ಅಮೋಘ ಫಾರ್ಮ್ ನಲ್ಲಿರುವ ಭಾರತದ ಪ್ರತಿಭಾನ್ವಿತ ಆಟಗಾರ ಶುಭಮನ್‌ ಗಿಲ್‌ ಅವರಿಗೆ ಜಿಂಬಾಬ್ವೆಯಲ್ಲಿ ಅಭಿಮಾನಿಯೊಬ್ಬರು ಸಿಕ್ಕಿದ್ದಾರೆ.
ಏಕದಿನ ಸರಣಿ ಮುಗಿದ ಬಳಿಕ ತಮ್ಮ ಜೆರ್ಸಿಯನ್ನು ಈ ಅಭಿಮಾನಿಗೆ ಉಡುಗೊರೆಯಾಗಿ ನೀಡಿ ಕ್ರೀಡಾಸ್ಫೂರ್ತಿ ಮೆರೆದಿದ್ದಾರೆ. ಅಂದಹಾಗೆ ಗಿಲ್‌ ಫ್ಯಾನ್‌ ಬೇರೆ ಯಾರೂ ಅಲ್ಲ, ಅಂತಿಮ ಪಂದ್ಯದಲ್ಲಿ 5 ವಿಕೆಟ್‌ ಕಿತ್ತು ಮಿಂಚಿದ ವೇಗಿ ಬ್ರಾಡ್‌ ಇವಾನ್ಸ್‌!
ಪಂದ್ಯದ ಬಳಿಕ ನಡೆದ ಪತ್ರಿಕಾಗೋಷ್ಠಿಗೆ ಶುಭಮನ್‌ ಗಿಲ್‌ ಕೊಟ್ಟ ಜೆರ್ಸಿಯೊಂದಿಗೆ ಇವಾನ್ಸ್‌ ಆಗಮಿಸಿದರು. ಜತೆಗೆ ತಾನು ಗಿಲ್‌ ಅವರ ಬಹು ದೊಡ್ಡ ಫ್ಯಾನ್‌ ಎಂಬುದಾಗಿ ಹೇಳಿದರು. ಇಬ್ಬರೂ ಜೆರ್ಸಿ ವಿನಿಮಯ ಮಾಡಿಕೊಂಡ ಸ್ವಾರಸ್ಯವನ್ನು ತೆರೆದಿಟ್ಟರು.
“ಸರಣಿಗೂ ಮೊದಲೇ ನಾನು ಅವರ ಅಭಿಮಾನಿ. ಆದ್ದರಿಂದಲೇ ಅವರ ಈ ಶರ್ಟ್‌ ಇಂದು ನನ್ನ ಬಳಿ ಇದೆ.
ಇಲ್ಲಿ ನಾವಿಬ್ಬರು ಪರಸ್ಪರ ಮುಖಾಮುಖೀ ಆದೆವು. ಗಿಲ್‌ ಓರ್ವ ವಿಶ್ವ ದರ್ಜೆಯ ಆಟಗಾರ. ಅವರ ಆಟದ ಶೈಲಿ ನನಗೆ ಬಹಳ ಇಷ್ಟ. ಹೀಗಾಗಿ ನಾನು ಅವರ ಅಭಿಮಾನಿಯಾದೆ. ಗಿಲ್‌ ಐಪಿಎಲ್‌ನಲ್ಲಿ ಆಡುತ್ತಿರುವುದನ್ನೂ ನಾನು ಟಿವಿಯಲ್ಲಿ ಕಂಡಿದ್ದೇನೆ. ಆಸ್ಟ್ರೇಲಿಯ ವಿರುದ್ಧದ ಬಿಸ್ಬೇನ್‌ ಟೆಸ್ಟ್‌ ಗೆಲುವು ಹಾಗೂ ಸರಣಿ ಜಯದಲ್ಲೂ ಗಿಲ್‌ ಪಾತ್ರ ಮರೆಯುವಂತಿಲ್ಲ. ಹೀಗಾಗಿ ನಾನು ಅವರ ಅಭಿಮಾನಿಯದೆ’ ಎಂದು ಬ್ರಾಡ್‌ ಇವಾನ್ಸ್‌ ಹೇಳಿದರು.
“ಪಂದ್ಯದ ಬಳಿಕ ವಾಪಸಾಗುತ್ತಿದ್ದಾಗ ಮೊದಲು ನನ್ನ ಜೆರ್ಸಿಯನ್ನು ಗಿಲ್‌ ಅವರಿಗೆ ನೀಡಿದೆ. ಅವರು ಕೂಡಲೇ ತಮ್ಮ ಜೆರ್ಸಿ ತೆಗೆದು ನನಗೆ ಕೊಟ್ಟರು. ಈ ಕುರಿತು ನಾವು ಬೆಳಗ್ಗೆಯೇ ಮಾತಾಡಿಕೊಂಡಿದ್ದೆವು. ಇದಕ್ಕೆ ಗಿಲ್‌ ಒಪ್ಪಿದರು’ ಎಂದ ಬ್ರಾಡ್‌ ಇವಾನ್ಸ್‌, ಭವಿಷ್ಯದಲ್ಲಿ ಐಪಿಎಲ್‌ ಆಡುವುದು ನನ್ನ ಕನಸು ಎಂದೂ ಹೇಳಿದರು.
