ಅಲೆಮಾರಿ ಕುಟುಂಬದ ಮೇಲೆ ಗೋರಕ್ಷಕರ ದಾಳಿ

ಶ್ರೀನಗರ: ರಾಜಸ್ಥಾನದ ಅಳ್ವಾರ್‌ನಲ್ಲಿ ಗೋರಕ್ಷಕರ ದಾಳಿ ಘಟನೆ ನೆನಪಲ್ಲಿರುವಾಗಲೇ, ಜಮ್ಮು ಮತ್ತು ಕಾಶ್ಮೀರದ ರಿಯಾಸಿ ಜಿಲ್ಲೆಯಲ್ಲಿ 9 ವರ್ಷದ ಬಾಲಕಿ ಸೇರಿದಂತೆ ಒಂದೇ ಕುಟುಂಬದ ಐವರ ಮೇಲೆ ಸ್ವಘೋಷಿತ ಗೋರಕ್ಷಕರು ಹಲ್ಲೆ ನಡೆಸಿದ ಘಟನೆ ಶುಕ್ರವಾರ ಸಂಜೆ ನಡೆದಿದೆ. ಘಟನೆಯಲ್ಲಿ 9ರ ಬಾಲಕಿ ಶಮ್ಮಿ ತೀವ್ರ ಗಾಯಗೊಂಡಿದ್ದು, ಆಕೆಯನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. 10ರ‌ ಮಗನೊಬ್ಬ ಕಾಣೆಯಾಗಿದ್ದು, ಇನ್ನೂ ಪತ್ತೆಯಾಗಿಲ್ಲ ಎಂದು ಸಂತ್ರಸ್ತ ಕುಟುಂಬ ಹೇಳಿದೆ.

ಇಲ್ಲಿನ ಅಲೆಮಾರಿ ಜನಾಂಗದ ಕುಟುಂಬವೊಂದು ಶುಕ್ರವಾರ 16 ಹಸುಗಳು, ಮೇಕೆಗಳು, ಕುರಿಗಳು ಸೇರಿದಂತೆ ತಮ್ಮ ಜಾನುವಾರುಗಳೊಂದಿಗೆ ಬೇರೆ ಪ್ರದೇಶಕ್ಕೆ ಹೊರಟಿತ್ತು. ತಲ್ವಾರಾ ಪ್ರದೇಶ ತಲುಪುತ್ತಿದ್ದಂತೆ ಅಲ್ಲಿಗೆ ಲಗ್ಗೆಯಿಟ್ಟ ಗೋರಕ್ಷಕರ ಗುಂಪು, ಏಕಾಏಕಿ ಈ ಕುಟುಂಬದ ಮೇಲೆ ಕಬ್ಬಿಣದ ರಾಡ್‌ಗಳಿಂದ ಹಲ್ಲೆ ನಡೆಸಿತು. “ನಮ್ಮ ಮಕ್ಕಳನ್ನು, ಹಿರಿಯರನ್ನೂ ಬಿಡದೇ ರಾಡ್‌ನಿಂದ ಥಳಿಸಿದರು. 10 ವರ್ಷದ ಮಗ ಕಾಣುತ್ತಿಲ್ಲ. ಅವನು ಬದುಕಿದ್ದಾನೋ, ಇಲ್ಲವೋ ಎಂದೂ ಗೊತ್ತಿಲ್ಲ,’ ಎಂದು ಸಂತ್ರಸ್ತೆ ನಸೀಂ ಬೇಗಂ ಹೇಳಿದ್ದಾರೆ.

ಘಟನೆ ಸಂಬಂಧ ಪ್ರಕರಣ ದಾಖಲಾಗಿದೆ. ಐವರು ಆರೋಪಿಗಳ ಗುರುತು ಪತ್ತೆಯಾಗಿದೆ. ಆದರೆ, ಯಾರನ್ನೂ ಬಂಧಿಸಲಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.