ಈಶಾನ್ಯ ವಲಯ ಜಲ ಸಂಪನ್ಮೂಲ ವ್ಯವಸ್ಥಾಪನೆಗೆ ಉನ್ನತ ಸಮಿತಿ

ಹೊಸದಿಲ್ಲಿ : ಕೇಂದ್ರ ಸರಕಾರ ಈಶಾನ್ಯ ವಲಯದ ಜಲ ಸಂಪನ್ಮೂಲದ ಸಮರ್ಪಕ ವ್ಯವಸ್ಥಾಪನೆಗಾಗಿ ಉನ್ನತ ಮಟ್ಟದ ಸಮಿತಿಯೊಂದನ್ನು ರೂಪಿಸಿರುವುದಾಗಿ ಅಧಿಕೃತ ಪ್ರಕಟನೆ ತಿಳಿಸಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಈ ವರ್ಷ ಆಗಸ್ಟ್‌ನಲ್ಲಿ ಈಶಾನ್ಯ ವಲಯದಲ್ಲಿನ ಪ್ರವಾಹ ಪರಿಸ್ಥಿತಿ ಮತ್ತು  ಪರಿಹಾರ ಕಾರ್ಯಗಳ ಅವಲೋಕನಕ್ಕಾಗಿ ಗುವಾಹಟಿಗೆ ಭೇಟಿ ನೀಡಿದುದನ್ನು ಅನುಸರಿಸಿ ಉನ್ನತ ಮಟ್ಟದ ಜಲ ಸಂಪನ್ಮೂಲ ವ್ಯವಸ್ಥಾಪನ ಸಮಿತಿಯನ್ನು ರೂಪಿಸಿರುವುದಾಗಿ ತಿಳಿದು ಬಂದಿದೆ.

ಈ ಸಮಿತಿಯ ನೇತೃತ್ವವನ್ನು ನೀತಿ ಆಯೋಗದ ಉಪಾಧ್ಯಕ್ಷ ರಾಜೀವ್‌ ಕುಮಾರ್‌ ವಹಿಸುವರು. ಮುಂದಿನ ವರ್ಷ ಜೂನ್‌ ಒಳಗೆ ಸಮಿತಿಯು ತನ್ನ ವರದಿಯನ್ನು ಸಲ್ಲಿಸಲಿದೆ. 

ಅಸ್ಸಾಂ, ಮಣಿಪುರ, ನಾಗಾಲ್ಯಾಂಡ್‌ ಮತ್ತು ಅರುಣಾಚಲ ಪ್ರದೇಶದ ಮುಖ್ಯಮಂತ್ರಿಗಳೊಂದಿಗೆ ಪ್ರವಾಹ ಅವಲೋಕನ ನಡೆಸಿದ್ದ ವೇಳೆ ಪ್ರಧಾನಿ ಮೋದಿ ಅವರು ಈಶಾನ್ಯ ವಲಯದ ಸಮಗ್ರ ಜಲ ಸಂಪನ್ಮೂಲದ ವ್ಯವಸ್ಥಾಪನೆಗೆ ಉನ್ನತ ಮಟ್ಟದ ಸಮಿತಿಯೊಂದನ್ನು ರೂಪಿಸಲಾಗುವುದೆಂದು ಪ್ರಕಟಿಸಿದ್ದರು.