ಜಿಎಸ್‌ಟಿ: ತೆರಿಗೆ ವಂಚಿಸಿದ್ರೆ ಜಾಮೀನುರಹಿತ ವಾರಂಟ್‌

ಹೊಸದಿಲ್ಲಿ: 5 ಕೋಟಿ ರೂ.ಗಿಂತಲೂ ಅಧಿಕ ಮೊತ್ತದ ತೆರಿಗೆ ವಂಚನೆಯನ್ನು ಜಿಎಸ್‌ಟಿ ನೀತಿ ಅಡಿಯಲ್ಲಿ ಜಾಮೀನು ರಹಿತ ಅಪರಾಧ ಎಂದು ಪರಿಗಣಿಸಲಿದ್ದು, ತೆರಿಗೆ ವಂಚಕರನ್ನು ಪೊಲೀಸರು ವಾರಂಟ್‌ ಇಲ್ಲದೆ ಬಂಧಿಸಬಹುದಾಗಿದೆ. ತೆರಿಗೆ ವ್ಯಾಪ್ತಿಗೆ ಬರುವ ಸರಕು ಮತ್ತು ಸೇವೆಗಳಿಗೆ ಸಂಬಂಧಿಸಿ ತೆರಿಗೆ ವಂಚಿಸಿದ್ದರೆ ಅಥವಾ ಇನ್‌ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ ಮೊತ್ತವನ್ನು ತಪ್ಪಾಗಿ ನೀಡಿದಲ್ಲಿ ಇಲ್ಲವೇ ಅಕ್ರಮವಾಗಿ ಪಡೆದ ಮರುಪಾವತಿ (ರಿಫ‌ಂಡ್‌) ಮೊತ್ತ 5 ಕೋಟಿ ರೂ.ಗಿಂತಲೂ ಹೆಚ್ಚಾಗಿರುವ ಪ್ರಕರಣಗಳನ್ನು ಜಾಮೀನುರಹಿತ ಅಪರಾಧ ಎಂದು ಪರಿಗಣಿಸಲು ಕೇಂದ್ರ ಜಿಎಸ್‌ಟಿ ಕಾಯ್ದೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ.

ಈ ನಡುವೆ, ಮುಂದಿನ ಹಣಕಾಸು ವರ್ಷದಿಂದ ಶಿಕ್ಷಣ, ಆರೋಗ್ಯ ಹಾಗೂ ತೀರ್ಥಯಾತ್ರೆಗಳನ್ನು ಹೊಸ ವ್ಯವಸ್ಥೆಗೆ ಸೇರ್ಪಡೆ ಮಾಡಲಾಗುತ್ತದೆ. ಈ ಬಗ್ಗೆ ಕೇಂದ್ರ ಕಂದಾಯ ಕಾರ್ಯದರ್ಶಿ ಹಸ್ಮುಖ್‌ ಅಧಿಯಾ ತಿಳಿಸಿದ್ದಾರೆ. ತೆರಿಗೆ ದರ ನಿರ್ಧರಿಸುವ ಸಂಬಂಧ ವಿತ್ತ ಸಚಿವ ಜೇಟ್ಲಿ ನೇತೃತ್ವದ ಸಮಿತಿ ಮೇ 18, 19ರಂದು ಶ್ರೀನಗರದಲ್ಲಿ ಸಭೆ ಸೇರಲಿದೆ.