ಸ್ಥಳೀಯ ಕಚೇರಿಯಲ್ಲಿ ಗುರುಜಯಂತಿ ಆಚರಣೆ

ಮುಂಬಯಿ, ಅ. 15: ಬಿಲ್ಲವರ ಅಸೋಸಿಯೇಶನ್‌ ಮುಂಬಯಿ ಇದರ ಜೋಗೇಶ್ವರಿ ಸ್ಥಳೀಯ ಕಚೇರಿಯ ವತಿಯಿಂದ ಬ್ರಹ್ಮಶ್ರೀ ನಾರಾಯಣ ಗುರುಗಳ 165ನೇ ಜಯಂತ್ಯುತ್ಸವ ಇತ್ತೀಚೆಗೆ ಶ್ರೀ ಜಗದಾಂಬ ಕಾಳಭೈರವ ದೇವಸ್ಥಾನದ ಸಭಾಂಗಣದಲ್ಲಿ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ನಡೆಯಿತು.

ಜೋಗೇಶ್ವರಿ ಸ್ಥಳೀಯ ಕಚೇರಿಯ ಗೌರವ ಕಾರ್ಯಾಧ್ಯಕ್ಷ ರಾದ ಬಾಬು ಪೂಜಾರಿ ಅವರು ದೀಪ ಬೆಳಗಿಸಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಕಾರ್ಯಾಧ್ಯಕ್ಷರಾದ ನಾರಾಯಣ ಪೂಜಾರಿಯವರ ನೇತೃತ್ವದಲ್ಲಿ ಬ್ರಹ್ಮಶ್ರೀ ನಾರಾಯಣ ಗುರು ದೇವರ ಜಯಂತೋತ್ಸವವು ಅಪಾರ ಭಕ್ತರ ಸಮ್ಮುಖದಲ್ಲಿ ನೆರವೇರಿತು. ಈ ಸಂದರ್ಭದಲ್ಲಿ ಭಜನೆ, ನಾರಾಯಣ ಗುರುಗಳ ಸಹಸ್ರ ನಾಮಾವಳಿ ಹಾಗೂ ತೀರ್ಥ ಪ್ರಸಾದ ವಿತರಿಸಲಾಯಿತು. ಪೂಜಾ ವಿಧಿ -ವಿಧಾನವನ್ನು ಶೇಖರ್‌ ಶಾಂತಿ ಉಳ್ಳೂರು ನಡೆಸಿಕೊಟ್ಟರು. ಕಾರ್ಯಾಧ್ಯಕ್ಷರಾದ ಶ್ರೀ ನಾರಾಯಣ ಪೂಜಾರಿ ಹಾಗೂ ಅವರ ಧರ್ಮಪತ್ನಿ ಸುಜಾತಾ ನಾರಾಯಣ ಪೂಜಾರಿ ಪೂಜಾವೃತ ಕೈಗೊಂಡರು.

ಈ ಸಂದರ್ಭದಲ್ಲಿ ಸ್ಥಳೀಯ ಕಚೇರಿ ಉಪಾಧ್ಯಕ್ಷರಾದ ಸುಶೀಲಾ ಪೂಜಾರಿ, ಸುನೀಲ್‌ ಎಲ್‌. ರಾವ್‌, ಪದಾಧಿಕಾರಿಗಳು, ಕೇಂದ್ರ ಕಚೇರಿಯ ಜತೆ ಕಾರ್ಯದರ್ಶಿ ಹರೀಶ್‌ ಸಾಲ್ಯಾನ್‌, ಸದಸ್ಯರಾದ ಮೋಹನ್‌ ಪೂಜಾರಿ, ಜಗದಾಂಬ ಕಾಳಬೆ„ರವ ದೇವಸ್ಥಾನದ ಟ್ರಸ್ಟಿಗಳಾದ ಸಂಜೀವ ಪೂಜಾರಿ, ಶನೀಶ್ವರ ಸೇವಾ ಸಮಿತಿ ಮೇಘವಾಡಿ ಇದರ ಸ್ಥಾಪಕರಾದ ಸುಂದರ್‌ ಡಿ. ಭವನ್‌, ಕಾರ್ಯದರ್ಶಿ ವಿಜಯ್‌ ಸುವರ್ಣ ಹಾಗೂ ಜೋಗೇಶ್ವರಿ ಸ್ಥಳೀಯ ಕಚೇರಿಯ ಮಾಜಿ ಕಾರ್ಯದರ್ಶಿಗಳಾದ ವಿಟಲ್‌ ಪೂಜಾರಿ ಉಪಸ್ಥಿತರಿದ್ದರು. ಚಂದ್ರೇಶ್‌ ಸುವರ್ಣ ಅವರು ವಂದಿಸಿದರು. ಕಾರ್ಯಕ್ರಮವು ಅನ್ನಪ್ರಸಾದ ವಿತರಣೆಯೊಂದಿಗೆ ಮುಕ್ತಾಯಗೊಂಡಿತು. ಸಮಾಜ ಬಾಂಧವರು, ಸದಸ್ಯ ಬಾಂಧವರು ಹೆಚ್ಚಿನ ಸಂಖ್ಯೆಯಲ್ಲಿ ಉಪಸ್ಥಿತರಿದ್ದರು.