ಗಾಲೆ ಟೆಸ್ಟ್‌: ಶಫೀಕ್‌ ಶತಕ: ಶ್ರೀಲಂಕಾ ವಿರುದ್ಧ ಪಾಕಿಸ್ಥಾನಕ್ಕೆ 4 ವಿಕೆಟ್‌ ಗೆಲುವು

ಗಾಲೆ: ಆತಿಥೇಯ ಶ್ರೀಲಂಕಾ ವಿರುದ್ಧದ ಗಾಲೆ ಟೆಸ್ಟ್‌ ಪಂದ್ಯದಲ್ಲಿ ಆರಂಭಿಕ ಆಟಗಾರ ಅಬ್ದುಲ್ಲ ಶಫೀಕ್‌ ಅವರ ಅಜೇಯ ಶತಕ ಸಾಧನೆಯಿಂದ ಪಾಕಿಸ್ಥಾನ 4 ವಿಕೆಟ್‌ಗಳ ಗೆಲುವು ದಾಖಲಿಸಿದೆ. ಈ ಗೆಲುವಿನಿಂದ ಪಾಕಿಸ್ಥಾನ ಎರಡು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

ಗೆಲ್ಲಲು 342 ರನ್‌ ಗಳಿಸುವ ಗುರಿ ಪಡೆದ ಪಾಕಿಸ್ಥಾನವು ಪಂದ್ಯದ ಐದನೇ ದಿನ ಆರು ವಿಕೆಟ್‌ ನಷ್ಟದಲ್ಲಿ ಜಯಭೇರಿ ಬಾರಿಸಲು ಯಶಸ್ವಿಯಾಯಿತು. ನಾಲ್ಕನೇ ದಿನ ಮೂರು ವಿಕೆಟಿಗೆ 222 ರನ್‌ ಗಳಿಸಿದ್ದ ಪ್ರವಾಸಿ ತಂಡ ಗೆಲುವಿನತ್ತ ಮುನ್ನಡೆದಿತ್ತು.

ಅಂತಿಮ ದಿನ ಅಬ್ದುಲ್ಲ ಶಫೀಕ್‌ ಅಮೋಘವಾಗಿ ಆಡಿ ಲಂಕಾ ದಾಳಿಯನ್ನು ದಿಟ್ಟವಾಗಿ ಎದುರಿಸಿ ತಂಡಕ್ಕೆ ಗೆಲುವು ದೊರಕಿಸಿಕೊಟ್ಟರು. 408 ಎಸೆತ ಎದುರಿಸಿದ ಶಫೀಕ್‌ 7 ಬೌಂಡರಿ ಮತ್ತು 1 ಸಿಕ್ಸರ್‌ ನೆರವಿನಿಂದ 160 ರನ್‌ ಗಳಿಸಿ ಅಜೇಯರಾಗಿ ಉಳಿದರು. ಅರ್ಹವಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.

ಸಂಕ್ಷಿಪ್ತ ಸ್ಕೋರು: ಶ್ರೀಲಂಕಾ 222 ಮತ್ತು 337; ಪಾಕಿಸ್ಥಾನ 218 ಮತ್ತು 6 ವಿಕೆಟಿಗೆ 344 (ಅಬ್ದುಲ್ಲ ಶಫೀಕ್‌ 160 ಔಟಾಗದೆ, ಬಾಬರ್‌ ಅಜಂ 55, ಪ್ರಭಾತ್‌ ಜಯಸೂರ್ಯ 135ಕ್ಕೆ 4).