Flight: ಕೊನೇ ಹಾರಾಟ ನಡೆಸಿದ ವಿಸ್ತಾರ ಏರ್‌ಲೈನ್ಸ್‌: ಏರಿಂಡಿಯಾದಲ್ಲಿ ವಿಲೀನ!

ನವದೆಹಲಿ: ದೇಸಿ ವಿಮಾನಯಾನದಲ್ಲಿ ಮೊದಲ ಬಾರಿಗೆ ಪ್ರೀಮಿಯಂ ಎಕಾನಮಿ ಕ್ಲಾಸ್‌ ಸೌಲಭ್ಯವನ್ನು ಒದಗಿಸಿದ್ದ ವಿಸ್ತಾರ ವಿಮಾನ ಯಾನ ಸಂಸ್ಥೆ ಸೋಮವಾರ ತನ್ನ ಕೊನೇ ಹಾರಾಟ ನಡೆಸಿದೆ.

ಟಾಟಾ ಸಂಸ್ಥೆಯೊಂದಿಗಿನ ವಿಲೀನ ಪ್ರಕ್ರಿಯೆ ಮುಕ್ತಾಯವಾಗಿದ್ದು, ಮಂಗಳವಾರದಿಂದ ವಿಸ್ತಾರದ ಬದಲು ಏರಿಂಡಿಯಾ ವಿಮಾನಗಳು ಕಾರ್ಯಾಚರಣೆ ನಡೆಸಲಿವೆ. ಸಿಬ್ಬಂದಿ ಕೊರತೆ, ಪೈಲಟ್‌ಗಳ ಪ್ರತಿಭಟನೆ ಸೇರಿದಂತೆ ಹಲವು ಸಮಸ್ಯೆಗಳಿಂದಾಗಿ ಸಿಂಗಾಪುರ್‌ ಮೂಲಕ ವಿಸ್ತಾರ ಏರಿಂಡಿಯಾ ಜತೆ ವಿಲೀನ ಪ್ರಕ್ರಿಯೆ ಆರಂಭಿಸಿತ್ತು.

ಈಗಾಗಲೇ ವಿಸ್ತಾರ ವಿಮಾನಕ್ಕಾಗಿ ಮಾಡಲಾಗಗಿದ್ದ ಎಲ್ಲಾ ಬುಕಿಂಗ್‌ಗಳು ಏರಿಂಡಿಯಾಕ್ಕೆ ವರ್ಗಾವಣೆಯಾಗಿದೆ. ವಿಸ್ತಾರ ಸಂಸ್ಥೆಯ ಬಳಿ 200 ವಿಮಾನಗಳಿದ್ದು, 2015ರಿಂದ 2024ರವರೆಗೆ ಭಾರತದಲ್ಲಿ ಇದು ಕಾರ್ಯನಿರ್ವಹಿಸಿತ್ತು.

ವಿಸ್ತಾರ ಕೊನೇ ಹಾರಾಟ ನಡೆಸಿದ ಬಳಿಕ ಸಾಮಾಜಿಕ ಜಾಲತಾಣದಲ್ಲಿ ಹಲವರು ವಿಸ್ತಾರದೊಂದಿಗಿನ ತಮ್ಮ ಪ್ರಯಾಣದ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.