ಸಮುದಾಯದೊಂದಿಗೆ ಉತ್ತಮ ಬಾಂಧವ್ಯ ಹೊಂದುವ ಮೂಲಕ ಅವರ ಸಹಕಾರದೊಂದಿಗೆ ದೇವಸ್ಥಾನ ನಿರ್ಮಿಸಿರುವುದು ಶ್ಲಾಘನೀಯ ಎಂದರು.
ಕಾರ್ಯಕ್ರಮದ ಅಂಗವಾಗಿ ಕಾಲಾಕರ್ಷಣೆ ಹೋಮ, ನೇತ್ರನ್ಮಲನ, ಮೂಲ ವಿಗ್ರಹ ಪ್ರತಿಷ್ಠಾಪನೆ, ಮಹಾಪೂರ್ಣಾಹುತಿ ಹೋಮಗಳು ನಡೆದವು. ಶಾಂತಾಭೀಷ್ಮ ಸ್ವಾಮೀಜಿ ಅವರನ್ನು ಗ್ರಾಮದ ಪ್ರಮುಖ ಬೀದಿಗಳಲ್ಲಿ ವಿವಿಧ ವಾದ್ಯ, ನಂದಿಕೋಲು, ಕುಂಭಮೇಳ, ಡೊಳ್ಳು, ಶಿವ ನರ್ತನಗಳ ಮೂಲಕ ಮೆರವಣಿಗೆ ಮಾಡಲಾಯಿತು.
ತಾಪಂ ಸದಸ್ಯ ಪಾಟೀಲ್ ಕೆಂಚನಗೌಡ, ಗಿರಿಜಮ್ಮ ಮಹೇಶಪ್ಪ, ಗ್ರಾಪಂ ಅಧ್ಯಕ್ಷೆ ಸುಧಾ ಭೈರೇಗೌಡ, ಉಪಾಧ್ಯಕ್ಷ ರಾಮನಾಯ್ಕ, ಉಚ್ಚಂಗಿದುರ್ಗ ಬೆಸ್ತರ ಗುಳದಳ್ಳಿ ಮಂಜಪ್ಪ, ಮುಖಂಡರಾದ ಕೆ.ಪಿ ಚಂದ್ರಶೇಖರ್‌, ಮೋರಗೆರೆ ಭೀಮಣ್ಣ ಮುಖಂಡರಾದ ಚಟ್ನಿಹಳ್ಳಿ ರಾಜಪ್ಪ, ಬಿ.ರಾಜಕುಮಾರ್‌, ಕೆ.ನಾಗಾರಾಜ್‌, ಮಹಾಂತೇಶ್‌ ನಿಟ್ಟೂರು, ಕೆ.ಪರಶುರಾಮ, ಮೈಲಪ್ಪ, ಫಣಿಯಾಪುರ ನಿಂಗರಾಜ್‌, ಚಂದ್ರನಾಯ್ಕ, ಕೆ.ಪಿ.ಮಹೇಶ್ವರ, ವೆಂಕಟೇಶಪ್ಪ, ಅಂಜಿನಪ್ಪ ಇದ್ದರು.
