ಹೈದರಾಬಾದ್: ಈ ವರ್ಷ ಟಾಲಿವುಡ್‌ ಸಿನಿರಂಗದಲ್ಲಿ ಬಂದ ʼಹನುಮಾನ್ʼ ಹಲವು ದಾಖಲೆಗಳನ್ನು ಬರೆದಿದೆ. ಸಿನಿಮಾ ನಿರೀಕ್ಷೆ ಮಾಡಿದಕ್ಕಿಂತಲೂ ಹೆಚ್ಚಿನ ಲಾಭ ಹಾಗೂ ಯಶಸ್ಸನ್ನು ತಂದುಕೊಟ್ಟಿದೆ.
ʼಹನುಮಾನ್ʼ ಹಿಟ್‌ ಆದ ಬೆನ್ನಲ್ಲೇ ನಿರ್ದೇಶಕ ಪ್ರಶಾಂತ್‌ ವರ್ಮಾ ಅದರ ಸ್ವೀಕ್ವೆಲ್‌ ನ್ನು ಇತ್ತೀಚೆಗೆ ಅನೌನ್ಸ್‌ ಮಾಡಿದ್ದಾರೆ. ʼಹನುಮಾನ್ʼ ಸಿನಿಮಾಕ್ಕೆ ಮೆಚ್ಚುಗೆ ಸಿಗುವುದರ ಜೊತೆ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡ ನಟ ತೇಜ ಸಜ್ಜ ಅವರ ಅಭಿನಯಕ್ಕೂ ಸಿನಿಮಂದಿಯಿಂದ ಮೆಚ್ಚುಗೆ ವ್ಯಕ್ತವಾಗಿತ್ತು.
ʼಹನುಮಾನ್ʼ ಸಿನಿಮಾದಲ್ಲಿ ಸಂಪೂರ್ಣವಾಗಿ ತೊಡಗಿಕೊಳ್ಳಲು ತೇಜ ಸಜ್ಜ ಪಟ್ಟ ಪರಿಶ್ರಮದ ಬಗ್ಗೆ ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ಮಾತನಾಡಿದ್ದಾರೆ.
“ಹನುಮಾನ್ ಸಿನಿಮಾದಲಿ ಸಂಪೂರ್ಣವಾಗಿ ತೊಡಗಿಕೊಳ್ಳುವ ನಿಟ್ಟಿನಲ್ಲಿಎರಡೂವರೆ ವರ್ಷಗಳ ಅವಧಿಯಲ್ಲಿ ಸುಮಾರು 70-75 ಚಿತ್ರಗಳನ್ನು ತಿರಸ್ಕರಿಸಿದ್ದೇನೆ. ಇದರಲ್ಲಿ 15 ಸಿನಿಮಾಗಳ ಸ್ಕ್ರಿಪ್ಟ್‌ ಚೆನ್ನಾಗಿತ್ತು” ಎಂದು ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ಬಹಿರಂಗಪಡಿಸಿದ್ದಾರೆ.
“ಸಾಮಾನ್ಯವಾಗಿ, ನಟರು ನಿರ್ದಿಷ್ಟ ಚಲನಚಿತ್ರಕ್ಕಾಗಿ ಎರಡು ಅಥವಾ ಮೂರು ಸ್ಕ್ರೀನ್ ಪರೀಕ್ಷೆಗಳನ್ನು ಮಾಡುತ್ತಾರೆ. ಆದರೆ ನಾನು ʼಹನುಮಾನ್ʼ ಸಿನಿಮಾಕ್ಕಾಗಿ 25 ಸ್ಕ್ರೀನ್ ಟೆಸ್ಟ್‌ ಗಳನ್ನು ಮಾಡಿದ್ದೆ. ಚಿತ್ರದಲ್ಲಿನ ಎಲ್ಲಾ ಸಾಹಸಗಳನ್ನು ಬಾಡಿ ಡಬಲ್ ಅಥವಾ VFX ಸಹಾಯವಿಲ್ಲದೆ ನಿರ್ವಹಿಸಿದ್ದೇನೆ. ʼಹನುಮಾನ್ʼನಲ್ಲಿ ನೀರೊಳಗಿನ ಸೀಕ್ವೆನ್ಸ್‌ಗಳಿಗಾಗಿ ಸ್ಕೂಬಾ ಡೈವ್ ಮಾಡಲು ಕಲಿತುಕೊಂಡಿದ್ದೆ” ಎಂದು ಅವರು ʼ123 ತೆಲುಗುʼ ಸಂದರ್ಶನದಲ್ಲಿ ಹೇಳಿದ್ದಾರೆ.
ಬಾಕ್ಸ್‌ ಆಫೀಸ್‌ ನಲ್ಲಿ 200 ಕೋಟಿಗೂ ಅಧಿಕ ಕಲೆಕ್ಷನ್‌ ಮಾಡಿರುವ ʼಹನುಮಾನ್ʼ ಸಿನಿಮಾದಲ್ಲಿ ತೇಜ ಸಜ್ಜ ಜೊತೆ ವರಲಕ್ಷ್ಮಿ ಶರತ್‌ಕುಮಾರ್, ಅಮೃತಾ ಅಯ್ಯರ್, ವಿನಯ್ ರೈ, ವೆನ್ನೆಲ ಕಿಶೋರ್ ಮುಂತಾದವರು ನಟಿಸಿದ್ದಾರೆ.
