ಪೂಜೆ ಸಾಮಗ್ರಿ, ಗಾಂಧಿ ಟೋಪಿ, ರಾಷ್ಟ್ರಧ್ವಜಕ್ಕೆ ತೆರಿಗೆ ಇಲ್ಲ

ನವದೆಹಲಿ: ಜು.1 ರಿಂದ ದೇವರ ಪೂಜೆ ಅಂಥಾ ದುಬಾರಿ ಏನೂ ಆಗಲ್ಲ. ಕೇಂದ್ರ ಜಿಎಸ್‌ಟಿ ಮಂಡಳಿ, ಪೂಜಾ ಸಾಮಗ್ರಿಗಳಿಗೆ ಯಾವುದೇ ತೆರಿಗೆ ವಿಧಿಸದೇ ಇರಲು ನಿರ್ಧರಿಸಿದ್ದು, ಹೀಗಾಗಿ ಈ ವಸ್ತುಗಳು ಅಗ್ಗವಾಗಿ ಸಿಗಲಿವೆ.

ಇದರ ಜತೆಗೆ, ಖಾದಿ ನೂಲು, ಗಾಂಧಿ ಟೋಪಿ, ರಾಷ್ಟ್ರಧ್ವಜಕ್ಕೂ ಯಾವುದೇ ತೆರಿಗೆ ಹಾಕದೇ ಇರಲು ನಿರ್ಧರಿಸಲಾಗಿದೆ. ಶನಿವಾರ ನಡೆದ ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಮುತ್ತು, ಕೃತಕ ಆಭರಣ ಮತ್ತು ನಾಣ್ಯಗಳಿಗೆ ಶೇ.3 ರಷ್ಟು ತೆರಿಗೆ ಬೀಳಲಿದೆ.

ಧಾರ್ಮಿಕ ಸಂಸ್ಥೆಗಳಲ್ಲಿ ಮಾರಾಟವಾಗುವ ರುದ್ರಾಕ್ಷಿ, ಪಂಚಾಮೃತ, ತುಳಸಿ-ಕಾಂತಿ ಮಾಲೆ, ಪಂಚಗವ್ಯ, ಪವಿತ್ರ ದಾರ, ವಿಭೂತಿ ಮತ್ತು ಪಾದುಕೆಗಳಿಗೆ ತೆರಿಗೆ ಇಲ್ಲ. ಜತೆಗೆ ಗಂಧದ ತಿಲಕ, ಬ್ರಾಂಡೆಡ್‌ ಅಲ್ಲದ ಜೇನುತುಪ್ಪ, ಗೆಜ್ಜೆ ಬತ್ತಿ(ಹತ್ತಿಯಿಂದ ಮಾಡಿದ ಹಾರ)ಗೂ ಯಾವುದೇ ತೆರಿಗೆ ಇಲ್ಲ. ಆದರೆ ಧೂಪ, ಕಲ್ಲುಸಕ್ಕರೆ, ಬೆಂಡು-ಬತಾಸು, ಸಕ್ಕರೆ ರೂಪದ ಪ್ರಸಾದಕ್ಕೆ ಶೇ.5 ರಷ್ಟು ತೆರಿಗೆ ವಿಧಿಸಲಾಗಿದೆ. ಸಾವಿರ ರೂ.ಗಿಂತ ಕಡಿಮೆ ಇರುವ ಹೊದಿಕೆ, ಎಲ್ಲಾ ರೀತಿಯ ಟವೆಲ್‌ಗೆ ಶೇ.5 ಹಾಗೂ ಕಚೀìಫ್, ಸೊಳ್ಳೆ ಪರದೆ, ಬ್ಯಾಗು, ಸಾಕ್ಸ್‌ಗೂ ಶೇ.5 ರಷ್ಟು ತೆರಿಗೆ ಬೀಳಲಿದೆ. ಆದರೆ ಇದೇ ವಸ್ತುಗಳ ಬೆಲೆ 1000ಕ್ಕಿಂತ ಹೆಚ್ಚಾದರೆ ಶೇ.12 ರಷ್ಟು ತೆರಿಗೆ ಬೀಳಲಿದೆ. ಬೆಂಕಿಪೊಟ್ಟಣಕ್ಕೂ ಶೇ.5 ರಷ್ಟು ತೆರಿಗೆ ಇದೆ.