ಗೇಲ್‌ 22ನೇ ಟಿ20 ಶತಕ ವ್ಯರ್ಥ

ಬಸೆಟರ್‌: ಸ್ಫೋಟಕ ಬ್ಯಾಟ್ಸ್‌ ಮನ್‌ ಕ್ರಿಸ್‌ ಗೇಲ್‌ ಅವರ 22ನೇ ಟಿ20 ಶತಕಕ್ಕೆ ಸೋಲಿನ ಬಿಸಿ ತಟ್ಟಿದೆ. “ಕೆರಿಬಿಯನ್‌ ಪ್ರೀಮಿಯರ್‌ ಲೀಗ್‌’ನ ಬೃಹತ್‌ ಮೊತ್ತದ ಮುಖಾಮುಖೀಯಲ್ಲಿ ಗೇಲ್‌ ಅವರ ಜಮೈಕಾ ತಲ್ಲವಾಸ್‌ ತಂಡ ಸೇಂಟ್‌ ಕಿಟ್ಸ್‌ ಆ್ಯಂಡ್‌ ನೆವಿಸ್‌ ಪ್ಯಾಟ್ರಿಯಾಸ್‌ ವಿರುದ್ಧ 4 ವಿಕೆಟ್‌ ಸೋಲನುಭವಿಸಿದೆ.

ಗೇಲ್‌ ಅವರ 116 ರನ್‌ ಸಾಹಸ ದಿಂದ ಜಮೈಕಾ 4 ವಿಕೆಟಿಗೆ 241 ರನ್‌ ರಾಶಿ ಹಾಕಿತು. ಪ್ಯಾಟ್ರಿಯಾಸ್‌ 18.5 ಓವರ್‌ಗಳಲ್ಲಿ 6 ವಿಕೆಟಿಗೆ 242 ರನ್‌ ಬಾರಿಸಿ ಜಯಭೇರಿ ಮೊಳಗಿಸಿತು. ಕ್ರಿಸ್‌ ಗೇಲ್‌ 10 ಭರ್ಜರಿ ಸಿಕ್ಸರ್‌ ಹಾಗೂ 7 ಬೌಂಡರಿ ನೆರವಿನಿಂದ 116 ರನ್‌ ಸಿಡಿಸಿದರು. ಎದುರಿಸಿದ್ದು 62 ಎಸೆತ. ಕ್ಯಾಡ್ವಿಕ್‌ ವಾಲ್ಟನ್‌ 36 ಎಸೆತ ಎದುರಿಸಿ 73 ರನ್‌ ಬಾರಿಸಿದರು (8 ಸಿಕ್ಸರ್‌, 3 ಬೌಂಡರಿ).