ಹುತಾತ್ಮನ ಪತ್ನಿ ಐಎಎಫ್ಗೆ

ಹೊಸದಿಲ್ಲಿ: ಬೆಂಗಳೂರಿನ ಎಚ್‌ಎಎಲ್‌ ವಿಮಾನ ನಿಲ್ದಾಣದಲ್ಲಿ ಇದೇ ವರ್ಷ
ಫೆ. 1ರಂದು ಮಿರಾಜ್‌ 2000 ವಿಮಾನದ ಹಾರಾಟದ ವೇಳೆ ಉಂಟಾದ ಅವಘಡದಲ್ಲಿ ಹುತಾತ್ಮರಾಗಿದ್ದ ಐಎಎಫ್ ಯೋಧ ಸಮೀರ್‌ ಅಬ್ರೋಲ್‌ ಅವರ ಪತ್ನಿ ಗರೀಮಾ ಅಬ್ರೋಲ್‌ ವಾಯುಪಡೆಗೆ ಸೇರ್ಪಡೆಗೊಂಡಿದ್ದಾರೆ.

ನಿವೃತ್ತ ಏರ್‌ ಮಾರ್ಷಲ್‌ ಅನಿಲ್‌ ಚೋಪ್ರಾ ಅವರು ಟ್ವಿಟರ್‌ನಲ್ಲಿ ಈ ವಿಷಯ ತಿಳಿಸಿದ್ದು, “ಯೋಧರ ಪತ್ನಿಯರು ಮಾತ್ರ ಇಂಥ ಆತ್ಮಸ್ಥೈರ್ಯ ತೋರ ಬಲ್ಲರು’ ಎಂದು ಕೊಂಡಾಡಿದ್ದಾರೆ. “ಸದ್ಯಕ್ಕೆ ತೆಲಂಗಾಣದ ದುಂಡಿಗಲ್‌ನಲ್ಲಿರುವ ವಾಯು ಪಡೆ ತರಬೇತಿ ಕೇಂದ್ರದಲ್ಲಿ ತರಬೇತಿಯನ್ನು ಪೂರ್ಣಗೊಳಿಸಿರುವ ಗರೀಮಾ, 2020ರ ಜನವರಿಯಿಂದ ಅವರು ತಮ್ಮ ಸೇವೆ ಆರಂಭಿಸಲಿದ್ದಾರೆ’ ಎಂದು ತಿಳಿಸಿದ್ದಾರೆ.

ಫೆ. 1ರಂದು, ತಾಂತ್ರಿಕವಾಗಿ ಉನ್ನತೀಕರಿ ಸಲ್ಪಟ್ಟಿದ್ದ ಮಿರಾಜ್‌ 2000 ಯುದ್ಧ ವಿಮಾನದ ಪರೀಕ್ಷೆಯ ವೇಳೆ, ತಾಂತ್ರಿಕ ದೋಷದಿಂದಾಗಿ ವಿಮಾನ ಅಪಘಾತಕ್ಕೀಡಾಗಿತ್ತು. ಅದರಲ್ಲಿ ಸಮೀರ್‌ ಹಾಗೂ ಮತ್ತೂಬ್ಬ ಪೈಲಟ್‌ ಇದ್ದರು. ತುರ್ತು ನಿರ್ಗಮನದ ಮೂಲಕ ಅವರಿಬ್ಬರೂ ಹೊರಬಂದಿದ್ದರಾದರೂ, ಅವರನ್ನು ಸುರಕ್ಷಿತ ಸ್ಥಳಕ್ಕೆ ಕರೆತರಬೇಕಿದ್ದ ಪ್ಯಾರಾಚೂಟ್‌ಗಳು ಸ್ಫೋಟಗೊಂಡ ವಿಮಾನದ ಮೇಲೆಯೇ ಬಂದಿಳಿದಿದ್ದರಿಂದ ಇಬ್ಬರೂ ಅಲ್ಲೇ ಸಜೀವ ದಹನವಾಗಿದ್ದರು.