ಜ.31ರಿಂದ ಜಾಗತಿಕ ಉದ್ಯಮಶೀಲತೆ ಶೃಂಗಸಭೆ

ಬೆಂಗಳೂರು: ಐಐಟಿ ಖಾರಗ್‌ಪುರ ವತಿಯಿಂದ “ಜಾಗತಿಕ ಉದ್ಯಮಶೀಲತೆ ಶೃಂಗಸಭೆ -2020’ನ್ನು ಜನವರಿ 31 ರಿಂದ ಫೆಬ್ರವರಿ 2 ರವರೆಗೆ ಹಮ್ಮಿಕೊಳ್ಳಲಾಗಿದೆ. ಈ ಶೃಂಗಸಭೆಯು ಉದ್ಯಮಶೀಲತಾ ವೇದಿಕೆಯಾಗಲಿದ್ದು, ಹೊಸ ಹಾಗೂ ಯುವ ಉದ್ಯಮಿಗಳು, ಶ್ರೇಷ್ಠ ಉದ್ಯಮಿಗಳು, ಬಂಡವಾಳಶಾಹಿಗಳು ಮತ್ತು ಕಾಲೇಜು ವಿದ್ಯಾರ್ಥಿಗಳು ಇದರಲ್ಲಿ ಭಾಗವಹಿಸಲಿದ್ದಾರೆ.

ಹಿಂದಿನ ಆವೃತ್ತಿಗಳಲ್ಲಿ ಗೂಗಲ್‌ ಸಿಇಒ ಸುಂದರ್‌ ಪಿಚೈ ಸೇರಿದಂತೆ ಅನೇಕ ಉದ್ಯಮ ದಿಗ್ಗಜರು ಭಾಗವಹಿಸಿದ್ದರು. ಅದೇ ರೀತಿ ಈ ಬಾರಿ ಸ್ಯಾಮ್ಸಂಗ್‌, ಮೈಕ್ರೋಸಾಫ್ಟ್, ಡೆಲ್‌, ಐಬಿಎಂ, ಇಂಟೆಲ್, ಫ್ಲಿಪ್ಕಾರ್ಟ್‌, ಅಮೆಜಾನ್‌ ವೆಬ್‌ ಸರ್ವೀಸಸ್‌, ಡೆಲಾಯ್ಡ್ನಂತಹ ದೈತ್ಯ ಉದ್ಯಮ ಸಂಸ್ಥೆಗಳ ಪ್ರತಿನಿಧಿಗಳು ಭಾಗವಹಿಸುತ್ತಿದ್ದಾರೆ. ಕಾರ್ಯಾಗಾರಗಳು, ಚರ್ಚೆಗಳ ಮೂಲಕ ಉದ್ಯಮಶೀಲ ಪ್ರಯತ್ನಗಳು ಮತ್ತು ಅನುಭವಗಳ ವಿನಿಮಯವಾಗಲಿದೆ.

ಜತೆಗೆ ಹೊಸ ಸಾರ್ಟ್‌ ಆಪ್‌ ಕಂಪನಿಗಳಿಗೆ ಉತ್ತಮ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿಕೊಳ್ಳಲು ವೇದಿಕೆ ಒದಗಿಸಲಾಗಿದೆ. ಈ ಶೃಂಗಸಭೆ ಪ್ರವೇಶ ನೋಂದಣಿ ಆರಂಭವಾಗಿದ್ದು, ಡಿ.25 ಕೊನೆಯ ದಿನವಾಗಿದೆ. ನೋಂದಣಿ ಹಾಗೂ ಹೆಚ್ಚಿನ ಮಾಹಿತಿಗೆ https://reg-ges.ecell-iitkgp.org ಭೇಟಿ ನೀಡಬಹುದು ಎಂದು ಪ್ರಕಟಣೆ ತಿಳಿಸಿದೆ.