Kannada Cinema: ಹೊಸ ವರ್ಷಕ್ಕೆ ‘ಗನ್ಸ್ ಆ್ಯಂಡ್ ರೋಸಸ್’

ಕನ್ನಡ ಚಿತ್ರರಂಗದಲ್ಲಿ ಪ್ರತಿವರ್ಷ ಹತ್ತಾರು ಆ್ಯಕ್ಷನ್‌ ಸಿನಿಮಾಗಳು ಬಿಡುಗಡೆಯಾಗುತ್ತಲೇ ಇರುತ್ತವೆ. ಇಂಥ ಸಿನಿಮಾಗಳ ಪೈಕಿ ಕೆಲವು ತಮ್ಮ ಟೈಟಲ್‌, ಸಬ್ಜೆಕ್ಟ್ ಮೂಲಕ ಗಮನ ಸೆಳೆದರೆ, ಇನ್ನು ಕೆಲವು ಸಿನಿಮಾಗಳು ತಮ್ಮ ಕಾಸ್ಟಿಂಗ್‌, ಬಜೆಟ್‌, ಮೇಕಿಂಗ್‌ ಮೂಲಕ ಗಮನ ಸೆಳೆಯುತ್ತವೆ.

ಈ ವರ್ಷದ ಆರಂಭದಲ್ಲಿ “ಗನ್ಸ್‌ ಆ್ಯಂಡ್‌ ರೋಸಸ್‌’ ಎಂಬ ಅಂಥದ್ದೇ ಸಿನಿಮಾ ತನ್ನ ಟೈಟಲ್‌, ಸಬ್ಜೆಕ್ಟ್, ಕಾಸ್ಟಿಂಗ್‌ ಮತ್ತು ಮೇಕಿಂಗ್‌ ಹೀಗೆ ಹಲವು ವಿಷಯಕ್ಕೆ ಸಿನಿಮಂದಿಯ ಗಮನ ಸೆಳೆಯುತ್ತಿದೆ. ಕನ್ನಡ ಚಿತ್ರರಂಗದ ಹಿರಿಯ ಚಿತ್ರಕಥೆ ಬರಹಗಾರ ಅಜಯ್‌ ಕುಮಾರ್‌ ಪುತ್ರ ಅರ್ಜುನ್‌ “ಗನ್ಸ್‌ ಆ್ಯಂಡ್‌ ರೋಸಸ್‌’ ಸಿನಿಮಾದ ಮೂಲಕ ನಾಯಕ ನಟನಾಗಿ ಬೆಳ್ಳಿತೆರೆಗೆ ಪರಿಚಯವಾಗುತ್ತಿದ್ದಾರೆ. ಸಿನಿಮಾದಲ್ಲಿ ಇಂಜಿನಿಯರಿಂಗ್‌ ಮುಗಿಸಿದ ಹುಡುಗನಾಗಿ ಅರ್ಜುನ್‌, ಮಾಸ್‌ ಹೀರೋ ಆಗಿ ಆ್ಯಕ್ಷನ್‌ ಲುಕ್‌ನಲ್ಲಿ ಎಂಟ್ರಿಯಾಗುತ್ತಿದ್ದಾರೆ.

ಈ ಚಿತ್ರವನ್ನು ಎಚ್‌.ಆರ್‌. ನಟರಾಜ್‌ ನಿರ್ಮಿಸಿದ್ದು, ಎಚ್‌.ಎಸ್‌. ಶ್ರೀನಿವಾಸ್‌ ನಿರ್ದೇಶನ ಮಾಡಿದ್ದಾರೆ. ಈಗಾಗಲೇ ಒಂದೆರಡು ಸಿನಿಮಾಗಳಲ್ಲಿ ಅಭಿನಯಿಸಿರುವ ನಟಿ ಯಶ್ವಿ‌ಕಾ ನಿಷ್ಕಲಾ “ಗನ್ಸ್‌ ಆ್ಯಂಡ್‌ ರೋಸಸ್‌’ ಸಿನಿಮಾದಲ್ಲಿ ನಾಯಕಿಯಾಗಿದ್ದು, ನಾಯಕನ ಹಿಂದೆ ಬೀಳುವ ಬೋಲ್ಡ್‌ ಹುಡುಗಿಯಾಗಿ ಬೋಲ್ಡ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಉಳಿದಂತೆ ಕಿಶೋರ್‌, ಅವಿನಾಶ್‌, ಶೋಭರಾಜ್‌, ಸುಚೇಂದ್ರ ಪ್ರಸಾದ್‌, ನೀನಾಸಂ ಅಶ್ವಥ್‌, ಅರುಣಾ ಬಾಲರಾಜ್‌, ಜೀವನ್‌ ರಿಚ್ಚಿ ಸೇರಿದಂತೆ ಅನೇಕ ದೊಡ್ಡ ಕಲಾವಿದರು ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.