ಜಿಎಸ್‌ಟಿ ಹೊಸ ಪರಿಹಾರಕ್ಕೆ ರಾಜ್ಯಗಳ ಸಮ್ಮತಿ ಸಾಧ್ಯತೆ

ಹೊಸದಿಲ್ಲಿ: ಜಿಎಸ್‌ಟಿ ಬಾಕಿ ಪಾವತಿಗೆ ಸಂಬಂಧಿಸಿ ಆರ್‌ಬಿಐ ಯಿಂದ ವಿಶೇಷ ಗವಾಕ್ಷಿ ಯೋಜನೆ ಮೂಲಕ 1.1 ಲಕ್ಷ ಕೋಟಿ ರೂ.ಗಳನ್ನು ಪಡೆದು, ರಾಜ್ಯಗಳಿಗೆ ನೀಡಲು ಕೇಂದ್ರ ಸರಕಾರ ನಿರ್ಧರಿಸಿರುವುದನ್ನು ಬಹುತೇಕ ರಾಜ್ಯಗಳು ಸ್ವಾಗತಿಸುವ ಸಾಧ್ಯತೆಯಿದೆ. ಈ ಹಿಂದಿನ ಪ್ರಸ್ತಾವವನ್ನು ವಿರೋಧಿಸಿದ್ದ ಸುಮಾರು 7 ರಾಜ್ಯಗಳು ಸರಕಾರದ ಹೊಸ ಪ್ರಸ್ತಾವಕ್ಕೆ ಒಪ್ಪಿಗೆ ಸೂಚಿಸುವ ಸಾಧ್ಯತೆ ಅಧಿಕವಾಗಿದೆ ಎಂದು ಮೂಲಗಳು ತಿಳಿಸಿವೆ.

ಅಲ್ಲದೆ ಮುಂದಿನ ಕೆಲವು ತಿಂಗಳುಗಳ ಕಾಲದ ಆದಾಯದ ಹರಿವನ್ನು ಆಧರಿಸಿ ಜಿಎಸ್‌ಟಿ ಮಂಡಳಿಯು ಆರ್‌ಬಿಐಯಿಂದ ಎಷ್ಟು ಮೊತ್ತವನ್ನು ಪಡೆಯಬೇಕು ಎಂಬ ಕುರಿತು ನಿರ್ಧರಿಸಲಿದೆ ಎಂದೂ ಅಧಿಕಾರಿಗಳು ತಿಳಿಸಿದ್ದಾರೆ.

ಜಿಎಸ್‌ಟಿ ಬಾಕಿ ಪಾವತಿಗೆ ಸಂಬಂಧಿಸಿ ಈ ಹಿಂದೆ ಕೇಂದ್ರ ಸರಕಾರವು ನೀಡಿದ್ದ ಎರಡು ಆಯ್ಕೆಗಳನ್ನು ಛತ್ತೀಸ್‌ಗಢ, ಕೇರಳ, ಝಾರ್ಖಂಡ್‌, ರಾಜಸ್ಥಾನ, ತೆಲಂಗಾಣ ಮತ್ತು ಪಶ್ಚಿಮ ಬಂಗಾಲ ಸರಕಾರಗಳು ತೀವ್ರವಾಗಿ ವಿರೋಧಿಸಿದ್ದವು.